NAGUI na shiỹaxauapi ’enapec huo’o ra lpi’iỹaxac. Qaq so Jesús ’enapec ra saqalama nam huo’o ra lpi’iỹaxac ’eesa, ’eeta’: «Ñi lasom qataq so nqa’aic mayi taỹa’a ca nleuaqa’, somayi ỹataqta qalotegue, qataq qaica ca lqalaic. Qaq ỹataqta qalota nam quetague’ somayi. Qaq ñim lasom qataq so nqa’aic mayi taỹa’a da nca’alaxa, qalaq ỹataqta qapi’olec qataq sa lca’ague. Qaq ỹataqta saq ’amaqtaq nam ỹanata» (Mateo 7:13, 14).

¿Ca ’eetec ra ishet ra qaỹaỹaten ra huo’o ca npi’iỹaxac ’eesa? «Qalaxayi qami’ ishit da qauauattoñi nam i’otpi [...]. Qaq ’enauac anam qo’ipaqpi mayi no’on, ­anamayi ỹataqta no’on da alaỹaxac. Qataq anam qo’ipaqpi mayi qauem, anamayi qauem da alaỹaxac», ’enac so Jesús (Mateo 7:16, 17). Qone’ na npi’iỹaxac ’eesa huo’o ra «no’on da alaỹaxac», ra lataxac ca shiỹaxaua ram navela ñi Dios. ¿Négue’t ca no’on alaỹaxac?

Na pi’iỹaxaicpi ’eesa huo’o ra l’añaxataxac ra ỹio’oxoren ñi Dios taq ra itauan ca lỹa. So Jesús ’enapec: «Chaqdata da ca nshitaique da ’amaqtaqaic da qoñiita, qalaq camayi nachica ca huapegue’ na laỹipi» (Marcos 10:43). Nache ’eetec, ca pi’iỹaxaic ra ichoxoren ca lỹa ra hueta’a ye lma’ taq ra machaqca ca netaña. Ỹataqta ntela’a aca lhua, ra sa ishet napaqteguelec taq iqochi’ỹa ra ỹauo’o ra lhuenaxanaxa. Ana la Biblia ’enapec: «Qataq qami’ ỹallippi mayi mashi qauadoñi, ỹataqta qauauochiic aca qadhuai. Qataq sa ishit da sa qauchiyiỹapec acamayi» (Colosenses 3:19). Taq ’eeta’: «Qami’ ỹallippi mayi mashi qauadoñi. Ñi ’oonolec ỹataqta naỹajnaxanaqchin da ilo’ogue da lhuaỹaxac, qataq sa ishit da ỹi’inai’, cha’ayi ỹaỹaten da acamayi saqalligueme da l’añaxac, qalaxayi nataq’en nhuanau’a da nca’alaxa mayi chigoqchigui da lqouagaxanaqtaic ñi Dios da qami’ ỹanema. Qaq ’eda qome da qoñiitec, yaqto’ da qanatamnaxaqui saqca ca nqanaxat» (1 Pedro 3:7).

Qo’oye acam ’alo pi’iỹaxai ’eesa taqa’en «ỹataqta huo’o naq ’enec naq’en ca lhua» (Efesios 5:33). Taqa’en qaỹauotaique acam ’alo nhua «ishit da ỹauotec ca lhua qataq na llalaqpi» (Tito 2:4). Ca nhua’t pi’iỹaxaiqa ’eesa huo’o ye na’aq qara’ac ra rataỹagueta na llaqolqa ra ỹapaxaguenec na nqataxacpi na huetalec ana la Biblia. Ra lataxac na mayepi sa ishet ra napacalec ca lỹa taq ỹo’ot ra lauoche na lauo’l’ecpi ye maiche lma’, ye l’onataxanqa taq ra huo’o ca hueta’aguet. Qa’ategue ra lqataxac ana la Biblia: «Qataq ỹataqta ipacapega ca lỹa, qataq ñi ’oonolec sa ishit da saq huo’o naq’en ca ’enec ca lỹa» (Romanos 12:10).

Na l’onataxanaxanecpi ñi Dios ỹalaxaguet ne’ena namaxasoxonaxac: «Sa ishit da ’auaconguet aca chochi ’anshiitenaqte» (Éxodo 23:8). Sa ishet ra nmitaique ra ndotec ra qaitauatac ca maye, taqa’en ra ilotaique ra itauan ca lỹa taq ca huo’o ra lhuenaxanaxa. Na mayepi ỹalaxaguet na nqataxac: «Qataq sa ishit qome da qaucouai’ai da qau’ochi ca ỹaỹamaqchiguiñi, qataq da qautauañiic ca qadỹai cam qami’ hueto’oto, cha’ayi de’eda nachitaqtaxanaxac, nachida dam ỹataqta ỹaỹamaxadeeta ñi Dios» (Hebreos 13:16). Na mayepi maiche ỹaỹateetac ra ipacchigui ra ’enapec so Jesús: «Ỹataqta machiguiñi ca shiỹaxaua qom dachitaqtaxan, qaq saq ’en’am cam chochi qaỹachit» (Hechos 20:35).

Ca pi’iỹaxaic nasapatta ra ỹalaxaguet na lqataxac ñi Dios, ram l’aqtac na maye «nam lamaxasoxonaxacpi sa ishit da qapa’atta» (1 Juan 5:3). Ỹaỹateetac ra «lapaxaguenataxanaxaco ñi qadataxala’ ỹataqta  ỹaỹamaqchiyiñi», «na lqataxacpi ñi qadataxala’ ỹataqta no’oitegue, cha’ayi i’ot da ntonaxac aca nquiyaqte» taq «na lamaxasoxonacpi ñi qadataxala’ ỹataqta qui’itta, qataq ỹataqta nauaachiyiñi naq’en naua n’ai’te» (Salmo 19:7, 8).

Nam pi’iỹaxaicpi ’eesa sa ishet ra lca’aegui ca shiỹaxaua. Sa i’amaqten ra lca’agui cam roqshe l’ec qo’ qom l’ec ra ’enapec lta’araic ca maye. Taq sa ishet ra lca’agui ca sallaxanec qo’ choxorac. N’añaxat na mayepi ra i’enaxat ñi Dios, ñi maye «ỹoqta ’eesa da sa ishit da lca’atagui ’enauac na shiỹaxauasat. Chaqdata da ñimayi ỹataqta ỹaỹamaxadeeta ca camachicague’t nam ỹotta’a’t shiỹaxauapi da huo’otaq ỹataqta ñi’iỹa ñimayi qataq i’ot ca ỹaỹamaqchiguiñi» (Hechos 10:34, 35).

Na pi’iỹaxaic ’eesa iauoqtaique «da ỹataqta qaica ca da ’enauac da qoyiquiaxac» (Hebreos 13:18). Sa ishet ra i’amaqten ra ia’axateguec ca lỹa taq ra ỹasaqtapeguelec na qauem l’aqtac ca lỹa. So salmista David ia’axatec ca ’eetec ra n’onataxac ca shiỹaxaua ra ỹo’ot ca ỹaỹamaxareeta ñi Dios: «sa ishit da ỹasaqtapeguelec ca qauem l’aqtac ca lỹa; qataq sa ishit da huo’o ca i’otec qauem ca nauochaxaua lỹa» (Salmo 15:3).

Nam pi’iỹaxaicpi ’eesa i’amaqten ’ena­uac na ntalec ana la Biblia. I’amaqten ra «’enauaque naua ñiyigui’shi l’aqtaqa ñi Dios, namayi ỹilyiñi naq’en co’ollaxa so l’aqtaxanaxanecpi. Qaq naamayi taiguet da qaỹapaxaguenataxanque, qataq da qaỹachaxanataxana ca lataxac, qataq da qaỹaỹamaxajñi ca nasouaxashit, qataq da qaỹachaxanataxana da llic da achaalataxac qui’itta» (2 Timoteo 3:16). Cam lataxac ca maye ra huo’o na rataỹaguet nache ỹachaxanapec «da naỹajnec mayi chigoqo’ot ñi Dios» nache «camayi hua’auñi da qui’itta da nachaalataxac. Ime, qataq nhualaxaunaxaic, soxodaic, n’axaỹaxanguet ca lỹa, choxonnataxanaxaic, qataq i’ot ca ỹaỹamaqchiguiñi» (Santiago 3:17). Sa ishet ra ỹaconguet na espiritismo, na nqolacpi taq na ’onataguec ñi Dios nquiỹa (1 Juan 5:21).

So Moisés ’enapec: «Ỹataqta ’auauotec ñi’adataxala’ mayi ’anatamnaxala’, ỹataqta imauec ’anqa’en da ’adquiyaqteỹaxac, ’anachaalataxac, qataq ’enauac da ’an’añaxataxac» (Deuteronomio 6:5). Na pi’iỹaxaicpi ỹachaxanapec re’era lta’araic lauotaxanaqtaic ñi Dios. Sa ishet ra napaqteguelec ra l’enaxat ñi maye, Jehová, taq «nqouagaxaueetapega da l’enaxat so qadataxala’» qalaq re’era iyiatac ca lpi’iỹaxac (Romanos 10:13). Nam l’onataxanaxanecpi ñi Dios taqa’en ỹalaxaguet re’era namaxasoxonaxac: «’Auauotec ca ’adỹa, ’eeta’am da maichi ’anauojla’t» (Levítico 19:18). Sa ishet ram qomoxonaqchaqaic taq n’añaxat «da qaica ca da qanqashiñi ’enauac na shiỹaxauapi» (Romanos 12:18). Nache ’ena’am ra ico’ «namayipi ­nlaxajñi na lainecpi da ỹauo’o lashiugaxanaqte, qataq ana lataquiaxaipi ỹauo’o da lqataxanaqte da qanqat ana ala ana uvas» (Miqueas 4:3). Ỹoqo’oye na mayepi «ỹauotec ca lỹa», nache huo’o ra ntonaxac na mayepi nqaỹañecpi chigoqo’ot ’enauac ana ỹotta’a’t a’lhua (Juan 13:35). ¿Ishet ra maiche auauattonaxan négue’t ne’ena shiỹaxauapi?