ʼAm qarauotaxat qarqaỹa:

ʼAm auaỹaten, aye la Biblia iʼaxat ra huetalec na yoʼoqchigui shiỹaxauapi. Nlaqtelec ra nʼaqtaguec na ỹallipi taq na alpi laxaraicpi maye qalota so lʼoquiaxac taq ra lataxac «ỹataqta ʼeetaʼama qomiʼ» (Santiago 5:17). Somayepi huoʼo na huaigui na qalota nqalanaxacpi taq nhuogoxoyec, qoʼ iuet ye lauel souaxat ra ỹoʼot ca lỹa lʼonataxanaxanecpi ñi Dios. Taqaʼen somayepi huoʼo na ipataxañe na maiche lpeʼenaxacpi.

¿Ỹataqta ʼeesa ra ỹalat ñi Jehová seʼeso shiỹaxauapi laxaraicpi? Saishet. Qalota somayepi ʼeetaʼama ra lataxac so salmista ra natamnot ñi Jehová, ʼeetaʼ: «Ñesomaxaatapiguiʼ coʼollaxa sheetaʼam aca qagueta da deqat, qaq ỹoqoʼoye ʼauanac qome da ʼanmitaique neʼena ʼaramaxashec, chaʼaye aỹem sa secouaʼaisalo naua ʼaramaxasoxonaxaco» (Salmo 119:176). ¿Huoʼo naxa ra nache ʼeetec ra ʼarcuennataxac?

Ñi Jehová huanna ra icouaʼai na lʼonataxanaxanecpi maye caʼai añi laỹiʼ ana qaguetapi. Nachaqdata ra nmittaique namayepi; huoʼo naxa ra ỹauotaʼa na nqaỹañecpi añi la congregación. ʼAuennataxalec cam ʼeetecoʼ coʼollaxa ñi Jehová ra itauan so Job, maye huaigui so qalota nqueʼejnaxacpi, qaỹaloqnaxana: qalota ra lhuenaxanaxa, ileu so lauotaxatpi taq so ltaʼaraic lhuetaxanaxa. So Job taqaʼen huaʼaqtega na laʼaqtacpi quiʼaq chigoqoʼot na shiỹaxauapi maye qaipettega taxa ra itauan somaye. ʼEesa mqueʼ ra huanna ỹalat ñi Jehová, qalaq huoʼoi so naʼaxatel ra lmejnaxanaxac saỹaỹamaxañe (Job 1:22; 2:10). ¿Cam ʼeetec coʼollaxa ñi Jehová ra ỹaỹamaxajñe ra lmejnaxanaxac somaye?

Ra lỹa lataxac ra ỹoʼot reʼera ỹauotaʼa so lỹa lʼonataxanaxanec, Elihú. Coʼollaq ñaq iʼaxatac so Job ra laquicoxo, nache so Elihú huaʼauñe nʼaxaỹaxana, qataq ime nache ỹanem so lmejnaxanaxac. ¿Négueʼt so iʼaqtaxanem? ¿Petaʼa nmit? ¿Petaʼa nlaxanec yaqtoʼ ỹoʼot ra lasouaxashet qataq ra laʼaloxo? ¿Ỹachaxan ra nʼamqajnaxac? Saishet. Iraxanapec so espíritu santo ñi Dios, so Elihú ʼenapec: «Chaʼaye ʼam qataq aỹem, nache shenaqtaʼaʼt da souaqtoʼot Ñim Loʼonatac ʼEnauacna, aỹem nataqaʼen aỹem qaỹachegoxotaigui na ʼalhua coʼollaq aỹem qaỹoʼot». Ime nache ʼenapega ra saishet da ñeʼetega, qataq saishet ra nomteguet ra qaỹamaqtalec cam iʼaxat (Job 33:6, 7). Saishet ra nquigaxateec ra laquicoxo so Job, ndotec ra ỹanem so noʼon nqataxac qataq so nʼañaqtaxanaxac iuetaique somaye.

ʼEnaʼama seʼeso qananomaxa qomiʼ soʼotaq anaʼana nmejna. Huaʼauñe ñaʼaxaỹaxanaxa na ỹoʼottaʼat qarqaỹañecpi maye caʼai añi congregación qataq seuennataxanaxalec nam huaigui (Proverbios 18:13). Nache sauoqtaʼa ra ltaunaxanaxac ra ʼatamnaxac, ñimitaq na nʼaqtaguec ỹachaxan aye la Biblia ra ʼeetec ñi Jehová itauan so huaʼau laʼaqtaxanaxanecpi maye ʼeetaʼam ra huaigui. Nache paʼatec, qaicotaxanaʼat na nʼaqtaguecpi ana la Biblia na naloqnaxanaxatpi neʼenaua naʼaxaʼte yaqtoʼ qoỹiriñe neʼena nmejna. ʼAm seỹaxanaxa ra ʼauqochaʼa da ʼautaxaỹaxan. ʼAuaconguet ra maiche qarauotaxanaqtaic.

Cuerpo Gobernante na Testigopi ñi Jehová