—Ra qauloỹaʼa ca nogotolec —inat so Elia so lauoreʼu—, ¿sa ishetoʼ ra ʼenaʼam ra lashiguiaxac ca ltaʼal?

—¡Ajaʼ! —ỹasat so Gostavo—. Taqʼen iʼaqtac ra lataxac ra qoyale nache ʼenaʼam ra lataxac ara Maria.

—Nache ʼeetec. Qomiʼ taqʼen shenactaʼam ra lataxac ñi Qartaʼa Dios. Ra ñaloqtenac ra qarocguiaxac taq na lʼonatacpi ñi Dios, nache saỹajnacta cam ʼeetec ra ỹoqta lataxac ñi maye.

—¡Ỹataqta sa ʼonaxaiqolec! Huanna ra ñaloqten raʼa.

—Semetenac aye la Biblia, ye Romanos 1:20, ca ʼeetec ra iaʼaxat yeʼe, ʼeetaʼ: “Chaʼayi dam saq chaʼa lataxac ñi Dios ishit da chigoqchigui nam lʼonatacpi ñimayi da ishit da qailaʼa. Qaq ishit da ỹataqta qaỹauattoota da ñimayi nachiñi ñi imattalecna qataq da ñimayi nachi ʼeetaiʼ da ʼañaxaic, chigoqchiguiña coʼollaq ñimayi iʼot ana ʼalhua”. Nache so Gostavo renataxan ca ʼeetec na lʼonatacpi ñi Dios ra ỹachaxan ra lataxac ñi maye.

—Ajaʼ —lʼaqtac so Elia—, analoqten ra lsoxoyic ca ntaʼa ỹamiʼ ca maiche llalacpi. Ca ỹoqta noʼon ntaʼa, ʼenaʼam ʼam, saxaỹet ra nhuogoctapeguelec ca maiche lalamaxatpi. Naiʼctaxa ra huoʼo ca llalec qauemaic, ca ltaʼal sa ishet sa ỹauotec taq itauan ¿Táenʼco ra ʼeetec raʼa? Chaʼaye ñi Dios ỹamiʼ na ntaʼalpi ra iỹauotec ca llalacpi, ʼenaʼam ñi maye qomiʼ ỹauoteque.

Naiʼctaxa na saỹauatton ñi maye, ñi Jehová ñaq ʼeetaʼ ra ỹamiʼ na lʼonatacpi. Ỹoqoʼoye aye la Biblia ʼenapec ye Mateo 5:45: “Yaqtoʼ ỹataqta qamiʼ llalqa ñim qadtaʼai mayi netaʼague da  piguem. Chaʼayi ñimayi icoỹadelec naqʼen añi nalaʼ ca qauemaic qataq ca soxodaic, qataq da namaq na auot, qalaq talec naqʼen cam noʼon da lataxac qataq ca qauem da lataxac”. ¿Sa ishet ra yoʼoqchigui qomiʼ itauan ra huoʼo añi nalaʼ qataq na auot? Chaʼaye ỹoʼot ra ñicaalactauec taq huoʼo na nallic. Nache naiʼctaxa ra sanaxam qoʼ sa ishet ra sanaxam ra qanachiquiaxac ñi maye, ñi Jehová ñaq ʼeeta ra qomiʼ ỹamiʼ na seuenactaque. Reʼera ỹachaxatac ñi Dios ra lauoche. Ana la Biblia sa ishet ra ndotec ra ỹachaxatac ñi Dios huoʼo ra lauotaxanaqtaic, ỹoqoʼoye ye 1 Juan 4:8 ra setaxaỹaxanac nache ñi Dios ỹoqta huotaxanaqtaqaic.

Ime nache so Elia ʼenapega so Gostavo ra naloqten ra lỹa lataxac na shiỹaxauapi: ra qaỹoʼot na ỹaỹamaqchiguiñisat. —ʼAm auauotec na aỹalqa, sa ishet ra alcaʼa ca ʼonolec aỹalec ra auoʼoʼtec ca ỹaỹamaqchiguiñi, chaʼaye yoʼoqchigui ra ʼam noʼon ntaʼa. ¿Nache ʼeetec? —lʼaqtac so Elia—. Taqʼen auapaxaguen ra ỹauoʼo naqʼen ca lỹa taq quegue naqʼen na arqataxacpi yaqto ivira qome ra shiỹaxaua noʼon lataxac. Chaʼaye ʼenauac na shiỹaxauapi huotaique ra qaỹahuoʼo ra lataxac, taq ca maiche lalamaxatpi. ¿Táenʼco ra ʼeetec reʼera? Chaʼaye souaxat ra sanactañe na lataxac ñi Ỹoʼotapecna.

So Elia ỹachaxanec so lauoreʼu na textopi aye la Biblia maye iaʼaxat ca ʼeetec ra lataxac ñi Jehová:

• “ʼEnauac qome na ỹottaʼaʼt na lʼaqtac ỹataqta ncosaxaden da ntootapiguiʼ, chaʼayi ỹaỹamaqchiguiñi da ʼadʼonataxanaxac da ʼauloʼogue nam ỹottaʼaʼt shiỹaxauapi” (Salmo 67:4).

• “Ñi qadataxalaʼ ỹataqta ỹauotec na noʼon da lataxac qataq ʼeesa” (Salmo 33:5).

 Ajaʼ, ñi maye qomiʼ ỹoʼot yaqto ishet naxa ra sheʼenaxatac ra lataxac, qaq sa ishet ra ỹataqta sheʼenaxataqchigui ra lataxac. Nache sauotaxac na ỹaỹamaqchiguiñisat chaʼaye ñi Jehová maye ỹoʼotapecna, ỹauotec na ỹaỹamaqchiguiñisat, taq iʼenaxatchichigui ra maiche lataxac (Génesis 1:27). Qalaq, raʼa sa ishet ra naigui ra icoʼ maiche qomiʼ chigoqtoto cam ỹaỹamaqchiguiñi qoʼ ca sa ỹaỹamaxañe. Ñi Qartaʼa Dios nacheñe ñi ỹoqta chigoqoʼot ca ỹaỹamaqchiguiñi nache huotaique na shiỹaxauapi ỹalaxaguet na ʼenapec ñi maye. Ra sa qaỹoʼot na lʼaqtac ñi maye nache yoʼoq na saỹaỹamaxanisat.

—Qalaq huoʼo ra lỹa qaỹaxattac maye noʼon taqʼen taxa ra qanaloqchiñi —lʼaqtac so Elia—. ¿Qauaỹajñi ra qalota nqataxacpi na aʼlhuapi maye huoʼo na ntaʼalpi, nache ʼenaʼam na nqataxacpi huetalec aye la Biblia coʼollaxa qoỹiʼiriñe? So Gostavo taq aso Maria iaʼalaq so huaʼaqtega.

—Saloqnaxanaxa —lʼaqtac so Elia—, huoʼo na aʼlhuapi saqaiuonguet ca ỹalauat ca lỹa, ra nqachaxac, nqachetapegueʼ aca sa lhua. Qalaq ana la Biblia mashe tres mil quinientos viʼiye coʼollaxa huetalec ra huoʼo ra nhuaxana­guec ca ỹoʼot na saỹaỹamaxanisat. Qomiʼ ỹataqta machiyiñe taq samaxasoqchiguiñe ra salaxasoxoguet na ỹaỹamaqchiguiñi na nqataxacpi ñi Jehová chaʼaye sachaxanaqtac ra sanactañe lataxac ñi maye.

Ime ra naxaỹaxatrega so Elia, so Gostavo taq aso Maria nache chetaʼague ra ỹaỹateʼn ñi Jehová  ra huotaxanaqtaqaic taq ỹaỹamaqchiguiñi ra lʼonataxanaxac. Soua maye ra naloqteetape ra nauotaxanaq­taic taq ra ỹaỹamaqchiguiñisat iuen ra ỹoʼot qataq ỹachaxan ca shiỹaxaua. Ỹoqoʼoye ỹauotrec so llalqa taq ỹoʼoteque ye ỹaỹamaqchiguiñi. Qalaq chetaʼague nagui ỹaỹateʼn ca naigui reʼera lcuennataxac soua maye, reʼera maiche lataxaco ñi Jehová Dios.

So Gostavo salaxaic ra nqopita ra ỹauatton na lataxac ñi Jehová, nagui ỹaỹaten ra ỹoʼoqchigui ʼeesa huoʼo ñi maye, ỹoqoʼoye huotaique iʼenaxat ra lataxac ñi Jehová ra ỹaqteec ra ỹauotec aso lhua taq so llalqa taq ỹoʼoteque ye ỹaỹamaqchiguiñe ca lỹa.

—¡Nache qonetec! —lʼaqtac so Elia—. Reʼera nache nateete­guet ra lapaxaguenataxanaxac aye la Biblia, maye huetalec ye nʼaqtaguec huotaique ra qamiʼ sachaxanalo. Ỹauachigui aso la Biblia nache itaxaỹaxanec ye nʼaqtac:

• “Qaq ỹoqoʼoyi qamiʼ cam noʼon mayi qanshiitaique da qamiʼ iʼoteque na shiỹaxauapi, nachica qome qauʼochiic ʼenauac namayipi” (Mateo 7:12).

So Elia lʼaqtac ra sa ishet ra ndotec ra huetoʼot ra lauotaxanaqtaic taq ra ỹoʼot na ỹaỹamaqchiguiñisat ñi Dios, taqʼen huoʼo na qalota laỹipi na lataxac ñi maye. So Gostavo taq aso Maria nache ʼenapega so Elia ra taqʼen ỹapaxaguenec ca lỹa lataxaco ñi Jehová.