CO’OLLOXOCHE saxanaxa qaỹo’ot ana a’lhua, ñi Jehová l’onatac na angelpi lma’ na piguem. Huo’o so ’onolec nqopita ra qaỹi’oxoren qaq re’era lli’oxoyec lalamaxat ñi Dios. Nache so maye ñigui Satanás, naigui ra «Npa’axaguenaxaic». ¿Négue’t ca ỹo’ot so maye ra qaỹamata’ac npa’axaguenaxaic?

So Satanás rogoxona so araxanac, nache nloqtenec aso Eva, ra huotaique aso maye ra sa qaỹalaxaguet ñi Dios, nache chec aso ’epaq ala. So maye ratenataxan ra ’enapec aso ’epaq ala netaigui ra no’on. Taq so maye rashinaxan ra ’enapec ñi Jehová tenataxanaxaic ’enapec so maye: «Ñi i’otapecna ỹaỹateeta da huo’otaq qami’ qolliqui ana ala ada’ada qo’ipaq, nachi huo’o da qadauattonaxanaxaqui da qauauattoñi ca no’on qataq ca qauem, qaq nachi qoñiita’am ñimayi» (Génesis 3:5). Aso Eva i’amaqten ra l’aqtac so Satanás. Nache saỹalaxaguet taq ỹo’ot so Adán ra sa ỹalaxaguet ñi Dios. Nache co’ollaxa, so Satanás ivira’a ra npa’axaguenaxaua na pi’iỹaxaicpi nache queta ra ỹashitalec nagui na shiỹaxauapi. ¿Ca ’eetec ra lashinaxanaxac so maye?

So Satanás co’ollaq rogoxona ram qaỹoxoretac na machaqca taq ram ỹamaqteetac ’onataguec na shiỹaxauapi nshepaxanaxaqchet ra lpi’iỹaxac som israelitapi. So Jesús ’enapega som nta’alpi n’amqajnataxanaxaicpi ra ỹo’otaq so mayepi ra lli’oxonataxanaxac qaica ca naigui, cha’aye ra lapaxaguenataxanaxac «maichi lqataxaco na shiỹaxauapi» (Mateo 15:9). Qaq co’ollaq so israelitapi sanashenguet som Mesías, ñim Dios sanashenguet taqa’en so mayepi. Qo’oye, so Jesús ’enapec: «Qami’ shinapegalo da de’eda l’onataxanaxac ñi Dios da ilo’ogue ’enauacna, damayi qami’ qanqateeguesopa qome. Nachi damayi qoỹami’ ca shiỹaxauapi mayi ỹoqta ipacchigui cam alaỹaxac mayi taiguet de’eda l’onataxanaxac» (Mateo 21:43). Na yoqta n’discipulopi so Jesús nachena qalca’aua ra lauo’ ñi Dios.

So Satanás nañaxajlec ra nshepaxanaxaqchet na n’discipulopi so Jesús. Qaq ¿ishet so maye? So Jesús ia’axata’a négue’t ca ’eetec qome ra’a nache ’eeta’: huo’o so ỹale ỹaalec so trigo so no’on a’lhua. Nache huo’o so npa’axaguenaxaic so lalamaxat so nanguishec. Ỹaañi aso huoue ra ỹanaigui so maye. Qaq qo’oye no’on ra ña qauauaqaỹa’a ra ñaxatec naua maye, ca laloqo’ ra qanqat so trigo qailaponat taq qaỹaỹamaxat ñim laponaxanaxaqui som aco’. Qalaxaye qanlaxajñe aso huoue.

So Jesús ỹaqtaxanem soua ndiscipulo ca naigui re’era l’aqtac. So maye nacheso so aco’. «Qaq som nanaxanqa’, qalaq nachana anam sonaqtalec ’alhua. Qaq aso nanguishi mayi ỹataqta no’on, qalaq nachina nam shiỹaxauapi mayi huetaigui da l’onataxanaxac ñi Dios. Qaq aso huoue mayi ’eeta’am na trigo, qalaq nachina nam quetague’ so shiỹaxaua lma’na. Qaq so depa’aguenataxaatac mayi ỹaañi aso huoue, qalaq nachiso so shiỹaxaua lma’na. Qaq da qanqat na ala so trigo, qalaq nachica cam loga’t ana ’alhua. Qaq som daqataxaatacpi, qalaq nachina na namaxashicpi piguem l’ecpi» (Mateo 13:38, 39). So Jesús ’enapec, nam n’discipulopi nachena na ico’ trigo. Nache, so Satanás ỹaalec so sa ishet ra ’eesa ra ỹalecneguet som ỹataqteguet ’eesa ndiscipulo so Jesús. So maye l’ena ra ia’axataguet re’era, se’esoua vi’iye so ileu so maye, so saq ’eesa n’discipulopi rapaxaguenataxanec, ra saq ’eesa qaỹaloqnaxana na Trinidad (soua maye naua tres qoinapec ra ỹalecta’at na maye nacheñe ñim Dios). Taqa’en, rapaxaguenataxanec ra qanatamenot qamachaqca taq ỹaleuoigui nam política. Ram lataxac ivita’a, ra ỹo’ot saqalama na shiỹaxauapi ra sa ishet ra queta ra lpi’iỹaxac ra lapaxaguenataxanaxac so Jesús.

Qaq nache ’eetec co’ollaq, so Jesús mashe ia’axattaguet, ra qome qanalaraxat ra sa ỹaỹamaxañe. So n’angelpi ñi Dios lca’ateua ’enauac nam qaica ca lpi’iỹaxac ’eesa nache qanlaxajñe na mayepi. Qaq qome qaỹaỹateetac négue’t cam ỹoqta huo’o ca lpi’iỹaxac ỹataqta ’eesa. Taq qome ca pa’ateec, so Satanás, lta’araic npa’axaguenaxaua na npi’iỹaxac, taqa’en so maye qanlaxajñe. Nache rauegaxan na npi’iỹaxac ’eesa.

Qaq, ¿ca ’eetec ra ishet ra qaỹauatton ca shiỹaxaua ra ra lpi’iỹaxac ’eesa? Que’ecaua lỹa napaxaguenataxanaxac ishet ra semetenac nam qainataxateguelec.