LAỸI 4
Ra ipataxañe ra nquiyaqteỹaxac na nasouaxashet. «ʼAuỹouec na ỹasouaxashetpi»
«Selalec so nʼonatac maye ỹoʼot ra ʼonaxaic na ỹogoxoshetpi ye imaʼ, qalaxaye ỹoʼot ra salegueuaʼa na saỹaỹamaxaren ñi Jehová. Salegueuaʼa na fiestapi maye ỹoxoreetac na shiỹaxauapi, salegueuaʼa ana política taq ivira taqaʼen ra sauaʼa añi iglesia. Queuoigui so cuarenta viʼiyel ra salat ñi Jehová. Queuoigui na viʼiyel, nquiguec ra lqalaic ra selaʼa ra aiem ichoxoren ñimaye. Chaʼaye nataqaʼen aiem saishet ra ñichoxoreelaʼt, souaxat ra saỹaten na ỹataqta ʼeesa lataxac, qalaq ñaq ʼeeta ra ilcaʼauʼa so nqaʼaic saỹaỹamaxañe» (Martha).
NA NASOUAXASHETPI maye ipataxañe ra qarquiyaqteỹaxac ishet ra ỹaguec ra qapatta. So ntaʼa David huoʼo ra ltaʼaraic lhuogoxo souaxat na lasouaxashetpi, ỹoqoʼoye ỹiriñe: «Namaye ỹataqta qapaʼatta, saishet da ñaloʼoguet» (Salmo 38:4). Huoʼo na qarqaỹañecpi ivittaʼa ra saq maguiñe chaʼaye ipettega ra ñi Jehová huanna ra ichoxoren (2 Corintios 2:7). Nache ¿ʼarcuennataxac ra icoʼ ʼam qaỹoqta ñi Jehová souaxat coʼollaxa na ʼarasouaxashetpi? ¿Petaʼa ʼarcuennataxac ra ltaʼaraic na ʼarasouaxashetpi ra ñimaye huanna ra ʼam ichoxoren? Saishet ra sauʼamaxañe, ñi Jehová huotaique ra ʼam itauan.
«Ña qauanaqui da ñecotaỹaqapigui deʼera lataxac»
Ñi Jehová huanna ra imaxaguet cam iuet ra ỹoʼot ye qauem. Ndaʼ ra: huotaique itauan camaye. So naloqnaxanaxat ñalec maye daqatauec, so Jesús iʼaxat ra so ñalec caʼai ye lmaʼ yaqtoʼ ỹoʼot na qauem, qalaxaye huoʼo so naʼaq lcaʼauʼa ra ỹiʼiguelaxauo. Nache ¿ʼeetec coʼollaxa so ỹiʼiguelaxauo? «Qaq coʼollaq ña qaỹataʼaguet [so llalec], nache so ltaʼa ỹauaateguet somaye. Nache ỹataqta huoʼo da lchoxonnataxanaxa. Nache nqalgoqtaʼaguet. Qaq coʼollaq ivireguet, nache nqapaltagueʼ qataq napigoqtagueʼ» (Lucas 15:11-20). Ñi Jehová nache ʼenaʼam seʼeso ntaʼa soxoraic taq choxonnataxanaxaic. ¿Huotaique ra ʼanquigot ñi Jehová, qalaxaye ʼarcuennataxac ra ñaq icoʼ ʼam qaỹoqta? Ỹataqta ʼauaỹateeta ra ñimaye ʼam iuattaʼaguet ỹauotaʼa ra ỹauatchiguilo naua lapiquel.
¿Petaʼa ʼapettega ra qalota na ʼarasouaxashetpi qoʼ ỹaguec ra ltaʼaraic, nache ñi Jehová saishet ra ʼam ichoxoren? Ra nachi ʼeetec reʼera, nache ʼacuennataxalec ye Isaías 1:18, ñi Jehová ʼenapec: «Ña qauanaqui da ñecotaỹaqapigui deʼera lataxac, naʼaictoxoʼ da ỹataqta togaxaraic na qarasouaxashichi, qalaxaye Aỹem soʼot qome da ỹataqta ỹapagaq ʼeetaʼam aca aloñi». Nachi ʼeetec, ñi Jehová ishet ỹapalaxat ivittaʼa taqaʼen na nasouaxashetpi maye icoʼ qaica ca ỹapalaxat ʼenaʼam ca lchiỹaxataxac ca nqoʼilaxat togaxaraic huecorelec ca nogoxot lapaxagaic.
Ñi Jehová saishet ra huotaique ra jec ra ʼarlagaxayec souaxat na ʼarasouaxashetpi. Ra lchoxonnataxanaxa ñi Dios taq ra machiguiñe ye ʼarvilỹaxac, ỹoʼot ra huoʼo ra ʼeesa nlagaxayec. ¿ʼEetec ra ishet ra ʼauaconguet? ʼEnaʼam so David. Huaʼauñe somaye ʼenac: «Aỹem saʼaxatem na ỹasouaxashetpi Ñim Nataxalaʼ» (Salmo 32:5). Ñi Jehová mashere ra ʼam iỹaxaneuga: «Ña qauanaqui da ñecotaỹaqapigui deʼera lataxac». ʼAuaconguet taq ʼanquigueuaʼa ñimaye ʼauotaʼa ra ʼatamnaxac. ʼAuʼaxatem na ʼarasouaxashetpi taq ʼeetec ra ʼarquiyaqteỹaxac. So David natamen ỹauotaʼa ra lpiʼỹaxac: «ʼAuỹouec na ỹasouaxashetpi». Taqaʼen ʼenapec: «ʼAm Ñatamnaxalaʼ, ʼam saishet da ʼauoʼotan aca nquiyaqte maye ỹataqta huoʼo da nquiʼic» (Salmo 51:2, 17).
Nataqaʼen huoʼo ra lỹa, so David ỹaconguet ra ltaunaxanaxac so lamaxashec ñi Dios so profeta Natán (2 Samuel 12:13). Nagui, ñi Jehová ỹanem na ancianopi ana congregación. Neʼena qarqaỹañecpi itauan cam ỹalat na lasouaxashetpi ishet ra ỹoltaxa nauochaxaua ñi Jehová. Ra ʼanʼaqtaxaneʼ na ancianopi, nache namayepi roʼogoxona aye la Biblia yaqtoʼ ʼaviʼiguelaxa ra naʼatchiguiñe ra ʼarpiʼiỹaxac. Taqaʼen ʼam natameetaʼa namayepi yaqtoʼ ishet ra imeuec ra ʼaraquicoxo taq ʼansoueeguelaʼt na qauem ʼarhuennataxacpi (Santiago 5:14-16).
Ñi Jehová huotaique ra ʼam huoʼo ca pauo ʼaravilỹaxac quiʼitta
«Ỹataqta machiguiñi qome ca shiỹaxaua maye imauec da qaỹapalaxat na lasouaxashetpi qataq da lleʼetaxaloxo»
Ra ʼauʼaxatem ñi Jehová na ʼarasouaxashetpi qataq ʼamalle na ancianopi ishet ra qalaqaic. So David taqaʼen iqalan reʼera. Aye la Biblia iʼaxat queuoigui so naʼaxaʼte qaica ca iʼaxatem so lasouaxashetpi (Salmo 32:3). Qalaxaye so iʼaxat qataq ỹaỹamaxajñe so npeʼenaxacpi nache ilaʼa so nʼachiquiaxacpi.
So ltaʼaraic nʼachiquiaxac so David, ỹiʼiguelaxa ra machiguiñe. So maye ỹiʼiriñe: «Ỹataqta machiguiñi qome ca shiỹaxaua maye imauec da qaỹapalaxat na lasouaxashetpi qataq da lleʼetaxaloxo» (Salmo 32:1). Taqaʼen iỹaxanot ñi Dios: «ʼAm Nataxalaʼ, ña ʼauauachigui na aỹap, yaqtoʼ ishet da soʼonaxan da ʼam saʼaxatec» (Salmo 51:15). So David nomteguet ra ỹasatec qataq ỹacteec ra nʼachiquiaxac ñi Jehová, reʼera iraxan ra ỹiʼoxoren ñimaye ra huetaʼaguet so shiỹaxauapi.
Ñi Jehová huotaique ra ʼam quiʼitta ra ʼaravilỹaxac. Lyaxa ra ʼauʼaxatec ñimaye qataq na ỹachaxanapecpi na laỹi shiỹaxauapi, ʼauamaqchiguiñe ra ʼauʼot, noʼon ʼarvilỹaxac qataq huesotta ʼarquiyaqteỹaxac (Salmo 65:1-4) Ñi Jehová qomiʼ iỹaxanalo: «Qaq ỹoqoʼoyi qaualachiʼ qome naua qanʼonataxacolliʼ, nachi qaviʼiguelaqỹa ñi Dios, yaqtoʼ qaỹapalaxaʼt naua qadasouaxashiʼchilliʼ. Nachi ñi qadataxalaʼ Dios ishit da qamiʼ ỹanema caua naʼaxaʼte da qaulaquiitapiguiñi» (Hechos 3:19, TBSNT).
Martha, aso naloqnaxanaxat huaʼauchiguiñe, iʼaxat: «So ỹalec queta ra aiem ỹamaqtega na nmejnapi La Atalaya qataq ¡Despertad! Ñipota ra ỹiʼiguelaxa da ñauochaxac ñi Dios. So ỹoqta qalaqaic ra sequiguioʼot ñi Jehová ra aiem ichoxoren souaxat ʼenauac na ỹasouaxashetpi. Qalaxaye soʼot ramaye. Yoqta saʼaalaq, !queuoigui so cuarenta viʼiyel ra ỹoltaxa sheʼeguelaxa ñi Jehová! Ra ñaqtaguec ỹachaxan ra naiʼctaxa ra qalota na viʼiyel ra salataq ñi Jehová, ñimaye qomiʼ ỹanem ra ỹoltaxa ñanomaqteguet ra lauotaxanaqtaic qataq ra sonaqtaigui nam npueblo».
