Aso Maria naloqteetaʼape so lauoreʼu, lʼenaxat Elia qataq aso lhua Sosaana, soo maye saxaỹet ra ntootrapiguiʼ qataq machiguiñe. Ỹoqoʼoye ʼenapega so lhua Gostavo ilaʼa ra llec aso lauoreua nache inat cam ʼeetec ra lataxac ra machiguiñe ra lmariaxac. Nache inat coʼollaxa.

—Ajaʼ nache ʼeetec Maria qalaq qomiʼ taqaʼen huoʼo ra qanquejnaxac —lʼaqtac aso Sosaana—. Qalaxaye huoʼo so naʼaq selalec aso nere nache na huetalec yoqta ʼeesa ra qomiʼ itauaʼn. Qomiʼ ỹachaxanalo ra nqaʼaic ra qomiʼ machiguiñe qataq ra samaxasoqchiguiñe, naiʼctaxa ra qalota na quejnaxac huoʼotaq ca machaqca ca aloic ra souaqaigui.

Aso Maria nache huotaique ra nquiguec ra ỹaỹaten ye iaʼaxattac acaʼaca nere. —ʼEesa nqueʼ ra toxoshaxapec qataq chigocaña ye Israel qataq na aʼlhuapi lauoreua —lʼaqtacoʼ aso Sosaana—, ishet ra itaxaỹaxan ʼenauac na shiỹaxauapi naiʼctaxa ra ca machaqca ca lʼamqajnataxanaxac. Nache nagui, taqaʼen ishet ra qaitaxaỹaxan aye nere na ỹottaʼaʼt lʼaqtacpi na shiỹaxauapi. Ỹoqoʼoye, huoʼo na ỹajnaxanaxaicpi taqaʼen rapaxaguenataxanec aye maye. Na ỹottaʼaʼt aʼlhuapi maye huoʼo na ltaʼalpi ỹachigoxotaigui na lqataxacpi aye nere.

Aso Maria huotaique ra imeten aca nere nache so avit taỹa ye lmaʼ aso Sosaana, nache aso Sosaana ỹachaxana na nqataxacpi iaʼaxattac aye nere, neʼena iaʼaxattac ʼeetaʼ:

• “ʼEnauac na lataxaguesat [...] ỹataqta ʼaviʼiguelaxattalec da ʼauapaxaguenec na ʼaiʼalaqpi, ʼauʼaxattapeguem da qouetaʼa ca ʼadmaʼ, huoʼotaq nqaʼaic, huoʼotaq da ʼannaataiʼ, huoʼotaq da qoñishiguem”.

• “Qamiʼ mayi huoʼo da qadcoʼoxoqui, sa ishet qome da qaunogoqchichi ca qaiʼalqui”.

• “Qaq cam decachitapec coʼollaxa, qalaq noʼon da ỹaxaañi nagui da lcachaxac. Chaqdatoʼ da doʼonataxan, ỹacootapegueʼ ca lʼonatac, yaqtoʼ ishit da itauan cam huoʼo da lhuenaxanaxa”.

• “Ca shiỹaxaua da sa doʼonataxan, qaq mashi dequeʼectoxoʼ”.

• “Sa ishit qome da huoʼo ca ishipaxanaqchit da qadʼoquiaxac qataq dam saq chaʼa qanachaalataxac ʼenauac nam ishit da deshipaxanaqtaxan”.

• “Sa ishit qome da ʼauamattagui ca lataxa [chaʼaye] ʼeetaʼam na lshinataxanaxa na nʼadaxanaq; da huoʼotaq denagaxan, nachi iʼot da quiʼic”.

• “Caua namoxoʼu iuen da ỹataqta ndeʼn, chaʼayi ñi Dios ỹauoʼo qome da nhuaxanaguec na quishiguetaxaicpi qataq na lauatapiguiñiʼ aca sa lhua”.

• “Sa ishit da huoʼo ca lauatapiguiñiʼ aca sa lhua”.

• lqopichi, nachi camayi sogote da ʼeetaʼam da mashi ncachiỹaʼai aca mayi dam lquiyaqteỹaxac”.

• “Qaualaqailguete caua qadtaʼalliʼ”.

• “Ỹataqta ʼaualaxaguet ca ʼadtaʼa mayi ʼam lʼonatac, qataq sa ishit da ʼauʼotan aca ʼadateʼe qom mashi ỹiʼaxainaʼ”.

• “Da ñi ʼoonolec da qoñiita ỹataqta ỹauotec aca lhua, ʼeetaʼam da maichi nauojlaʼt. Qaq aca ʼalo ỹataqta huoʼo naq ʼenec naqʼen ca lhua”.