So Gostavo qataq aso Maria ntootrapeguec ra ỹaỹaten qome ana aʼlhua ra ishet ra nlaqtelec na shiỹaxauapi soxoraic qataq ỹaỹamaqchiguiñe ra nʼonataguec nache ỹoqta huetaigui ra nsoxoyec na mayepi. Nache rcuennataxataʼape soua maye ra ỹataqta saq ʼonaxaiqolec ra huoʼo ca aʼlhua maye huaña ra qaica ca nqouaxa, nhuetaxanaxa qataq imeuec ra nleuaxa, nache huaña ra yoqta machiguiñi qataq ỹaʼamaqchiguiñe na shiỹaxauapi. ¡Ỹataqta salaxaic ra lyaqaʼ ra ỹalectrauo queʼeca aʼlhua!

—Qalaxaye ¿chaxan lagui qome reʼera? —inat so Gostavo so Elia.

—¡Ỹataqta huoʼo ra iʼaalaxa ra aunataxanec reʼera! Nache ¿auaqchigui yoqta naxa ra qaỹaxattac so Jesús?

—Ajaʼ, saʼaqchigui naxa ra qaỹaxattac ra ỹajnaxanaxaic so maye. Qalaq nache ¿táenʼco taxa so maye?

—Qom ye mashe huoʼoi so dos mil viʼiye coʼollaxa huetalec ana aʼlhua so maye, nache so nʼdiscipulopi nache ʼenaʼam so lnataxanaxac —lʼaqtacoʼ so Elia ỹictega ye lerec so Mateo 24:3—. So Jesús ỹasattegueta so nʼdiscipulopi ỹauotaʼa ra ỹanem so nʼanec. Nache iaʼaxatem so mayepi ra ilaʼa ra mashe yoʼoq ʼenauac na aloiguesat nache mashe yactaʼa huoʼo queʼeca aʼlhua.

—Nache ¿cam ʼeetecoʼ queʼeca nʼanec? —renataxanoʼ so Gostavo.

—Aye la Biblia maichi ỹachaxan cam ʼeetecoʼ ca aloiguesat qom yoʼoq ca nʼanec. Semetenac ca huoʼo qome.

•  “Chaʼayi ca qompi maichi deloguiʼ ca sa lauoʼlʼecpi, qataq ca ntaʼa maichi deloguiʼ ca lỹa ntaʼa” (Mateo 24:7).

• “Huoʼo ca nqouaxa” (Mateo 24:7).

• “Ỹataqta qalota qome na sa ỹaỹamaxañisat” (Mateo 24:12).

• “Huoʼo qome ca nacholaxanaxa naua paʼaiguelo naua laỹil ana ʼalhua” (Lucas 21:11).

• “Qataq huoʼoi qome naua nalolaxaco naua ʼaleʼu” (Lucas 21:11).

Ñaq chetaʼague coʼollaxa ra huaqtrega, so Gostavo qataq aso Maria nache sogote ra mashe nqatrec ra ʼenauac na aloiguesat mashe yoʼoq neʼena naʼaxaʼte nagui. Ỹoqoʼoye huoʼo ra lcolanaxa ra ilotaʼagueta ca nayeʼetauo.

—Ra mashe yoʼoq neʼena nʼanec nache naigui ra mashe yactaʼa ramaxasoxonapec ra lʼonataxanaxac ñi Jehová ʼenauac ana aʼlhua. Aye la Biblia ỹamataʼac Lʼonataxanaxac ñi Dios ra maye ralaxaic nʼonataxanaxac ramaxasoxonapec ana aʼlhua —lʼaqtacoʼ so Elia, nache itaxaỹaxan ye versículo ỹachaxatac ram ỹoʼot qome ca mashe nayeʼetauo Lʼonataxanaxac ñi Dios.

• “Da lʼonataxanaxac na ntaʼalpi da iloʼogue nam huetalec ana ʼalhua, damayi nagui lalamaxat ñi qadataxalaʼ qataq som namaq ntaʼa qadcaʼalaxaqui; nachi somayi chochi tateec nagui da iloʼogue ʼenauac namayipi” (Apocalipsis 11:15).

—Qom ivita ra ramaxasoxonapec ra lʼonataxanaxac ñi Dios —lʼaqtacoʼ so Elia—, nache na qauemsat qataq na saỹaỹamaxanisat imeuec ra huetalec ana aʼlhua. ¿Sa ishetoʼ ra saq ʼonaxaiqolec qome?

Salaxaic ra ntoonagueʼc ra ỹaỹaten ʼenauac reʼera, so Gostavo qataq aso Maria nache ima ra salaxaic ra lyaxa ra ỹalectrauo queʼeca aʼlhua maye huetaña ra nlagaxa.

—¿Négueʼt taxa ca soʼotaq ara Maria qataq aỹem yaqto ishet ra salegactauo? —renataxan so Gostavo.

—Ajaʼ, qamiʼ qauaỹajñiita ra huotaique qanqajñe cam yoʼoqchigui ra noʼon nache ipacapegueʼ ra qanʼañaxalec —lʼaqtacoʼ  so Elia—. Ñaloqtenac cam ʼeetecoʼ coʼollaxa so Adán qataq aso Eva qataq so ỹiqataqchet soua maye, nache ¿négueʼt ca qomiʼ ỹapaxaguenque som ỹoʼoʼt soo maye?

—Qom ye soua maye saỹalaxagueta lamaxasoxonaxac ñi Dios, nache ỹiqataqchet ra nalochiguiñi nachaalataxac ye Mataqaʼ.

—Ñi Jehová ỹanem ra lamaxasoxonaxac soo maye, qomiʼ taqaʼen. Ỹoqoʼoye ra sauotaique salegactauo queʼeca mataqaʼ mashe yactaʼa huoʼo, nache seuenac ra ỹoqta sauattonaqtac ñi Dios, sauattonac cam ʼeetec na lamaxasoxonacpi qataq nache salaxasoxoguet.

Reʼera ỹataqta ỹaỹamaxareetac so Gostavo, chaʼaye ỹaỹamaqchiguiñe, qalaq nnajlaʼt cam ʼeetecoʼ so maye qataq aso lhua ra ishet ra ỹañoxot reʼera.

—Ra qaỹalaxaguet ñi Jehová sa ishet ra ỹapaguec ra qalaqaic, chaʼaye ñi maye ʼenaʼam ca ntaʼa ỹauotec ca llalacpi, nache ndotec ra qomiʼ ỹamaxaleguete cam yoʼoqchigui ra noʼonaxat ra qanachaalataxac. Taqaʼen sa ishet ra ndotec ra qomiʼ ỹachaxana so nqaʼaic taỹaʼa queʼeca aʼlhua maye huetaña ra nlagaxa, taqaʼen qomiʼ ỹanema ra ltaunaxanaxac ra qolaxague seʼeso nqaʼaic —lʼaqtacoʼ so Elia, ime nache itaxaỹaxanec ye maiche lʼaqtaqa ñi Dios huetalec aye la Biblia:

• “Nachi ñi qadataxalaʼ aỹim ʼeetega, ʼeetaʼ: Naua iʼaiʼte nachi ʼam ỹallitaguilo. Qaq ʼam sanem qome na ỹapaxaguenataxanaxacpi, qataq na ỹaqataxacpi, qataq ʼam sachaxangue qome ca nqaʼaic mayi qoquetegue” (Salmo 32:8).

ʼEnaua nʼaqtaqa itoqon añi lquiyaqte so Gostavo qataq aso Maria, chaʼaye soo maye ỹataqta ʼeesa ra ilotraque ra ỹanem na lalamaxatpi cam ỹoqta noʼon nmariaxac. Soo maye ỹaỹateete ra qaica ca ʼenaʼam ra l-llatreuo so llalqa queʼeca aʼlhua maye huetaña ra nlagaxayec qataq na ỹaỹamaqchiguiñisat.

 —Qamiʼ taqaʼen ishet ra qauacoñiiguet reʼera achiquiaxac ra ỹoqta qauaỹajñiita lapaxaguenataxanaxac ñi Jehová qataq ra ỹataqta qanʼañaxachi ra qaualaqaiguet ñi maye —lʼaqtacoʼ so Elia.

—¿Huaʼague ca huetaña ra sauotaique ra ñapaxaguenaxa reʼera? —renataxan so Gostavo ỹauotaʼa ra ntonaxac—. ¿Ishet ra qomiʼ qautauañi ʼam Sosaana qataq ʼam Elia?

—Ajaʼ, ỹataqta huoʼo ra qaryaxa ra qamiʼ setaunac. Nache qomiʼ huetoʼot aye nmejna ishet ra qamiʼ itauan ra qauanachiỹa ra nqaʼaic maye ỹoʼot ra ỹataqta qamiʼ machiguiñe qataq ra qauamacquiichiguiñe qataq ra sa ishet ra qaualachi ra maye.