So Gostavo icuennate ʼenauac so ỹapaxaguenec so Elia. So maye, mashe huaʼaqtega ra qaỹaxattac aye la Biblia, qataq ỹaỹaten ra toxoshaxapec aye nere qataq na shiỹaxauapi sa ishetapec aye maye. Qalaq nam qalota coʼollaxa mashe qoỹettañe aye nere nache ipacchigui ra iaʼaxatac, ʼenauac reʼera ỹoʼot so maye ra ỹaỹateeta ra aye la Biblia saq chochi reto ra iaʼaxattac. Nache maiche naxajlaʼt ¿négueʼt ca iaʼaxatem so neraxanecpi ana ciencia qataq ỹoqta ʼeesa nʼaqtaguec qoỹettañe?

So yoʼoxoñe, so Gostavo qataq aso Maria tauʼalo so lauoreʼu yaqto inaʼt cam ʼeetecoʼ coʼollaxa so neraxanecpi aye la Biblia mashe iaʼaxataʼa ʼenauac nam saxanaxa ra qaỹaỹaten.

—So shiỹaxauapi —lʼaqtac so Elia— nache ʼenaʼam ra qaỹaloqnaxana ca neraxanecpi ra ỹiʼiriñe na lʼaqtac chigoqoʼot ca nʼacoʼ. Ñi maye ỹoqta lalamaqte aye la Biblia nacheñe ñi Qartaʼa.

—¿Ca négueʼt ñi qoỹeetega Qartaʼa? —renataxan so Gostavo.

—Ñim lʼonatac na shiỹaxauapi. ʼEnaʼam ca ntaʼa, taqaʼen huoʼo ra lʼenaxat —lʼaqtacoʼ so Elia nache nmitaique ye Salmo 83:18. ʼEetaʼ ye huetalec:

• “Yaqto na shiỹaxauapi ỹaỹateeta ra ʼam, maye arenaxat Jehová, ʼam ʼonolec ỹataqta qoỹoqcheguemec ʼenauac na huetalec ana aʼlhua” (NM).

So Elia ỹachaxana so Gostavo so versículo lỹa huetalec ra ʼeetaʼ lʼaqtacoʼ ñi Jehová “qamiʼ saʼaxatema da dalaxaic qadʼaxaỹaxaqui; damayi qamiʼ saʼaxatema, yaqtoʼ ishit da qauaỹajñiitaʼaguet qom saxanaxa da yiʼoq” (Isaías 42:9).  —ʼEnaʼam ca ntaʼa ra napacalec ra laỹajnec ca llalacpi —lʼaqtacoʼ so Elia—, ñi Qartaʼa Jehová taqaʼen qomiʼ napacaleguete ra laỹajnaxanaxac taqaʼen sa ỹaqalanapec ra huoʼo ye iaʼaxataʼa. Ỹoqoʼoye ishet ra ỹoʼot ana la Biblia ra qoỹiʼiriñe nam qaỹaxatacpi coʼollaxa saxanaxa ra yiʼoq.

—Nache ¿naigui ñi Jehová ra mashe coʼollaxa ỹaỹateetac ye souaqaigui, añi Maria qataq aỹem?

—Ngueteʼ, ñi Jehová sa ishet ra mashe ỹettañe ca lliquiaxac ñi shiỹaxaua. Qalaq ñi maye ʼenaʼam ca ntaʼa ỹaỹaten ra qanquejnaxac ỹoqoʼoye huotaique qomiʼ itauaʼn.

Nache so Elia ʼenapega so Gostavo, ñi Jehová ỹachalec ra lʼaqtac aye la Biblia ra huotaique qomiʼ itauan yaqto qomiʼ machiguiñe qataq samaxasoqchiguiñe. Taqaʼen qomiʼ ỹapaxaguenque ʼenauac na soʼotaq ishet ra ỹoʼot ra noʼon huoʼotaq qauem qome ye qoyiquiaxac, taqaʼen nagui.

ʼEnauac reʼera nateeteguet ra laloqnaxanaxac so Gostavo, chaʼaye taqaʼen huotaique ra noʼon ra lmariaxac so llalqa. Nache so Elia ỹachaxana so namoxoʼu na huetalec aye la Biblia:

• “Ñimayi ỹataqta viʼiiguet naqʼen da alaataxac, ividaʼalo naqʼen naua logaʼte ana ʼalhua” (Salmo 46:9).

• “Ñim qadataxala’ mayi qaica ca ỹaqalanapec, nachi huaña qome da huoʼo ca ỹaqataxanaiʼ lquiʼaxac da iquiʼaxan na ỹottaʼaʼt shiỹaxauapi; queʼeca nquiʼaxac ỹataqta noʼon naqʼen na nallic, qataq noʼon na lataxa, queʼeca nquiʼaxac ỹataqta ʼona­xaic qataq na lataxa ama” (Isaías 25:6).

• “Na shiỹaxauapi iʼoʼt qome naua lmaʼte, qalaxayi netaiguilo, ỹaañi ana languishi uvas, qalaxayi chic ana ala. Sa ishit da huoʼo ca iʼot ca lmaʼ, qalaq ỹaqaʼa ca naigui camayi, huoʼotaq da ỹaañi ca languishic, qalaq ỹaqaʼa ca nʼatet camayi. Neʼena ỹalamaxatpi ỹataqta logodaic ñaqʼen da nachaalataxac, ʼeetaʼam aca qoʼipaq; neʼena llicaʼaguishicpi ỹataqta nqueʼetaxaachigui ñaqʼen cam naigui da lʼonataxanaxac” (Isaías 65:21, 22).

•  “Nachi ñimayi iỹodeec ʼenauaque naua lachiʼ namayipi. Huaña, nachi sa ishit da ileu ca shiỹaxaua, qataq sa ishit da noỹiitac, huoʼotaq da nʼalaqtapiguiñi, huoʼotaq da huoʼo da nquiʼic. Chaʼayi ʼenauac na seloqtaigui nagui ʼenauac imeuo” (Apocalipsis 21:4).

ʼEnauac reʼera itoqon añi lquiyaqte so Gostavo. Chaʼaye taqaʼen huotaique lmaʼ aca aʼlhua maye huaña ra noʼon lataxac qataq soxoraicpi na shiỹaxauapi, taqaʼen huaña ra qaica ca sa noʼon, qaica ca nqouaxa, qataq imeuec ra nleuaxa. Aso Maria taqaʼen ỹataqta nqopita ra huaʼaqchigui qalaxaye icoʼ ỹataqta salaxaic ra ʼonaxaic ra yoqta imauec ra ipacchigui ye qaỹaxattac.

—Saỹaten ye arcuennataxa Maria —lʼaqtacoʼ so Elia—. Qalaq ra semetenactac so mashe qalota iaʼaxataʼa aye la Biblia sa npeʼen ra ipaquelec ye iaʼaxatac. Nache ¿saʼauamaqtenoʼ ra ʼenauac na qaỹaxattac taqaʼen ishet ra ipacchigui qome? Chaʼaye ñi maiche lalamaqte aye la Biblia ỹan ye lʼaqtac huetaña ye Apocalipsis 21:5. ʼEetaʼ: “ʼIyiñi qome neʼenapi, chaʼayi neʼena nʼaqtacpi ỹataqta ʼeesa qataq ishit da qaipiʼiỹaʼa”.