PAXAGUENAXAT 01

¿ʼEetec ra ʼam itauan aye la Biblia?

aỹeglaxattague

Qalota na ñinataxanaqteguelaʼt ra achaalataxac, ra queʼejnaxac, ra nleuaxa qataq ra qomchiye. Taqaʼen huoʼo ra qarhuogoxo souaxat na nhuenaxanaxa ye naʼaq, ra huoʼo ca qonoq, qoʼ ra machiguiñe ca qarhuoʼ lʼecpi. Qalota na shiỹaxauapi nanomteguet ra aye la Biblia ỹasateguet reʼera ʼamaqtaqaic nnataxanaxacpi qataq ỹanem ra noʼon nqataxacpi ra nmariaxac. ¿ʼAuʼamaqten ra aye la Biblia ishet ra itauan ca ʼarauattonatac?

1. ¿Négueʼt naua nnataxaco ỹasateguet aye la Biblia?

Ana la Biblia ỹasateguet na ʼamaqtaqaic nnataxanaxacpi ʼeetaʼam ra: ¿ʼeetec so huoʼo ra achaalataxac?, ¿taʼaencoʼ ra sonaqtaina?, ¿taʼaencoʼ ra huoʼo na nqueʼejnaxac na shiỹaxauapi soxoraicpi?, ¿négueʼt ca aloic na leuaxaicpi? Ra ʼenauac nmitaique ra nlagaxayec, ¿taʼaencoʼ ra qalota na alaataxacpi? Qataq, ¿ʼeetec ca aloic qomchiye ana ʼalhua? Ishet ra ñimitaqaique ra lasataxac neʼena nnataxacpi huaigui aye la Biblia. Qalota na shiỹaxauapi mashe ye ỹoʼot reʼera, huoʼo ra ntonaxac souaxat na ỹanata.

2. ¿ʼEetec ra qomiʼ itauan aye la Biblia ra ñitonaqtapeguec ra qarmariaxac?

Aye la Biblia qomiʼ ỹanem na noʼon nqataxacpi. Saloqnaxanaxa, ỹapaxaguenec na nhuoʼ lʼecpi ʼeetec ra yoqta machiguiñi. Qomiʼ iʼaxatem ʼeetec ra sataỹaqaʼaguet ra nasamñi na qarcuennataxacpi qataq ñitonaqtapeguec na qarʼonatac. Queuoigui ra ñapaxaguenaqtega neʼena, nache ʼam ʼanapaxaguena ra ʼenac aye la Biblia souaxat neʼena qataq na qalota laỹipi napaxaguenaxacpi. Ỹataqta ʼauaỹateeta ra «ʼenauaque naua ñiyiguiʼshe», ʼenauac na ʼenac aye la Biblia, huoʼo ra naigui (2 Timoteo 3:16).

Ana nmejna saishet ra nmenguet aye la Biblia. Ndaʼ ra ʼam itauan ra ʼauauatton ayemaye. Ỹoqoʼoye ʼam saʼañaqchetaq ra ʼautaxaỹaxan ʼenauac na textopi huetalec na paxaguenaxatpi, nache ʼaualoqnaxanguet na ʼanapaxagueetega.

ÑIMITAQ RA PAXAGUENAXAT

Semetenaq ʼeetec aye la Biblia mashe itauaatac na laỹipi shiỹaxauapi, négueʼt ca ishet ra soʼotaq yaqtoʼ ñoqopitaxa ra setaxaỹaxanaq qataq néguet ca ñiqataxauec ra huoʼo ca qomiʼ itauan ra saỹatenaqteguet na huetalec.

3. Aye la Biblia qomiʼ ỹauecaʼaguet

Ana la Biblia ʼenaʼam ca chaxaugue neraxa ra iviraʼa ra icoỹarague ʼenauac na qoyec. Ishet ra soʼogoxonaxa yaqtoʼ llicaʼaxauʼa ra noʼon qoyiquiaxac qataq ra saỹatenaq ʼeetec ca qomchiye.

Qautaxaỹaxañi ye Salmo 119:105 qataq qaumalligui neʼena:

¿ʼEetec ra lcuennataxac so ỹiriñe neʼena salmo ana la Biblia?
¿ʼEetec ca ʼarcuennataxac ʼam ana la Biblia?

4. Ana la Biblia ỹasateguet naua qannataxaco

Aso ʼalo ilalec ra aye la Biblia ỹanem ra lasataxac na nnataxacpi ihuogoxoqchetac queuoigui qalota viʼiyel. Qaumichiñi na VIDEO qataq qaumalligui neʼena:

VIDEO: ¡Huanna ra ʼaxaanec ra ʼanaquitaxac! (1:48)

¿ʼEetec ra lataxac naua nnataxaco asaʼaso ʼalo so video?
¿ʼEetec ra itauan asomaye ra napaxaguena ana la Biblia?

Ana la Biblia qomiʼ iỹaxanalo ra soʼotaxañe na qannataxanaxacpi. Qautaxaỹaxañi ye Mateo 7:7 qataq qaumalligui neʼena:

¿ʼAuʼamaqten ra aye la Biblia ishet ra ỹasateguet na ʼannataxanaxacpi? ¿Négueʼt caua?

5. Ishet ra qancopitaʼa ra ntaxaỹaxanataxanaxac aye la Biblia

Qalota na lauela ra itaxaỹaxan ana la Biblia qataq nqatec ra naigui Qaumichiñi na VIDEO qataq qaumalligui neʼena:

VIDEO: Qaitaxaỹaxan ana la Biblia (2:05)

Na nsoxotpi neʼena video, ¿ʼeetec ra lmejnaxanaxac ra ntaxaỹaxanataxanaxac?
¿Táʼaencoʼ ra lauela namayepi ra itaxaỹaxan ana la Biblia?

Ana la Biblia huetaigui na napaxaguenataxanaxacpi maye qomiʼ iʼañaqchet qataq qomiʼ ỹanem ra aquitaxac. Qautaxaỹaxañi ye Romanos 15:4 (Dios Nvita na Shiỹaxauapi [TBSNT]), qataq qaumalligui neʼena:

¿ʼArauela ra nquictashiguem ra ʼauaỹaten na naʼañaqtaxanaxac qataq aquitaxac huetaigui aye la Biblia?

6. Ishet ra saỹatenaqteguet aye la Biblia ra huoʼo ca qomiʼ itauan

Huoʼo na ishet ra ʼoonolec ra itaxaỹaxan aye la Biblia, qalaq taqaʼen qalota na itauan ra ỹaconguet ra ltaunaxanaxac ca lỹa. Qautaxaỹaxañi ye Hechos ye 8:26-31 qataq qaumalligui neʼena:

¿Négueʼt ca qomiʼ itauan ra saỹatenaqteguet aye la Biblia? (Qaumichiñi ye versículos 30 qataq 31).

So etíope iuenaique so lỹa ra itauan ra ỹaỹateeteguet ana la Biblia. Nagui qalota na itauan ra napaxaguena ana la Biblia ra ỹaconguet ra ltaunaxanaxac ca lỹa.

HUOʼO NA NASAXAUEC RA: «Qanapaxaguena ana la Biblia qaica ca naigui».