ACUENNATE ye’e ra nvireuo ca ralaxaic doctor na’a peulo. Ra cheta’ague ico’ ra sañashenac ra saxaỹa ra qomi’ imeten. Qaq so doctor mashe ra itauan ra no’oita na qanauochaxauapi. Nache qomi’ ishet ra ñalaraxatac ra qarcuennataxac.

Ana la Biblia ’ena’am so doctor. Huo’o na shiỹaxauapi sa ishet ra ipi’iỹaa ana la Biblia, qaq ra ỹalaxaguet na nqataxac huetalec ana maye nache ỹaỹamaqchiguiñe ra lataxac. Semetenac ca lỹa qaỹaloqnaxana.

«So cheta’ague saro’on, huo’o ra secuennate so ihua Dumas , ra ico’ sa ishet ra aỹem iqochetega —’enapec aso Sumiatun—. Huo’o na sasaỹamaxaren, sesheuetapigui, huo’o ra sasaq so maye qataq ivira’a ra seuaxan. Huo’o ra ỹaguec ra salemata nache ivira’a ra secopche.

»Nache so ihua napaxaguena ana la Biblia. Qaq aỹem huo’o ra llashitac, taq ñaqaỹoxotañe nache ñaxaỹaxatega som rapaxaguenataxatac nache sotaigui so lỹa imataxaqui hua’aqte so huetaña soua maye. Huo’o so na’aq ñaxaỹaxatega ra qaitaxaỹaxatac so versiculopi: ‹Aca ’alo mashi huadon, ỹataqta ỹalaxaguet ca lhua, i’enaxatchigui naq’en da lalaxayic so qadataxala’ Jesús [...]. Qaq aca ’alo ỹataqta huo’o naq ’enec naq’en ca lhua› (Efesios 5:22, 33). So n’aqtaqa iviroto ñi iquiyaqte. Nache ñatamenot ñi Dios ra aỹem ichoxoren cha’aye ỹaguec ra iasouaxashet ra she’ina so ihua taq aỹem itauan ra ñalaraxat ra iataxac. Huo’o so na’aq, qomi’ ñapaxaguenaxa ana la Biblia aỹem taq sota ỹamoxoua».

Ana la Biblia ỹan na nqataxac: «Ca ỹale mashi huadon, ỹataqta ỹauotec aca lhua, ’eeta’am da lauotaxanaqtaic da lalamaxat l’oquiaxac» (Efesios 5:28). Aso Sumiatun ’enac: «’Enauac na nqataxac huo’o ra naigui ỹauo’otalo qomi’. Aỹem ỹaguec ra ñaañaxat ra sechetta’ac so ỹamoxoua taq ra sacona ra seqataxatei ra so’ot so n’té ra nvireuo ra r’onataxatac. So ihua nalaraxat ra lataxac ra naxaỹaxañe ra aỹem itauan na qarma’. Qomi’ soxoraỹaca, ñichoxonaxat taq ñapaxasoqteguelec ra huo’o na sasaỹamaxarenac ra qomi’ inoxoqchet (Efesios 4:32). Nagui, sa ishet ra ñapaxasoqteguelec ram qarauotaxanaqtaic nquictauec ra maye. Mashe cuarenta vi’iye ra machiguiñe ra qomi’ nhua’. Ra ỹajnaxanaxaic lqataxac ana la Biblia qomi’ itauan ra queta ra qomi’ namoxou».

«Ỹapac ỹaguec ra aỹem yiloxoic —’enapec so Tayib—. Salectauo ra huo’o ñi nhuaxatega nache ñaqasheguem so ỹogoxonacte aỹem nsheguenaxaic ra huo’o ñi saỹin. Taqa’en huo’o ra seuaxatac aso ihua, Kustriyah, sauota’a ra huetaiya. Qalota na aỹem ñi’iỹa.

 »Huo’o so na’aq setaxaỹaxatac so l’aqtac so Jesús: ‹Qaq nagui qami’ sanema da dalaxaic namaxasoxonaxac, ’eeta’: Ñi ’oonolec qome da qoñiita ỹataqta ỹauotec ca lỹa. Qoñiita’am da shiitec da ỹataqta qami’ sauoteque› (Juan 13:34). Aỹem shenapec ra sauotaique ñaralaxat ra iataxac. Ra salleta’a ra ỹaguec ra salemata, nache ñatamenot ñi Dios ra aỹem itauan ra sa ishet ra salemata, ñi maye aỹem itauan. Aso ihua taq aỹem seqataqtegue ra lqataxac ye Efesios 4:26, 27: ‹Qataq de’eda qadalemataique sa ishit da imauec ca ’oonolec na’a’q. Sa ishit qome da qauauo’oi ca lligueuo so shiỹaxaua mayi lma’na›. Ñaỹamaxajñac ra setaxaỹaxanac ana la Biblia taq ra ñatamenacot ra nvireuo na pe’. ’Enauac re’era ỹo’ot ra ñitaunaxa taq ñiuonaxat.

»Nagui qaimetetac ra iataxac ra aỹem soxoraic. Añi ihua taq so ialqa aỹem ichoxoren taq aỹem ỹahuo’o naq’en. Nagui huo’o ñauochaxauapi taq ñauochaxaua ñi Dios. Aỹem ỹataqta samachiguiñe».

«So ñaq aỹem nsoqolec salectaigui na ñaqpi qauem ra aloic, ỹamanec na nasherec taq ra pe’ aỹem huetaiya na nqa’aic, taxaicqum —’enapec so Goin—. So’ogoxona taq semetac ana droga, ana marihuana taq ana éxtasis, ñishettaigui so salleco nqanaxateguet na ’ogoxonacte ala. Ra qaimeteetac aỹem ico’ ra laataxanaxaic qaq aỹem ñi’iỹaqaic.

»Huo’o so na’aq aỹem qaỹachaxana ana la Biblia ’enapec: ‹Ỹalqolec, sa ishet ra acouai na iaqataxaco [...] cha’aye lta’a­raic ra achaalataxac taq machiguiñe ra ’am sanem› (Proverbios 3:1, 2 NM). Taq’en huo’o so lỹa aỹem qaỹachaxana: ‹Qaq ỹoqo’oyi qami’ ñauochaxa’u ỹaqaỹa’t, ’eda da qomi’ qaỹachaxanapecoto. Ỹoqo’oyi sa ishit qome da huo’o ca ishipaxanaqchit da qad’oquiaxac qataq dam saq cha’a qanachaalataxac ’enauac nam ishit da deshipaxanaqtaxan. Qataq ỹataqta ñipogoxoinaqpegue’ qome da qomi’ qui’itte’, souaxat da  souaqtaigui da shi’iỹaxa ñi Dios› (2 Corintios 7:1). Iyaxa ra queta ra tateec ra nachaalataxac taq machiguiñe nache salat ana droga taq sa ishet ra salexoigui na ñaqpi qauem aloic nache so’ot ra huotaique ñi Dios ra salaxaguet.

»Mashe diecisiete vi’iye ra sa ishet nagui ra shi’iguen ana droga. Nagui samaqchiguiñi cha’aye aỹem ño’oita taq ñaỹamaqteete aso ihua taq so ialqa, huo’o na ỹataqta ñauochaxauapi taq’en qui’itta ra icueinnataxa. Ra so’oche sa ishet ra sotaiya’ na nqa’aic, ra so’oche nagui so’otalec ye imala’».

«Co’ollaq aỹem qauem ra ño’onataxac so ñaq aỹem nsoqolec —’enapec so Bambang—, sa ihuoenguet na ỹotta’a’t na shiỹaxauapi na saq ’ena’am so maye.

»Ivi’ so lcopa’ague aỹem ñimitaique ñi Dios, nache selalec ra huo’o so naponaxaqui qaỹapaxagueteguec ana la Biblia. Sa’alateguec ra huo’o na ỹotta’a’t shiỹaxauapi na ñiquiỹatega iqui’itaq aỹem, taq’en saq ’ena’at na mayepi qaq machiguiñe. Nache saỹateteguet so texto ’enapec: ‹Ñi Dios ỹoqta ’eesa da sa ishit da lca’atagui ’ena­uac na shiỹaxauasat. Chaqdata da ñimayi ỹataqta ỹaỹamaxadeeta ca camachicague’t nam ỹotta’a’t shiỹaxauapi da huo’otaq ỹataqta ñi’iỹa ñimayi qataq i’ot ca ỹaỹamaqchiguiñi› (Hechos 10:34, 35).

»Nagui sa ishet ra huo’o ca ñiquiỹatega. Co’ollaq na ñiquiỹategapi nagui ñauochaxaua na mayepi. Ana la Biblia aỹem ỹapaxaguenec ra sichoxoren ca iỹa».

«So ñaq aỹem nsoqolec tres ra aỹem qaiqoñec: dos ra ỹasouaxashet ra seqachetac taq ra saseren ra saro’ot so shiỹaxaua —’enac so Garoga—. Co’ollaq huo’o so laataxac na’a sotaña, ra nhuaxatega so shiỹaxauapi nache aỹem salectaigui so yiloxoicpi, qalota so shiỹaxauapi salauat. So ime so laataxac, na cachaxaicpi taq na laataxanaxaicpi aỹem ỹanem ra samaqsoxon. Ra huo’o na saigue huo’o soua aỹem ilotegue­to. Co’ollaq aỹem yiloxoic taq aỹem qañiitega.

»Qaq huo’o so na’aq setaxaỹaxatac so texto ana la Biblia: ‹Ca huo’o da lsoxoyic ỹataqta nque’ejnaxaic, qataq huotaxanaqtaqaic, qaq sa ishit da quiỹaxanaqtaqaic, qataq sa ishit da n’amqajnaxaic, huo’otaq  ñi’oxonnaxaic. Qataq sa ishit da hueta’a da l’aloxo ca lỹa, qataq sa ishit da nmitta’a ca maichi laỹamaxa. Qataq sa ishit da lemataqaic, qataq sa ishit da sa ỹapalaxata’a ca qai’otec› (1 Corintios 13:4, 5). So texto aỹem iviroto. Nache ivira’a ra saỹa ra ñeqochen, queta ra ñapaxagueetexa ana la Biblia taq so’ot na lqataxac.

»Nagui aỹem sa ishet ra qauem ra ñonataxac. Nagui no’on ra nmejnaguec na shiỹaxauapi cha’aye sapaxaguenataxateguec ana la Biblia, ra ñachaalataxac huo’o ra naigui».

Ra nachaalataxac ’enauac so shiỹaxaua’ semetenactac qaỹachaxanapec «da l’aqtac ñi Dios ỹataqta nca’altauec, qataq huo’o da l’añaxac» (Hebreos 4:12). Ra lqataxac sa ishet ra qapatta, ỹaỹamaqchiguiñe taq ’am iañaxat.

¿Ishet ra ’am itauan ana la Biblia? Aja ­ishet ra ’am itauan ra huo’o ra quejnaxac. «’Enauaque naua ñiyigui’shi l’aqtaqa ñi Dios, namayi ỹilyiñi naq’en co’ollaxa so l’aqtaxanaxanecpi. Qaq naamayi taiguet da qaỹapaxaguenataxanque, qataq da qaỹachaxanataxana ca lataxac, qataq da qaỹaỹamaxajñi ca nasouaxashit, qataq da qaỹachaxanataxana da llic da achaalataxac qui’itta, yaqto’ ca lamaxashic ñi Dios ỹataqta nalochiguiñi ’enauac na lhueneguesat, qataq taiguet da i’ot ca camachaqca n’onataxanaxac ỹaỹamaqchiguiñi» (2 Timoteo 3:16, 17).

¿Anauela ra ’am qaỹapaxaguenec ana la Biblia?