So Gostavo huoʼo ra saq maguiñe. a Mashe lʼena coʼollaxa ra nhuogoctac ra ỹanata ca lʼonatac yaqto iquiaxan na llalacpi. Huotaique na llalacpi ra ilalec ca ỹoqta noʼon paxaguenaxac nache ivittaʼaguet qomeʼ ca ỹataqta noʼon nmariaxac. Qalaq ʼenaʼamsoʼ ra sanalouʼa ye ilotaique. Chochaq ndotec ra nalotauʼa ra saqca ra nache ishet ra ñaq roʼonataxaatac yaqto iquiaxan aso lhua qataq na llalacpi, taqaʼen ra ishet ra isheeten ñe lʼalec nʼỹec. Qalota ra maiche nnajlaʼt: “Ra huoʼo ca souaigui nache, ¿négueʼt ca iloʼogue na ỹalacpi?”.

Aso lhua, Maria, taqaʼen huoʼo ra saq maguiñe. Chaʼaye huoʼo ra nqotatagueʼ so lhua Gostavo. Aso maye huotaique so lhua itauan ra ỹaqchet so llalqa, nache ỹapaxaguenque ra ỹanataxanaxaica qataq noʼon ra lataxaco. Qalaq so ỹale saxaỹet ra nasamtauo chaʼaye ỹaguec ra lʼonataxanaxac nache huanna ra huoʼo ye lraqaʼ. Aso Maria huoʼo ra lachetataic, chaʼaye aso maye qataq so lhua ivittaʼa naxa ra nqotategaʼt, qalaq soua maye ỹaỹateete ye nʼonataguec nache ishet ra naʼaxat soua llalqa. Aso maye lʼaqtac: “Qaq ra sa noʼon na qoyalqa nache ¿huaʼague ca sachigoxotaqaʼague aca qorom ra sisheetenac ca natannaxanaxat qataq añe natannaxanaxaqui?”.

So Gostavo qataq aso Maria naloqteetac ra lataxac na lauoreuapi sa ishet ra ʼenaʼam coʼollaxa ra ʼenauac ntaunaʼt. Nagui na lauoreuapi qaica ca lraqaʼ ra itauan ca lỹa. Na lauoʼlʼecpi qataq na nauochaxauapi taqaʼen huoʼo ra maiche lhuogoxo. Nache ʼenaʼamsoʼ  ra qaica ca ỹataqta machiguiñe. So Gostavo recuennataxatac: “¡Ra iỹaxa ra ñaxaañe ra quejnaxac nache samaxasoqchiguiñe qataq qomiʼ machiguiñe!”. Naiʼctaxa ra nañaxatta’ape qalaq qaica ca ỹañoxoʼt.

Huoʼo so naʼaq, so Gostavo qataq aso Maria, nache nactaxatrapigui ra nquejnaxac.

Nache so Gostavo ʼenapecoʼ: —¿Sa alauela ra sanataxa ca nqaʼaic huoʼotaq lataxac ra ỹataqta qomiʼ machiguiñe qataq ra samaxasoqchiguiñe?

—¡Ajá nache ʼeetec! —ỹasat aso Maria—. Aỹem taqaʼen icouennataxa yeʼe, ra sanataxa queʼeca nqaʼaic huoʼotaq lataxac nache imeuec ra qanquejnaxac.

—Qalaq ¿cam ʼeetecoʼ ra sanataxa ye ỹottaʼaʼt na nʼamqajnataxanaxac qataq nam lataxacpi na lmariaxac na shiỹaxauapi? —renataxatac so Gostavo—. Sa sishetac ra ñimitaq ʼenauac ana mayepi. ʼEnauac ana mayepi iaʼaxat ra ishet ra ỹanata ra imeuec ra quejnaxac, qalaq ra ñaloqten nache sa ishet ra ỹataqta yoʼoqchigui ra imeuec ra nquejnaxac na shiỹaxauapi.

Aso Maria ỹaỹaten so Gostavo ra ʼeesa ye lmejnaxanaxac, qalaq aso maye ñaq ʼeetaʼ ra ilotaique ra qaitauaʼn ra nonaxaʼt ye lmariaxac. Nache ʼenaʼamsoʼ ra huetoʼot ra icoʼ ishet ra ỹanata cam nqaʼaic huoʼotaq ca lataxac.

ʼAm taqaʼen yoʼoqta ra qalota na arhuogoxo ʼenaʼam so Gostavo qataq aso Maria, chaʼaye négueʼt ca huoʼo ra saq maguiñe. ʼEnauac na shiỹaxauapi ilotaque ra ỹaʼamaqchiguiñe, sa ishet ra sa noʼon qataq ỹataqta machiguiñe ra netaigui ca maiche lalamaxatpi. Qalaq ʼenauac reʼera ʼenaʼamsoʼ ra qaỹoqta, huanna icoʼ ra qancaañe. ¿Ishetoʼ ra sanataxa ca nqaʼaic huoʼotaq ca lataxac ra ỹataqta qomiʼ machiguiñe qataq ra samaxasoqchiguiñe?