LAỸI 1
«Ñimitaique qome ana qaguetapi maye deqat»
Ana qagueta ỹataqta isomtapiguiʼ. Coʼollaxa ra requeʼetac, qalaq saishet ra nanoma ra caʼai aso qagueta laỹipi. Nagui sa ilaʼa aso laỹipi qagueta taq so loʼo. Qaica ca ishet ra npaxaalec ra huetauga ye aviaq maye netaña na chaqaic shiguiỹacpi, mashe nayeetauo na pe. Qalaq, lcopachigui huaʼaxaỹa so navilỹaxac maye ỹauatton: ¡lavilỹaxac so qagueta loʼo! Somaye nqalgoq ra nqoʼona asomaye, nachishiguem, ỹoxotoigui so lapoʼ taq ỹoltaxa ỹiʼiguelaxata ye lmaʼ.
SAXAỸET naxa ñi Jehová ra maiche naloqnaxaalaʼt ra ʼenaʼam ca qagueta loʼo. Ra Lʼaqtac qomiʼ ʼenapegalo: «Aỹem maiche souapegueʼ qome da seloʼogue ana ilopi qaguetapi» (Ezequiel 34:11, 12).
«Seloʼogue ana ilopi qaguetapi»
¿Négueʼt ana lalamaqtepi qaguetapi ñi Jehová? Nachenapi na shiỹaxauapi maye ỹauotec taq ỹoʼot ra ỹiʼioxoreetac ñi maye. Aye la Biblia ʼenapec: «Qauanaqui qome, saʼaraxayiñi naua qarllecte da shoʼoxorenaq, saʼaraqoto naua qarllecte Ñim Nataxalaʼ maye qomiʼ loʼonataqa. Chaʼaye Ñimaye nacheñi Ñim Qanatamnaxalaʼ, qataq qomiʼ nhuoʼ leʼecpi, qomiʼ lalamaqaʼate Ñimaye, shenaqtaʼam ana qagueta da qomiʼ ilotagueto» (Salmo 95:6, 7). Nam ỹoʼoxoretacpi ñi Jehová huoʼo lyaxa ra quegue so Loʼo, ʼenaʼam ra ʼeetec ana qaguetapi. Qalaq saishet naxa ra nachi ʼeetec reʼera. Huoʼo naxa, na lʼonataxanaxanecpi ñi Dios ʼenaʼam aca qaguetapi lagaʼt qoʼ isomtac (Ezequiel 34:12; Mateo 15:24; 1 Pedro 2:25). Qalaq, naiʼctaxa ra huoʼo ñi maiche nỹotec, ñi Jehová saishet ra ỹalatauec ʼenaʼam ra icoʼ rqat naqaʼen.
ʼAm, ¿ñaq ʼananomta ra ñi Jehová ñaq ʼeetaiʼ ra anPastor? Nagui, ¿ʼeetec ra lataxac ra qomiʼ iloʼoguelo ʼenaʼam ca qagueta loʼo?
Qomiʼ iquiʼaxanema na nallic saq chaʼa. «Sauega da chec na ỹataqta noʼon ʼauaqpi», ʼenapec ñi Jehová. Taqaʼen ʼenac: «Huaña yemaye nache ishet da nmatec qataq chec na ỹataqta noʼon ʼauaqpi» (Ezequiel 34:14). Ñi Jehová saxaỹet ra qomiʼ ỹanem na ỹottaʼaʼt nallic saq chaʼa huaqchigui ye laloqoʼ ra seuenaq. ¿Ishet ra ʼacuennataʼa ra huoʼo aca nmejna, ntaxaỹaxac qoʼ video maye ỹasateguet so ʼanatamnaxac? ¿ʼAnanomteguet naxan ra ñi Jehová ỹataqta ʼam iqochaʼa?
Qomiʼ npaxaalguete taq qomiʼ itauan. Ñi Jehová ỹachaxanapec: «Ñeʼeguelaxateuo ana lagaʼt coʼollaxa, qataq sauoʼo ca laxataxat na huacac lapiaʼ, qataq setauan qome ana mashe qaica ca laʼañaxac» (Ezequiel 34:16). Ñi Jehová ỹamiʼ ra lʼañaxac camaye nanomteguet ra qaica ca lʼañaxac qoʼ ca nhuogoqtac souaxat na nqalanaxacpi. Ñi maye ỹauoʼo ca laxataxat aca qagueta ra queʼemac yaqtoʼ ishet ra noʼoita ra huoʼo coʼollaxa ra iquemaqchet, iviraʼa taqaʼen ra maiche laʼamqajnataxanaxaua añi la congregación. Qataq itauan ra ñiʼiguelaxauaʼa ana qagueta laỹipi ana deqatpi taq ana petaʼa deloqtegueʼ na qauem lhuennataxacpi.
Qomiʼ nmittaique ra seqataq. «Ñeʼeguelaxat qome sachegoxotchiguiña cam huaña coʼollaq deqat», ʼenapec ñi Jehová. Nataqaʼen ỹachaxanapec: «Ñimitaique qome ana qaguetapi maye deqat» (Ezequiel 34:12, 16). Ñi Jehová qaca aca qagueta ʼenaʼam ra icoʼ rqat. Ñi maye ỹaỹaten ra huoʼo aca ʼoonole anamayepi ra deqat, nache nmittaique taq ntootapeguec ra ỹanata (Mateo 18:12-14). Ỹoqoʼoye, ñi maye ỹamataʼac na ʼeesa lʼonataxanaxanecpi: «Qamiʼ qaguetapi nache qamiʼ ỹalamaqtepi, qataq qoñeetaigui na iquiaʼaxanataxanaqaʼ» (Ezequiel 34:31). ʼAm nache qonetaʼam aca ʼoonole anaʼana qaguetapi.
Ñi Jehová qaca aca qagueta ʼenaʼam ra icoʼ rqat. Ñi maye ntootapeguec ra ỹanata acamaye.
«ʼAuoʼotec qome da qanachaalataxac da ʼeetaʼam so huaʼauchiguiñi coʼollaxa»
¿ʼAuaỹaten táʼaencoʼ ra ʼam iỹaxaatega ñi Jehová ra ʼaviʼiguelaxauaʼa ñi maye? Chaʼaye huotaique ra ʼam ʼauʼamaqchiguiñe. Ñi maye ỹachaxanapec ra talec naqʼen ca qalota ʼachiquiaxacpi ana lalamaqte qaguetapi (Ezequiel 34:26). Qaq naua nʼaqtaqa saishet ra quiʼitchiguilo. ʼAm mashe ʼauaỹaten ra ỹataqta ʼeesa ramaye.
ʼAntoueetaʼac coʼollaxa so ʼananoma ra nquictauec ra ʼauauatton ñi Jehová. Saloqnaxanaxa: coʼollaxa ra ʼauaỹaten ra lʼenaxat ñi Dios taq ra ʼeetapeguec ñi maye na shiỹaxauapi. ¿ʼAntoueetaʼac ra qalcata so ʼam iʼañaqchet ra ʼaualectaigui na ʼarqaỹañecpi ana asambleas? Taq coʼollaxa naxa ra ʼauaxatem na shiỹaxauapi na huetalec noʼon nʼaxaỹaxac aye la Biblia, ¿ʼeesa naxan ra ʼam machiguiñe ra ʼavireuaʼa ye ʼarmaʼ taq ltaʼaraic ra ʼantonaxac?
ʼAm ishet ra ỹoltaxa ʼananomteguet reʼera. Coʼollaxa so lʼonataxanaxanecpi ñi Dios so natamnaxac ʼeetaʼ: «¡Ña qomiʼ ʼauaʼaqtaʼalo qome da ʼam sheʼeguelaxasoqot, yaqtoʼ ʼam sheʼeguelaxasaxa! Qataq ʼauoʼotec qome da qanachaalataxac da ʼeetaʼam so huaʼauchiguiñi coʼollaxa» (Lamentaciones 5:21). Ñi Jehová ỹasateguetpi, nache so lauoʼ ỹoltaxa ỹauoʼo ntonaxac ra roʼonataxanot (Nehemías 8:17). Ñi maye taqaʼen nache ʼam ʼeetec naqaʼen reʼera.
Qalaq naiʼctaxa ca huotaique ỹiʼigueloqot ñi Jehová taqaʼen rataỹaʼaguet na nqalanaxacpi. Nagui semetenaq négueʼt neʼena nqalanaxacpi taq ʼeetec ra ishet ra ʼanauec.
