So Gostavo ỹataqta ntootapeguec ra ỹaỹaten na ỹachaxanapec ñi Jehová, qalaq naxaỹaxatañe ra ishetoʼ ra ỹoqta ʼeesa ñi maye ra añaxaic yaqto ipacchigui ra lʼaqtac. So Elia lʼaqtac ra huotaique ỹauattoota cam ʼeetecoʼ ñi Jehová ra ­ishet ra ipacchigui ra lʼaqtac, nache naloqten yeʼe: ʼenauac na maxa ra huoʼo chaʼaye huoʼo cam chigoqchigui coʼollaxa ra ỹoʼot.

Neʼena nʼaqtaguec taqaʼen huetalec aye la Biblia, nache ỹachaxanec ye versículo:

• “Qaq ñi ʼoonolec nam noỹicpi huoʼo cam ỹataqta chigoqchigui da iʼot” (Hebreos 3:4).

—Ajaʼ ʼeesa reʼera —ỹasat so Gostavo—. Chaʼaye ca noỹic sa ishet ra maiche ʼonolec ra nʼoxoosheguem.

—Nache ʼeetec. Nache ʼenaʼam ca nhuoshec huoʼo chaʼaye huoʼo coʼollaxa ca ỹoʼot.

Nache so Elia lʼaqtac ʼenauac na seloqtaʼa huoʼo na ỹataqta qalaqaic ra qaỹoʼot, sa ishet ra ʼenaʼam ca noỹic ra qaỹoʼot. —Ameten ana isotta lauoxo, añi añaxai nalaʼ, aso sanamaañe auaxai qataq na qaica ca logaʼt piguem. Ra qanauaxaỹaxaasheguem ca noỹic nache iuen ca ỹoqta ỹaỹaten ra nʼoxoosheguem qataq nache ʼenaʼam ca nhuo­shec iuen ra huoʼo ca ỹoʼot, nache ¿sa ishet taxa ra ỹoqta saq ỹaqteec ra iuen nam ʼena­uacna ca Naloqchiiñe qataq ca Ỹoʼotapecna?

 So Gostavo nache naloteguet ra laloqnaxanaxac ye qaỹaxattac.

—Aye la Biblia ỹachaxan ra ʼenauacna coʼollaxa huoʼo so Ỹoʼotapecna qataq Naloqchiiñe —lʼaqtac so Elia—. Nache ỹoqta ra salaxaic ra huoʼo ye lʼañaxac. Ỹoqoʼoye qaỹamataʼac Dios, nache so huaʼauriñe nʼaqtaqa qaỹoʼogoxonalo coʼollaxa qoỹiʼiriñe ana la Biblia naigui “Añaxaic”. Nagui na shiỹaxauapi qalota na “nʼdiospi”, qalaq ñi Jehová maye ỹoʼotapecna, ỹoqoʼoye nachaqñita ʼonolec ishet ra qaỹamataʼac Dios qaica ca iqalanapec.

So Gostavo iaʼalac aye la Biblia ra iaʼaxat nam qalota qataq ʼonaxaic lʼonatacpi ñi Jehová. Na paguiñe nache qaỹachalec na versiculopi maye ỹapaxaguenec so Elia:

• “Coʼolloxochi chitaʼague da doʼonataxan ñi iʼotapecna, nachi iʼot na piguem qataq ana ʼalhua” (Génesis 1:1).

• “Qauauattoñiita da ñi qadataxalaʼ nachiñi ñi iʼotapecna; ñimayi qomiʼ lʼonataqa qataq qomiʼ lalamqaʼte” (Salmo 100:3).

• “Na piguem namayi iʼaxattac da lliʼoxoyic ñi iʼotapecna; qaq ʼenauac na lʼonatacpi qomiʼ daʼaqtaxaatapeguema nam huetoʼotpi na paʼashiguem” (Salmo 19:1).

Ajaʼ, ñi Jehová Dios ỹoʼot coʼollaxa ­ʼenauacna. Taqaʼen ỹoʼot ra nachaalataxac ʼenauac ra huoʼo ra lcaʼalaxa. “Chaʼayi ʼam mayi nachiʼam chigoqtacot da ncaʼalaxa”, lʼaqtac ana la Biblia ra ỹamataʼac ñi Jehová (Salmo 36:9). Ỹoqoʼoye ñi maye nacheñe ñe ỹaatac  qanqoỹin ra ncaʼalaxa, ñi Ỹoʼotapecna. Ñi Jehová qomiʼ ỹanem ra ncaʼalaxa, ỹoqoʼoye nache Qartaʼa. Ỹoqoʼoye aye la Biblia ʼenapec: “¿Petaʼa sa ishitoʼ da ʼenauac da shinaqta da ʼoonolec ñi qadtaʼa, ñim iʼotapecna mayi ʼenauac da qomiʼ lʼonataqa?” (Malaquías 2:10).

—Ajaʼap, ʼeesa reʼera chaʼaye ra semetenactac qataq ñaloqtenac ʼenauacna nache sa ishet ra qaiqalan ra qaiʼamaqten ra huoʼo coʼollaxa ca ỹoʼot, cam Naloqchiiñe, cam ỹan ra ncaʼalaxa, qataq cam Ỹoʼotapecna —lʼaqtacoʼ so Gostavo.

—Ra ishet coʼollaxa ra lʼañaxac ra chigaqaigui ʼenauacna —aso Maria lʼaqtacoʼ—, ¡nache nataqaʼen yoqta ra saiqalan ra ỹoʼot ʼenauac ye ỹachaxatac huetalec aye la Biblia!

So Gostavo qataq aso Maria ʼenauac so qaỹapaxaguenque so naʼaq ỹataqta ʼeesa ra qanaloqten, qalaq huotraique ra ỹataqta ỹauattoote ñi qaỹaxattac ra añaxaic maye Naloqchiiñe ʼenauacna.