PAXAGUENAXAT 02

Ana la Biblia qomiʼ ỹanem ra aquitaxac

aỹeglaxattague

ʼEnauac ana ʼalhua, na shiỹaxauapi rataỹaʼaguet na nqalanaxacpi nache ỹoʼot ra ỹaguec ra laquicoxo, lhuogoxo qataq nquiʼic. ʼAm, ¿nachi ʼeetec so qouaigui? Petaʼa huoʼo ra ʼanqueʼejnaxac souaxat ra nalolaxa qoʼ ra ileu ca ʼarauotaxat, nache petaʼa ʼannataxateguelaʼt ra huoʼo ca naʼaq ra imeuo reʼera. Ana la Biblia ỹan ra nasataxac maye qomiʼ nmanaqchet.

1. ¿Négueʼt ca aquitaxac ỹan aye la Biblia?

Ana la Biblia iʼaxat taʼaencoʼ ra qalota na nqalanaxacpi ana ʼalhua. Qataq taqaʼen qomiʼ ỹanem ra noʼon nʼaxaỹaxac ra neʼenapi nqalanaxacpi huoʼo ca logaʼt qataq yaqtaʼa ra imeuo. Na ỹachaxanapecpi aye la Biblia ishet ra ỹanem ʼam «cam ñaq natauo maye nlaqchigui da aquitaxac» (ʼautaxaỹaxan Jeremías 29:11, 12). Neʼena qaỹachaxanapecpi qomiʼ itauan nagui ra ñaloqtaʼaguet na nqalanaxacpi qataq huoʼo ra qantonaxac ra qarcuennataxac. Taqaʼen qomiʼ ỹanem ra saỹatenaqta ra ishet ra chochaq tateec ra samaxasoqchiguiñe.

2. ¿ʼEetec ra iʼaxatta aye la Biblia ca qomchiye?

Ana la Biblia iʼaxatta ra ca qomchiye na shiỹaxauapi «saishet da ileu, nataqaʼen saishet da ỹeʼeguelaxalec da nỹeetac, huoʼotaq da naʼalaqtapiguiñi, huoʼotaq da huoʼo da nquiʼic» (ʼautaxaỹaxan Apocalipsis 21:4). Qaica qome na nqalanaxacpi maye ỹoʼot ra qanqueʼejnaxac ʼenaʼam na nachoxoyec, na saỹaỹamaxañisat, na nalolaxapi qataq ra nleuaxa. Ana la Biblia ỹachaxanapec ra na shiỹaxauapi ishet ra ntonatan ra nachaalataxac chochaq tateec ca mataqaʼ ana ʼalhua.

3. ¿Négueʼt ca ʼam itauan ra ʼaupiʼiỹaʼa ra aquitaxac huetaigui ana la Biblia?

Qalota na shiỹaxauapi iuattaʼa ra qaỹaỹamaxajñe ʼenauacna, qalaxaye saishet ra itchiguiñi ra iʼamaqten ra ipacchigui reʼera. Ana la Biblia saishet ra nache ʼeetaʼam reʼera. Ishet ra seviraqaʼa ra sepiʼiỹaqaʼa na ỹachaxanapecpi ra ñimitaq «naua ñiyiguiʼshi lʼaqtaqa ñi Dios» (Hechos 17:11, TBSNT). Ra ʼanapaxaguena ana la Biblia, ishet ra ʼam maiche ʼalcaʼauʼa ra ʼaupiʼiỹaʼa ra iʼaxat anamaye ca qomchiye.

ÑIMITAQ RA PAXAGUENAXAT

Ñapaxaguenaxa na ỹachaxanapecpi aye la Biblia ca qomchiye. Semetenaq ʼeetec reʼera aquitaxac itauaatac nagui na laỹi shiỹaxauapi.

4. Ana la Biblia ỹan ra aquitaxac ca achaalataxac nalochiguiñe qataq chochaq tateec

ʼAmeten ye qanaloqchiiñi ye paguiñe aquitaxacpi huetaigui aye la Biblia. ¿Négueʼt ca ỹataqta ʼancopita? ¿Táʼaencoʼ?

Qautaxaỹaxañi na textopi qotaʼaguet neʼena aquitaxacpi qataq qaumalligui neʼena:

¿ʼAuʼamaqten ra neʼena textopi ỹan ra aquitaxac? ʼAcuennate na ʼarhuoʼ lʼecpi qataq ʼanauochaxauapi, ¿ishet ra itauan reʼera namayepi?

ʼAcuennataxanaxa ra nachi ʼeetec queʼeca ʼalhua qonetaña:

QAICA CA...	ʼENAUAC NA SHIỸAXAUAPI...
... queʼejnaxac, nqueroxo, qataq nleuaxa (Isaías 25:8)	... ilaʼa ra lauotaxat lauoʼ lʼecpi ỹoltaxa ncaʼalec huaña ana ʼalhua (Juan 11:25)
... huoʼo ca lalolaxa qoʼ ra sanaloguiñe na lʼoquiaxac (Isaías 33:24; 35:5, 6)	... ỹataqta noʼoita taq ra lʼañaxac ʼenaʼam na nsoqolecpi (Job 33:25)
... queʼejnaxac souaxat na saỹaỹamaxañisat (Isaías 32:16, 17)	... huoʼo na qalota aloq, ca ʼonaxaic lmaʼ qataq ca noʼon lʼonataxanaxac (Salmo 72:16; Isaías 65:21, 22)
... huoʼo ra nqueʼejnaxac souaxat na alaataxac (Salmo 46:9)	... ntonatan ca ʼeesa nlagaxayec (Salmo 37:11)
... queʼejnaxac souaxat na qauem nhuennataxacpi (Isaías 65:17)	... nalochiguiñe ca nachaalataxac qataq chochaq tateec (Salmo 37:29)

5. Ra aquitaxac huetaigui ana la Biblia ishet ra noʼonaxat ra qanachaalataxac

Souaxat na nqalanaxacpi neʼena ʼalhua qalota na shiỹaxauapi qaica ca lʼañaxac qoʼ iviraʼa ra ỹataqta ralemata. Huoʼo na ỹataqta nʼañaxat yaqtoʼ ỹaỹamaxajñe na nqalanaxacpi. Ana la Biblia ỹachaxanapec ra qaỹaỹamaxajñe ʼenauacna. Nagui ʼameten ʼeetec ra itauaatac nagui na qalota shiỹaxauapi reʼera. Qaumichiñi na VIDEO qataq qaumalligui neʼena:

VIDEO: Coʼollaxa saq saỹamaxaren na saỹaỹamaxañisat (4:07)

Souaxat neʼena video, ¿négueʼt so saỹaỹamaxañisat ihuogoxoqchetac aso Rafika?
Naiʼctaxa ra saishet ra pal na saỹaỹamaxañisat ilotaʼa, ¿ʼeetec ra itauan ana la Biblia asomaye?

Ra aquitaxac ỹan ana la Biblia qomiʼ itauan ra saishet ra qomiʼ nasaxariñe ra qaraquicoxo, qataq huoʼo ra qantonaxac ra qarcuennataxac ra ñaloqtaʼaguet na nqalanaxacpi. Qautaxaỹaxañi ye Proverbios 17:22 taq Romanos 12:12 [TBSNT], qataq qaumalligui neʼena:

¿ʼAuʼamaqten ra aquitaxac huetaigui ana la Biblia ishet ra noʼonaxat ra ʼanachaalataxac nagui? ¿Táʼaencoʼ?

HUOʼO NA NASAXAUEC RA: «Na ỹachaxanapec aye la Biblia ỹaguec ra ʼonaxaic, qalaxaye qaicolguet ra ʼeesa».

¿Táʼaencoʼ ʼauʼamaqten ra huoʼo ra naigui ra ʼanmit ra ipacchigui na ỹachaxanapecpi aye la Biblia?

NA ʼAMAQTAQAIC

Ana la Biblia ỹachaxanapec qome ca achaalataxac nlaqchigui ra nlagaxayec, reʼera qomiʼ ỹanem ra aquitaxac qataq qomiʼ itauan ra qolaqta ra ñaʼañaxataqtaguet na nqalanaxacpi.