ANA la Biblia ỹachaxanapec ra lataxac ñi Dios, nache ishet ra qaỹauatton ñi maye. Qaỹaloqnaxana, ia’axat yeua cuatro ra ỹataqteguet lataxac ñi maye: n’añaxac, ỹaỹamaqchiguiñisat, naỹajnec taq nauotaxanaqtaic. Semetenac na ’oonatac na maye.

Ñi Jehová ’enapega so Abrahán: «Aỹim mayi nachaỹim so’otapecna qaica ca saqalanapec» (Génesis 17:1). Ra l’añaxac ñi Dios qaica ca ’ena’am, taq qaica ca loga’t. Ñi maye rogoxona re’era l’añaxac yaqto ỹo’ot ’enauacna.

Ñi Dios sa ishet ra saỹaỹamaqchiguiñisat ra rogoxona ca ’enec ñi maye. Naloqteeta ra huo’o ỹaỹamaqchiguiñisat, laỹajnec taq lauotaxanaqtaic.

Ñi Jehová rogoxona ra l’añaxac ra ntela’a na l’onataxanaxanecpi ñi maye. Ñi Dios «ntela’a cam i’ot ca ỹaỹamaqchiguiñi, qataq hua’axaỹa da nqouagaxaunaxac» (1 Pedro 3:12). Ñi Dios ’am ntela’a nache ¿saq ’onaxaico’ ra ñiquigoqoot ñi maye?

Ñi Jehová lauotaxanaqtaic ra ỹaỹamaqchiguiñi (Salmo 37:28). Ỹo’ot na no’on taq ỹaỹamaqchiguiñe, naloqteeta ra ’eetapeguec ñi maye.

Ñi Dios nqui’ia ca ỹo’otaq na saỹaỹamaqchiguiñisat, ỹoqo’oye ’enapec: «Sa ishit da ’auaconguet aca chochi ’anshiitenaqte, cha’ayi ana chochi nshiitenaxanaqte ishit da ’ico’ ỹaqanamaqchit ca shiỹaxaua» (Éxodo 23:8). Ñi maye saỹaỹamaxaren ra huo’o ñe qaỹiena taq itauan ra ỹañaqchet ra huo’o na ileu ñi lhua taq ñi nogotolec ra qaicaua ca lta’al (Éxodo 22:22). Ñi maye sa ishet ra lca’atapigui na shiỹaxauapi. Ñi Dios «sa ishit da lca’atagui ’enauac na shiỹaxauasat. Chaqdata da ñimayi ỹataqta ỹaỹamaxadeeta ca camachicague’t nam ỹotta’a’t shiỹaxauapi da huo’otaq ỹataqta ñi’iỹa ñimayi qataq i’ot ca ỹaỹamaqchiguiñi» (Hechos 10:34, 35).

Na ỹaỹamaqchiguiñisat ñi Jehová naloqteeta. Ñi maye ihuaxan ra huo’o ca ỹo’otaq ra qauem taq sa ishet ra ntoxotaq. «Ñi qadataxala’ ỹataqta no’on qataq huotaxanaqtaqaic, ñimayi hualaxauaic qataq ỹataqta soxodaic. Ñimayi sa ishit da nachi ’eetai’ da qomi’ ividaxattacoto, qataq sa ishit da chochaq tateec da layiloxo; qataq sa ishit da huo’otaq ỹagueec naq’en ca qanhuaxanaguec souaxat nam qauemsat qataq na qayi’itaxaloxosat» (Salmo 103:8-10). Ñi Dios saq icouai ra l’onataxanaxac na l’onataxanaxanec ñi maye. Ra ñi maye ỹaỹamaqchiguiñi, ¿sa isheto’ ra sepiaqa’a ra ñiquigoqoot ñi maye?

Ñi Jehová lalamaxat ra naỹajnaxanaxac. «¡Ỹataqta lta’adaxanec da lqouagaxanaqtaic ñi Dios, qataq da laỹajnec qataq  da lauattonaxanaxac!» (Romanos 11:33). Ra laỹajnaxanaxac ñi maye sa ishet ra huo’o ca ’ena’am taq qaica ca loga’t.

’Enauac na l’onatacpi ñi Dios ỹachaxanapec ra laỹajnaxanaxac. So salmistanasaxauec: «¡Ỹataqta qalota na ’au’otpi, ’am ỹataxala’! Qaq ’enauac na ’ad’onatacpi ỹataqta ỹaỹamaqchiguiñi, cha’ayi ’am ỹajnaxanaxaic» (Salmo 104:24).

Ana la Biblia ia’axat ra lataxac ñi maye. So nta’a David ’enapec: «Da lamaxasoxonaxac ñi qadataxala’ ỹataqta sa nqochin, cha’ayi damayi i’ot da ỹajnaxanaxaic ca shiỹaxaua qaica ca ỹaỹaten» (Salmo 19:7). Ishet ra saỹatenaq ra laỹajnaxanaxac ñi Dios, qaq ¿saqonaxaguet ra maye?

Ra lta’araic lataxac ñi Jehová, ra lauotaxanaqtaic ñi maye; ỹoqo’oye ana la Biblia ’enapec «ñimayi huotaxanaqtaqaic» (1 Juan 4:8). ’Enauac ra huo’o na ỹo’ot ñi maye ỹauota’a ra lauotaxanaqtaic.

 Ñi Dios ỹotta’a’t ra qomi’ ỹachaxana ra lauotaxanaqtaic. Ra qomi’ ỹanem na ’onaxaic, «da qomi’ namaxalo na auot, qataq ’onaxaic naq’en na qodanguishic, qataq sa qoue naq’en na qonoq, da yaqto’ samaqchiguiñi» (Hechos 14:17). Ra ỹoqta ’eesa «’enauac na ỹaỹamaqchiguiñi qataq nalochiguiñi mayi qomi’ qoỹanema, namayi chigaqshiguem, chigoqtot ñi Dios ñim l’onata ana ishit da icoỹadelecna» (Santiago 1:17). Qanacheq ra lachetaqtaxanaxac ñi Dios ana la Biblia ia’axat ra ’eesa ra lataxac ñi maye taq qomi’ ỹapaxaguenque ra lauotaxanaqtaic lqataxac. Qo’oye so Jesús ’enapec: «Dam ’ad’aqtac mayi ỹataqta ’eesa» (Juan 17:17).

Ñi Dios ishet ra qomi’ itauan ra huo’o ca nquejnaxac. Nache «’enauac na qauennachiitapega ỹataqta qaumachiỹo’ot ñi Dios, cha’ayi ñimayi ỹataqta qami’ ỹoqocha’alo» (1 Pedro 5:7). Ñi maye ỹapalaxat ra qarasouaxashet. «Ñimayi sa da’angui qataq choxonnataxanaxaic, hua­laxauaic qataq ỹataqta soxodaic» (Joel 2:13). Taq’en qomi’ ỹanema ra tateec chaalataxac. «Nachi ñimayi iỹodeec ’enauaque naua lachi’ namayipi. Huaña, nachi sa ishit da ileu ca shiỹaxaua, qataq sa ishit da noỹiitac, huo’otaq da n’alaqtapiguiñi, huo’otaq da huo’o da nqui’ic» (Apocalipsis 21:4). Ñi Dios qomi’ ỹauoteque. Qaq, ¿qomi’ sauoqo’o ñi Dios?

Ñi Dios huotaique ra sauattonac. Ỹoqo’oye ra l’aqtac ’enapec: «Qanquiquiỹot ñi Dios, qaq ñimayi sa qami’ iỹotapigui» (Santiago 4:8). «So Abraham qailonec da nasaguiyaxaua ñi Dios» (Santiago 2:23). Ñi Dios taq’en huotaique ra qomi’ nasaguiyaxaua ñi maye.

Qomi’ ra ñapaxaguenaxa ñi Dios nache ñiquigoqoot ñi maye taq qomi’ machiguiñe. «Ỹataqta machiguiñi ca shiỹaxaua [...] da ỹataqta ỹauotec na lqataxacpi ñi qadataxala’, nachi napaxagueetega yi na’a’q qataq yi pe» (Salmo 1:1, 2). Ỹoqo’oye nache queta ra ñapaxaguenactega ana la Biblia, secuennataxac ra lataxac taq ra ’eetapeguec ñi Dios, taq sachaxanac ra qarauotaxanaqtaic ra so’otaq ’enauac na ñapaxaguenactega. «Da qaỹauotec ñi Dios, damayi naigui da qaỹalaxaguet nam lamaxasoxonaxacpi ñimayi. Qaq nam lamaxasoxonaxacpi sa ishit da qapa’atta» (1 Juan 5:3). Shenaxatac ca natamnaxac so salmista maye ’eeta’: «Ña ’anamaq qome ca ’ad’edaxa qataq ca ’ad’aqtac ’eesa, yaqto’ naamayi aỹim ỹachaxanalo ca nqa’aic» (Salmo 43:3). Nagui saỹatenaqtac ra ñi Dios «sa ishit da iỹotaique naq’en ’enauac da shinaqta» (Hechos 17:27).