1, 2. ¿Négueʼt na nnataxacpi ỹataqta ʼamaqtaqaic soʼotaq?

NA ÑAQPIOLECPI ỹoʼot qalota na nnataxacpi. Ishet ra sapaxaguenaxaq camachaqca, qalaxaye pasaʼa ra qomiʼ inat: «¿Táʼaencoʼ?». Qaq ra huotaique sasataxaguet ra nnataxac, nache taq ỹoltaxa rnataxan: «¿Táʼaencoʼ?».

² Naiʼctaxa ra qomiʼ nsoxotpi qoʼ ỹaxaiquipi, ʼenauac qomiʼ soʼotaq na nnataxacpi. Ishet ra senataxanaq ¿négueʼt ca sachiguenaq? Qoʼ ¿négueʼt ca sanaxañe? Qalaxaye taqaʼen huoʼo na nnataxacpi ỹataqta amaqtaqaic: ¿ʼÉetec ra achaalataxac? ¿ʼÉetec ra aloic qomchiyi? Qaq ra sasanataxa ra nasataxac neʼenaua nnataxaco maye qomiʼ ỹoʼot ra machiguiñi, petaʼa saxanaxañe ra ñimitaqaique na nasataxacpi.

3. ¿Táʼaencoʼ huoʼo na shiỹaxauapi ipeʼettega ra sa ishet ra ỹanata na nasataxacpi na nnataxacpi ʼamaqtaqaic?

³ ¿Huetalec aye la Biblia na nasataxacpi na nnataxacpi ʼamaqtaqaic maye soʼotaq? Huoʼo na shiỹaxauapi ipeʼettega ra nachi ʼeetec reʼera, qalaxaye ipeʼettega ỹapac ra qalaqaic aye la Biblia. Petaʼa iʼamaqten ndotec na maestropi qoʼ pastorpi huetoʼot na nasataxacpi. Qataq na laỹipi huoʼo ra laʼaloxo chaʼaye sa ỹaỹaten na nasataxacpi. Qaq ʼam ¿ʼéetec ra ʼarcuennataxac?

4, 5. a) ¿Négueʼt na nnataxacpi ʼamaqtaqaic yoʼoqta ra ʼauʼot? c) ¿Táʼaencoʼ ra ʼauen ra ñaq queta ra ʼanmittaique ra qaỹasateguet?

⁴ ʼAuotaique yoʼoqta ra qaỹasateguetpi na nnataxacpi ʼenaʼam ʼeetaʼ: ¿Táʼaencoʼ ra aỹem ỹoʼot ñi  Dios? ¿Ca ʼéetec ca aloic qom seleu? ¿ʼÉetec ra lataxac ñi Dios? So Jesús, so paxaguenataxanaxaic, ʼenapec: «Qauỹaxañiỹot Ñim Loʼonatac ʼEnauacna, qaq Ñimaye qamiʼ ỹanema ca qauỹaxañiỹaique; qautaqỹapegueʼ Ñimaye, yaqtoʼ qauanachiỹa ca qanmichiitaique; qataq qauaxañiỹaʼt naua qarhuaxayilliʼ, yaqtoʼ qamiʼ iloʼogueta» (Mateo 7:7). Sa ishet ra ʼaxaañe ra ʼanmittaique na ỹataqta ʼeesa nasataxacpi.

⁵ Nachi ʼeetec, ra queta ra ʼanmittaique, nache ʼauanata na nasataxacpi aye la Biblia (Proverbios 2:1-5). Neʼena nasataxacpi sa ishet ra qalaqaic ra qaỹaỹateetegue. Reʼera paxaguenaxac ʼam ỹamiʼ ra ʼanachaalataxac machiguiñi nagui, qataq ra ỹataqta ʼonaxaic ʼanaquitaxac qomchiye natauo.

6. ¿Táʼaencoʼ ra huoʼo nam ipeʼettega ra ñi Dios ra qomiʼ sa itenaʼalo?

⁶ Qalota na shiỹaxauapi ipeʼettega ra ñi Dios sa itenaʼalo qomiʼ. Ipeʼettega ra ñi Dios ỹataqta qomiʼ itenaʼalo, nache sa ishet taxa ra huoʼo ca queʼejnaxac. Nagui huoʼo na laataxac, nquiỹaxanaqtaic qataq ra nachoxoyec ʼenauac ana ʼalhua. Taqaʼen na shiỹaxauapi huoʼo ra lquiʼic, sa noʼon qataq ileu. Ỹoqoʼoye huoʼo na nnajlaʼt ʼeetaʼ: «Ra ñi Dios qomiʼ ỹauoteque, ¿táʼaencoʼ qoneʼ saq viʼiguet ʼenauac reʼera queʼejnaxac?».

7. a) Na lataxalaʼpi na ʼamqajnataxanaxaicpi ¿ʼéetec ra ỹapaxaguenec na shiỹaxauapi ra qauemaic ñi Dios? c) ¿Táʼaencoʼ ra saỹatenaq ra ñi Dios sa ishet ra qanmaxalec nam qauemsat?

⁷ Na lataxalaʼpi na ʼamqajnataxanaxaicpi ỹoʼot ra iʼamaqten na shiỹaxauapi ra qauemaic ñi Dios. Ra  yoʼoq ye qauem, nache namayepi ʼenapecoʼ: «reʼera namaq ñi Dios, chaʼaye maiche ʼeetapeguec ñi maye». Ra lʼaqtac yeʼeye, nache ỹataqta nmaxalec ñi Dios. Qalaxaye aye la Biblia rapaxaguenataxanec ra ñi Dios huanna ra chigoqoʼot na qauemsat. Ye Santiago 1:13 iʼaxat ra ñi Dios sa ishet ra ỹiʼiguenec ca saỹaỹamaxañi ca shiỹaxaua. ʼEnapec: «Qom huoʼo ca ʼoonolec da qoñiita da nomteguet ca lhuennataxac da ỹoʼot ca sa ỹaỹamaxañi, nache saishet qome da nmaxalec Ñim Loʼonatac ʼEnauacna. Chaʼaye Ñimaye saishet da qaỹeʼeguen qataq Ñimaye nataqaʼen saishet da huoʼo ca ỹeʼeguen da yaqtoʼ ỹoʼot ca qauem». Reʼera naigui naiʼctaxa ra ñi Dios ra ỹasheetec ye qauem, qalaxaye sa ishet ra nachiñi ñi chegoqoʼot ye qauem (ʼautaxaỹaxan Job 34:10-12). Semetenaq ca naloqnaxanaxat.

8, 9. ¿Táʼaencoʼ ra saỹaỹamaxañi ra qanmaxalec ñi Dios nam qarqalanaxacpi? ʼAuʼaxat ca naloqnaxanaxat.

⁸ ʼAuennataʼa ca nsoq netoʼot caua ltaʼal. So ltaʼa ỹataqta ỹauotec so nsoq qataq ỹapaxaguenec ra lcauaʼa ra ỹoʼot ca ỹaỹamaqchiguiñi. Qalaxaye so nsoq saỹalaxaguet so ltaʼa nache ỹalat ye lmaʼ. Nache ỹoʼot na qauem qataq nmittaique ye saỹaỹamaxañe. ¿ʼAnmaxalec so ltaʼa ra huaigui ye qauem so llalec chaʼaye ỹasheetec ra ỹalat ye lmaʼ? ¡Sa ishet! (Lucas 15:11-13). Nache ʼenaʼam neʼena ntaʼa, ñi Dios ỹasheetec na shiỹaxauapi coʼollaxa lcauaʼa ra ỹoʼot ye qauem taq ra ỹalat ñi maye. Ỹoqoʼoye ra yoʼoq ye qauem, nache seuennataqaʼa ra sa ishet ra chigoqoʼot ñi Dios. Ỹataqta saỹaỹamaxañe ra qanmaxalec ñi maye.

 ⁹ Huoʼo ye ʼamaqtaqaic huomshe saxanaxa ra ñi Dios viʼiguet naqʼen ra huoʼo na qauem. Qome ʼanapaxaguena ʼeetec ra iʼaxat aye la Biblia reʼera. Qalaxaye ʼam ỹataqta ishet ra ʼauaỹaten ra ñi Dios qomiʼ ỹauoteque qataq huanna ra qanmaxalec nam qanqueʼejnaxac. Huoʼo ye ʼoonolec ra ʼeesa: Nachaqñita ñi Dios, maye ishet ra ỹaỹamaxajñe nam qarqalanaxacpi (Isaias 33:2).

10. ¿Táʼaencoʼ ra ỹataqta saỹatenaq ra ñi Dios ỹaỹamaxajñe qome ʼenauac nam qauemsat?

¹⁰ Ñi Dios quiʼitta (Isaías 6:3). ʼEnauac na ỹoʼot sa ishet ra huetaʼaguet ye qauem. Ỹoqoʼoye ishet ra sepiaqaʼa ñi Maye. ʼEnauac qomiʼ huoʼo ra qarpeʼenaxac, nache huoʼo naxa ra ñipeʼenac ye ʼeesa. Ivitaʼa ca ntaʼa ỹataqta noʼon ye lcuennataxac qalaq sa ishet ra ỹaỹamaxajñe ʼenauac nam qauemsat. Qaica ca napacalec ra lʼañaxac ñi Dios. Ỹoqoʼoye qomiʼ saỹatenaq ra ñi maye ishet qataq huoʼo ra lyaxa ra ỹaỹamaxajñe ʼenauac nam qauemsat. Nache tateec qome ra ỹapalaxat ʼenauac nam saỹaỹamaxañe (ʼautaxaỹaxan ye Salmo 37:9-11).

11. ¿ʼÉetec ra lcuennataxac ñi Dios souaxat ra ʼanqueʼejnaxac?

¹¹ ¿ʼÉetec ra lcuennataxac ñi Dios ra ilotaʼa na aloic huetalec ana ʼalhua qataq ra qouaigui na maiche ʼarqalanaxacpi? Aye la Biblia rapaxaguenataxanec ra ñi Dios ỹauotec ra ỹaỹamaqchiguiñisat (Salmo 37:28). Reʼera ỹachaxan ra ñi maye ỹataqta iqocheʼeguet na ỹaỹamaxaqchiguiñi qataq  na sa ỹaỹamaxañi. Ñi maye nquiʼia ra ilotaʼa ra nqueʼejnaxac na shiỹaxauapi. Aye la Biblia iʼaxat ra ñi Dios huoʼo coʼollaxa ra lquiʼic añi lquiyaqte souaxat ra ilotaʼa nam qauemsat ana ʼalhua (Génesis 6:5, 6). Ñi Dios sa ishet ra nqochen ra lataxac (Malaquías 3:6). Ñi maye ỹataqta ʼam iqochaʼa (ʼautaxaỹaxan ye 1 Pedro 5:7).

12, 13. a) ¿Táʼaencoʼ ra sauotaxac taq seqochaqaʼa na shiỹaxauapi, qataq ʼeetec ye qarcuennataxac ra seloqtaʼa na queʼejnaxac huetalec ana ʼalhua? c) ¿Táʼaencoʼ ra ishet ra ỹataqta saỹatenaq ra ñi Dios nqatec ʼenauac na nqueʼejnaxac qataq na saỹaỹamaxañisat?

¹² Aye la Biblia taqaʼen iʼaxat ra ñi Dios qomiʼ lʼonataqa ʼeetaʼama ñi maye (Génesis 1:26). Reʼera naigui ra ñi Dios qomiʼ iʼoxon ʼenaʼam ra lataxaco huetoʼot ñi maye. ʼAm ¿ʼauet ra ʼalotaʼa ra nqueʼejnaxac na shiỹaxauapi? nache ñi Dios taqaʼen ỹataqta ỹaguec ra iuet ra ilotaʼa. ¿ʼÉetec ra saỹatenaq reʼera?

¹³ Aye la Biblia qomiʼ ỹapaxaquenque ra ñi Dios «huotaxanaqtaqaic» (1 Juan 4:8). ʼEnauac na ỹoʼot ñi Dios chigaqaigui ra lauotaxanaqtaic. Ỹoqoʼoye huoʼo ra qarauochaxac chaʼaye ñi Dios huetoʼot ra nauotaxanaqtaic. ʼAuennate ra: Ra ʼam huetoʼot ca nʼañaxac, ¿ỹoqta ra ʼauapalaxat ʼenauac na nqueʼejnaxac qataq na saỹaỹamaxañisat huetalec ana ʼalhua? Ajaʼ ʼauʼot, chaʼaye ʼauauotec na shiỹaxauapi. Qaq ¿ca ʼéetec ñi Dios? Ñimaye huoʼo ra lʼañaxac, qaq souaxat ra qomiʼ ỹauoteque nqatec ʼenauac na nqueʼejnaxac qataq na saỹaỹamaxañisat. ¡Ishet ra ỹataqta ʼauamaqten ʼenauac naua ỹachaxanapeʼc ñi Dios maye qaỹachaxan so huaʼauchiguñi anaʼana nere ỹataqta ipacchigui!  Qalaxaye ra ʼanshetaique ra ʼauamaqten neʼenaua qaỹachaxanapeʼc, nache ʼauen ra ʼanquigaxateec ra ʼarauattonaxac ñi Dios.

14. ¿ʼÉetec ra lʼenaxat ñi Dios, taq ʼeetec ra saỹatenaq ra soʼogoxonaxa?

¹⁴ Ra ʼauotaique huoʼo ca ʼanauochaxaua, huaʼauñe ʼanataxanec ca lʼenaxat. Qaq ñi Dios ¿huoʼo ca lʼenaxat? Qalota na nʼamqajnataxanaxac ỹapaxaguenec ra lʼenaxat Ñi Dios, ʼeetaʼ: Nataxalaʼ qoʼ Ñim Lʼonatac ʼEnauacna, qalaxaye neʼenaua sa ishet ra nʼenaxanqaʼte. Ndotec ra ỹachaxan ra lʼonataxanaxac qoʼ negueʼt ca ỹoʼot, ʼenaʼam ra «ntaʼa» qoʼ «presidente». Ñi Dios qomiʼ ỹachaxana ra lalamaxat lʼenaxat: Jehová. Salmo 83:18 ʼenapec: «Yaqtoʼ na shiỹaxauapi ỹaỹateeta ra nache ʼam ʼarenaxat Jehová, ra nache ʼamta ra ʼanataỹaña ʼenauacna, maye ʼauloʼogue ʼenauac ana ʼalhua» (Traducción del Nuevo Mundo, TNM). So nedaxanaxanecpi aye la Biblia  ỹataqta qalota roʼogoxona ra lʼenaxat ñi Dios. Ñi Jehová huotaique ra ʼauauatton ra lʼenaxat taq ʼauʼogoxona. Ñi maye ʼam iʼaxatem ra lʼenaxat yaqtoʼ ʼashet ra ʼanauochaxaua ñi maye.

15. ¿Négueʼt ca naigui ra lʼenaxat Jehová?

¹⁵ Ra lʼenaxat ñi Dios, Jehová, huoʼo ra ỹataqta ʼamaqtaqaic ye naigui. Naigui ra ñi maye ishet ra ipacchigui ʼenauac na yachaxanapecpi qataq ỹoʼot camachaqca ca ʼeetapeguec. Qaica ca ishet ra nqanaxateguet. Nachaqñita ñi Jehová ishet ra ỹachetac reʼera nʼenaxat. *

16, 17. a) ¿Táʼaencoʼ ñi Jehová «Qaica ca Ỹaqalanapec»? c) ¿Táʼaencoʼ ñi Jehová «Ñim qaica ca logaʼt»? ch) ¿Táʼaencoʼ ñi Jehová «Ỹoʼotapec ʼEnauacna»?

¹⁶ Mashe ye semetenaqtac ye Salmo 83:18 ra retaqtega ñi Jehová, ʼenapec: «nache ʼamta ra ʼanatayaña ʼenauacna». Taqaʼen ye Revelación (Apocalipsis) 15:3 ʼenapec: «ʼAm Qarataxalaʼ maye ʼAroʼonatac ʼEnauacna, qataq qaica ca ʼauqalanapec, ʼenauac nam ʼauoʼotpi yataqta ltaʼaraicpi, [...] ʼenauac na ʼauoʼotpi ỹataqta ỹaỹamaqchiguiñi qataq nalochiguiñi». ¿Négueʼt ca naigui ye nʼaqtaqa «qaica ca ʼauqalanapec»? Naigui ra ñi Jehová qaica ca iviʼ ra lʼañaxac. Qataq ye 1 Timoteo 1:17 qayamataʼac ñi Jehová: «Ñim qaica ca logaʼt», naigui ra saxaỹet ra nache ʼeetaiʼ. Ye Salmo 90:2 iʼaxategue ra Ñi Dios maye chigoqchiguiña qataq ivittaʼa ca paʼatrec naʼaʼq, ra nachaqñita Dios. ¡Ỹataqta ỹoʼot ra qarʼaalaxa!

 ¹⁷ Nachaqñita ñi Jehová maye Ỹoʼotapec ʼEnauacna. Apocalipsis 4:11 ʼenapec: «ʼAm qadataxalaʼ Dios, ʼitchiguiñi da ʼam qoỹanot da ʼayiʼoxoyic, ʼadʼamaqchic, qataq da ʼadʼañaxac; chaʼayi ʼam ʼadʼonatac ʼenauacna, maichi ʼam chigoqchigui, qaq ỹoqoʼoyi yiʼoq ʼenauac namayipi» (Dios Nvita na Shiỹaxauapi, DNS). Ajaʼ, chigoqchiguiña na angelpi ye piguem ivittaʼa na huaqajñipi qataq chigoqchiguiña ana qoipaqpi ala qataq ivittaʼa na nỹaqpi huetangui aso auaxai, ¡Ñi Jehová ỹoʼot ʼenauacna!

18. a) ¿Taʼaencoʼ huoʼo na shiỹaxauapi ra ipeʼettega ra huanna ra ishet ra nauochaxaua ñi Dios? c) Qalaq ¿ʼeetec ra lapaxaguenataxanaxac aye la Biblia?

¹⁸ Ra huoʼo na itaxaỹaxan ra ỹataqta ʼamaqtaqaiqa lataxaco ñi Jehová, nache huoʼo ra lliʼiỹaxa taq nache ishet ra ʼeetaʼ: «Ra ñi Dios ỹataqta ʼañaxaic, ỹataqta ʼamaqtaqaic, qataq ỹataqta qoỹoqta, nache ¿taʼaencoʼ taxa ra aiem iqochaʼa?». Qalaq ¿huotaique ñi Dios ra ʼera ca qarcuennataxac? Sa ishet. Ñi Jehová huotaique qomiʼ nquiigueta. Aye la Biblia ʼenapec ra ñi Dios «saishet da iỹotaique naqaʼen ʼenauac da shenaqta» (Hechos 17:27). Ñi Dios huotaique ra ʼanquigot  Ñimaye, qataq Ñimaye ỹachaxanapec ra «nataqaʼen qamiʼ nquiigueta» (Santiago 4:8).

19. a) ¿ʼÉetec ra ishet ra ʼaviraʼa ra ʼanauochaxaua ñi Dios? c) ¿Négueʼt ca lataxac ñi Jehová ra ʼancopita?

¹⁹ ¿ʼEetec ra ishet ra ʼanauochaxaua ñi Dios? So Jesús ʼenapec: «Qaq deʼera achaalataxac maye chochaq tatec, damaye nachera da naigui da ʼam qaỹauatton, ʼam maye ʼAroʼonatac ʼEnauacna, maye nacheʼamta qataq ʼam ʼeesa, qataq nam ʼArcaʼaguishec maye ʼanamaxa ana ʼalhua coʼollaxa» (Juan 17:3). Ñaq queta ra ʼanapaxagueetega, nache ʼaviraʼa ra ʼauauatton ñi Jehová qataq ñi llalec Jesús. Nache, ishet ra ʼavittaʼa ra tatec ra ʼanachaalataxac. Saloqnaxanaxa, mashe ʼanapaxagueetega ra ñi Dios «ỹataqta huotaxanaqtaqaic» (1 Juan 4:16). Qalaxaye taqaʼen huoʼoi naua lỹaʼt ʼonaxaiqa lataxaco. Aye la Biblia qomiʼ ỹapaxaguen ra ñi Jehová maye «soxoraic qataq choxonnataxanaxaic», «qaỹoqchiguinguit da lalemataic qataq ltaʼaraic da lsoxoyec, qataq ỹataqta ʼeesa» (Salmo 86:5; Exodo 34:6). Ñi Dios lhualaxavic qataq quiʼitta (2 Pedro 3:9; Revelacion 15:4). Ra ʼautaxaỹaxan aye la Biblia nache ỹataqta nquiguec ra ʼauauatton naua ʼonaxaiqa lataxaco ñi Dios.

20-22. a) Naiʼctaxa ra sa ishet ra selaqaʼa ¿ʼéetec ra ishet ra ʼanquiiguet ñi Dios? c) ¿Négueʼt ca ʼauʼot ra huoʼo ca huotaique ra ʼaxaañe ra ʼanapaxaguena aye la Biblia?

²⁰ Naiʼctaxa ra sa ishet ra ʼaulaʼa ¿ʼéetec ra ishet ra ʼanquiiguet ñi Dios? (Juan 1:18; 4:24; 1 Timoteo 1:17). Ra ʼautaxaỹaxan aye la Biblia, nache ivittaʼa ra ỹataqta ʼauauatton na lataxaco ñi Jehová (Salmo 27:4; Romanos 1:20). Ra inquictashiguem ra ʼarauattonaxanaxac na lataxaco ñi Jehová, nache ivittaʼa ra  ʼanauochaxaua qataq ỹataqta inquiguec ra ʼauauotec ʼñi maye.

²¹ ʼAm qome ʼauaỹaten ra ñi Jehová, maye Qartaʼa (Mateo 6:9). Ñi maye qomiʼ ỹanem qarcaʼalaxa, qataq huotaique ra qomiʼ machiguiñi. Reʼera nache ra huotaique ca ntaʼa soxoraic ra ỹanem ca llalaqpi (Salmo 36:9). ʼEesa, aye la Biblia ỹapaxaguenec ra ʼam ishet ra ʼaviraʼa ra ʼanauochaxaua ñi Jehová (Santiago 2:23). ʼAcuennate neʼena: ¡Ñi Jehová, maye Ỹoʼotapec ʼEnauacna, ỹataqta huotaique ra ʼam nauochaxaua!

²² Petaʼa huoʼo na shiỹaxauapi maye huotaique ra ʼaxaañe ra ʼanapaxaguena aye la Biblia. Ishet ra ñeʼetega ra ʼanaralaxat ra ʼarʼamqajnataxanaxac. Qalaq sa ishet ʼauaqtaʼa ra huoʼo ca naxateguet ra ʼaviraʼa ra ʼanauochaxaua ñi Jehová. Ñi maye ỹataqta noʼon ʼanauochaxaua, qaica ca lỹa ʼenaʼam.

23, 24. a) ¿Táʼaencoʼ ʼauen ra ñaq queta ra ʼannataxateguelaʼt? c) ¿Négueʼt semetenaq ca lỹa paxaguenaxat?

²³ Ra ʼanapaxaguena aye la Biblia, petaʼa huoʼo na sa ʼauaỹatenguet. Sa ishet ra huoʼo ca ʼarʼaloxo ra ʼaunataxan qoʼ ra ʼanmitaique ra ʼam qaitauan. So Jesús lʼaqtac seuenaq ra qomiʼ huesochiguiñi, ʼenaʼam na ñaqpiolec (Mateo 18:2-4). Na ñaqpiolec ỹoʼot na qalota nnataxac. Ñi Dios huotaique ra ʼauanata na lasataxacpi. Nache, ʼanmit aye la Biblia yaqtoʼ ỹataqta ʼauaỹaten ram ʼanapaxagueetega ỹataqta ʼeesa (ʼautaxaỹaxan Hechos 17:11).

²⁴ Ra ʼanapaxagueetega aye la Biblia, reʼera nachera ra ỹaỹamaqchiguiñi lataxac ra ʼauaỹaten na lataxaco ñi Jehová. Ca lỹa paxaguenaxat, semetenaq taʼaencoʼ aye la Biblia saq ʼenaʼam ʼenauac ana laỹi nerepi.