«CAM ỹaỹamaxadeeta ñi Dios, ca mayi da nachaalataxac ỹachigoxotchigui da lpi’iỹaxac», ’enapec ana la Biblia (Romanos 1:17). Ne’ena n’aqtac huetalec na’a ’am ­ishet ra aualectauo taqa’en. ¿Négue’t naigui ne’ena?

So ime so l’onataxanaxac ne’ena a’lhua so Jesús, som Mesías, nache taỹasheguem na piguem ra hueto’ot na laỹi’ ñi Dios. Qaq co’ollaq soua ndiscipulo qailota’a so maye ra «naỹoxotchiguem da qaỹaueegue da piguem. [...] Huaña, nachi sa ishit da qaila’a» (Hechos 1:9). Na piguem, ñi Dios ỹanem so ’enec taq lca’au’a ra Nta’a so maye. Qome mashe saqaỹa, so Jesús ra ltaxa «nactaigui ’enauac na lamaxashic piguem l’ecpi, nachi nso’oongui aca nso’onaxaqui mayi ỹi’oxodaq da nta’a. Nachi ’enauac nam ỹotta’a’t shiỹaxauapi qalaponeu’a namayi, nachi namayi iỹodacachi qome na shiỹaxauapi da ’eeta’am ca ilotague’ ana qagueta da iỹotauga ana qagueta qataq ana quetaqpi» (Mateo 25:31, 32). ¿Qaq lagui ra ipacchigui na’a?

Ana la Biblia mashe ia’axat ra huo’o que’eca na’axa’te na quejnaxacpi ana a’lhua, qalaq re’era quejnaxacpi ỹachaxanapec ra sa qaỹapeque ye laloqo’ so Mesías ra nmit na shiỹaxauapi. Ỹoqo’oye so Jesús ’enapec: «Ca qompi delogui’ qome ca laỹi qompi, qataq ca nta’a maichi delogui’ ca lỹa nta’a. Qataq huo’o qome ca nacholaxanaxa naua pa’aiguelo naua laỹil ana ’alhua qataq ca nqouaxa. Qataq huo’oi qome naua nalolaxaco naua ’ale’u. [...] Qataq huo’o ca qaila’a qaica ca ’en’am da lchic» (Lucas 21:7, 10, 11).

Nagui mashe yoqta ra ipacchigui re’era l’aqtac ’eesa so Jesús. So maye nvi’ ra nlaxajñe na yiloxoicpi. Nache ca pa’ateec, taqa’en so Satanás qanlaxajñe nache ’enauac ana a’lhua qaỹo’ot mataqa’. Na shiỹaxauapi qome machiguiñe taqa’en sa ishet ra huo’o ca reloqtega, na shiguiỹacpi taqa’en soxoraicpi. «Huaña, qaq ca dequi’iỹapec lauodeua ca qagueta, qataq ca quiyoc lauatañi’ ca quetaq llalec, qataq ca huaca llalec lqui’axaua ca sauaxaic, qataq catai’ nogotolec ilotagueto caamayi. Qaq sa ishit da huo’o ca i’ot ca sa ỹaỹamaxañi, qataq da i’otec ca qauem ca lỹa» (Isaías 11:6, 9). Qaica ca ’enapec: Aỹem sa no’on. Qataq «Huaña qome, nachi na tagoxoicpi nauaañi, qataq na da’añaigui na lqaic hua’aqa» (Isaías 33:24; 35:5). Qaq ca ileu qancaalaxateec. Ñi Jehová «iỹodeec naua lachi’ ’enauac na shiỹaxauapi» taq «huaña, nachi sa ishit da ileu ca shiỹaxaua, qataq sa ishit da noỹiitac, huo’otaq da n’alaqtapiguiñi, huo’otaq da huo’o da nqui’ic» (Isaías 25:8; Apocalipsis 21:4). Nache ipacchigui ra ’eetapeguec ñi Dios huetalec ana a’lhua. ¡Ma ’onaxaic que’eca qaỹaxataguet!

Qaq ¿Cam ’eetec ra lataxac ca shiỹaxaua ñi Dios ỹanem ca Nmataqa’? Que’eca maye huo’o ra lpi’iỹaxac ’eesa.

Antoueta’ac ne’ena ra ’am auahuotaique ra huo’o ra arpi’iỹaxac huetaigui ra naỹajnaxanaxac ’eesa na L’aqtac ñi Dios. Ỹoqo’oye sa ishet ra axañe ra anapaxaguena ñi Dios taq so Jesús.

Ra npi’iỹaxac ’eesa yoqta ỹachaxanapec ra au’o’ot ye’e no’on n’onataguec. Ana la Biblia ’enapec: «Qaq ỹoqo’oyi ca npi’iỹaxac, da saqca ca ỹaỹamaqchiguiñi l’onataxanaxac, nachi ’ico’ leuaxaic» (Santiago 2:26). Ra auachaxanapec ra au’o’ot ca no’on, nache yoqta ra auenaxatchigui  lataxac ñi Dios: ra l’añaxac, ra ỹaỹamaqchiguiñisat, laỹajnaxanaxac taq lauotaxanaqtaic. Anañaxat ra avinaxat ra lataxac ñi Dios.

Ra maiche au’o’ot ye npi’iỹaxac ’eesa, nache maiche auaconguet ca nqouagaxanaqtaic. Que’eca lasom taỹa ca nachaalataxac machiguiñi nagui taq tateec.