Ra qaỹapaxaguenec so Gostavo ỹataqta ỹoʼot ra salaxaic ra lʼaalaxa ra ỹaỹaten ra lataxac ñi Jehová, qalaq ñaq ʼeetaʼ ra huoʼo ye iqalaatac ra ivita ra naloqten. —Ñi Jehová ra ishet coʼollaxa ỹoʼot ʼenauacna qataq salaxaic ra añaxaic qataq soxoraic —renataxan so Gostavo—, ¿táenʼco qoneʼ ra qalota ra quejnaxac huetalec ana Aʼlhua? ¿Táenʼco ra qalota na aloic ra souaqaigui?

—Reʼera achimaxatega taqaʼen qalota na shiỹaxauapi ichimaxatega —lʼaqtacoʼ so Elia—. Ra ñaloqtenac naua lataxaco ñi Jehová nache saỹatenaq ra sa ishet coʼollaxa ra huotaique huaigui ra quejnaxac na llalacpi. Qalaxaye ra huotaique saỹatenaq cam ʼeetec coʼollaxa ra seviraqtaʼa neʼena aloiguesat huetalec ana Aʼlhua, nache huaʼauñe senataxanaxac yeʼe: ¿négueʼt ca ʼeetapeguec coʼollaxa ñi Dios ỹanem na huetalecpi ana aʼlhua? ¿Táenʼco ra sa ipacchigui ra ʼeetape­guec coʼollaxa ñi Dios?

So Elia nache itaxaỹaxanec so Gostavo ye versículo ỹachaxatac ra ntoonaguec ñi Jehová coʼollaxa imat ra ỹoʼot na huetalec ana aʼlhua.

• “Ñimayi ʼenauac na lʼonatacpi, nachi ilaʼa da ỹataqta ỹaỹamaqchiguiñi” (Génesis 1:31).

Qalaq so ỹataqta qalota ra nqopita ñi maye nam ỹottaʼaʼt lʼonatacpi nachiso soua huaʼauchiyiñe shiỹaxaʼu: So Adán qataq aso Eva. ʼEnaʼam na laỹipi lʼonatac ñi Jehová nache ỹoʼot ra nalochiyiñe, nache huotaique ra tatreec ra nachaalataxac neʼena aʼlhua. Ỹanalguete so ʼonaxaic nanaxanqaʼ lʼenaxat Edén,  taqaʼen ỹoʼot ra nalotaʼt na iuetraque yaqto ishet ra machiyiñe (Génesis 2:8, 9). Ñi Jehová, taqaʼen ỹamaxaleguete ra ỹoʼot na llalacpi qataq ra iloʼogue ana aʼlhua (Génesis 1:28). Neʼena naigui ra nache ivitaʼa taxa ra ʼenauac ana aʼlhua ỹataqta ʼonaxaic nmataxaqui na shiỹaxauapi. Huaña taxa nache nalochiguiñi qataq machiguiñe na mayepi. Ỹataqta saq ʼonaxaiqolec taxa ra qoỹanem ra tataʼague na shiỹaxauapi.

Qalaq ¿táenʼco nagui ra sa ishet ra ʼeetec raʼa? Aye la Biblia iaʼaxat:

• “Qaq chigoqchigui so ʼoonolec shiỹaxaua da huoʼo mshi huoʼo da nasouaxashit ana ʼalhua qataq da nleuaxa. Huaña, nachi da nleuaxa taigui ʼenauac na shiỹaxauapi, chaʼayi ʼenauac namayipi huoʼo da lasouaxashit” (Romanos 5:12).

ʼEnaʼam ca ntaʼa ỹauotec ca llalacpi ñi Jehová ỹanem so Adán qataq aso Eva so lqataxac. Soo maye ra ỹalaxagueta so nqataxac qoỹanema nache ishet taxa ra chochaq tatreec ra ncaʼaltrauec qataq ñaq ʼeetaiʼ taxa iloʼotragueʼ so mataqaʼ (Génesis 2:15-17). Qalaq ñi Jehová maye huetoʼot ra naỹajnaxanaxac nache sa ishet ra ipataqtaʼaque ra ỹalaxagueta ñi maye. Ñi Jehová ndotec ra huotaique maiche taxa chigoqtoto soua maye ra ỹachaxaʼn ra ỹalaʼc chaʼaye ỹauotrec ñi maye, ʼenaʼam qomiʼ soo maye huetoʼoto ra huesotre ra huoʼo ye lcaʼaualo. Qalaxaye ¿négueʼt ca lcaʼaualo soo maye?

Choxoraqchigui ra qaiỹaxat qalaxaye soo maye lcaʼaualo ra saỹalaxagueta ñi maiche Qartaʼa, ñi Ỹoʼotapecna. Nache yoʼoq ra lasouaxasheʼt, nache rqat ra nalochiyiñe. Lcopaʼague coʼollaxa nache iviroto ra lqueroqoʼ ime nache ileʼu, ipacchigui coʼollaxa ra lʼaqtacoʼ ñi Jehová (Génesis 2:17).

ʼEnauac qomiʼ llalacpi so Adán qataq aso Eva ỹoqoʼoye taqaʼen qomiʼ sanaloriñe, nache qomiʼ iviroto ra nqueroxo qataq seleuac. Qalaq so Elia ỹaỹajnaxanec so Gostavo ram  ʼeetapeguec coʼollaxa ñi Jehová sa ishet ra nqochen. Ñim soxoraic Qartaʼa ñaq ʼeetaʼ ra huotaique qomiʼ ỹanema ra qarmaʼ queʼeca ʼonaxaic mataqaʼ neʼena aʼlhua. So Elia ỹachaxana so Gostavo qataq aso Maria ye versículo huetalec aye la Biblia:

• “Qauʼaqtaxañiim qome na ỹottaʼaʼt na shiỹaxauapi, qoñiitaʼ: ¡Ñi qadataxalaʼ nachiñi ñi ntaʼa! Ñimayi coʼollaxa iʼayiñi ana ʼalhua, da yaqtoʼ sa dedaỹaiʼ; ñimayi ilotagueʼ na ỹottaʼaʼt shiỹaxauapi” (Salmo 96:10).

So Elia ỹoʼot ra recuennataxan soua maye ra ʼonaxaic ỹachaxatac aye la Biblia. Ra qaica qome ca nhuetaxanaxa, nquiʼic qataq quejnaxac; ʼenauac na shiỹaxauapi ʼonaxaica na lmaʼte, qalota na aloq qataq imeuec ra nleuaxa. Nache ʼeetapeguec coʼollaxa reʼera ñi Dios, ra ʼenauac na shiỹaxauapi ishet ra chochaq tateec ra ncaʼaltauec ra mataxaqui qanqoỹin ana aʼlhua. Reʼera ʼeetapeguec ñi Jehová sa ishet ra nqochen. Nache so Elia itaxaỹaxanec so Gostavo neʼena versículo ỹachaxatac aye la Biblia:

• “Qataq ỹataqta machiguiñi qome nam sa ishit da ñiʼoxonnaxaic da lquiyaqteỹaxac, chaʼayi namayipi ỹaconguet qome cam ʼalhua mayi ỹachaxanapeguem ñi Dios” (Mateo 5:5).

ʼEnaʼna ỹachaxatac ra ʼeetapeguec ñi Jehová nache ipacchigui qome ra lʼaqtac.