ʼEnauac na nʼamaqtenaxaco huoʼo na shiỹaxauapi huesoxoipi taq saq shepecaic. Taq noʼon nʼaxaỹaxac ra qaỹaỹaten ra, ñi Dios ra iloʼoguet na mayepi. Qalaxaye huoʼo ca qaỹoʼot lappa na qauemsat qaỹoʼoxona ra lʼenaxat ra nʼamaqtenaxac (2 Corintios 4:3, 4; 11:13-15). Naua naxaỹaxanaco saỹaqtega ra huoʼo na nʼamaqtenaxaic ỹalectaiguilo na ỹoʼot na qauempi, huoʼo na ỹalauat na shiỹaxauapi, nalaataxac, taq huoʼo na ncat na ñaq naʼasa. ¡Neʼena saỹaỹamaxaren na ʼamaqtenaq ʼonaxaic ca lquiyaqte! Autaxaỹaxan Mateo 24:3-5, 11, 12.

Qaq na ʼeesa ʼamaqtenaxac ỹiʼoxoren ñi Jehová, qaq ra saq ʼeesa inogoqchit. Chaʼaye ỹapaxaguen ra saq ʼeesara lataxac ñi Dios taq ra lataxac na leuaxaicpi, taqaʼen ỹapaxaguen na saq huetalec aye la Biblia. Qalaxaye ñi Jehová nshitaique na shiỹaxauapi ra ỹaỹaten ra ʼeesa ñi maye. Autaxaỹaxan Ezequiel 18:4 taq 1 Timoteo 2:3-5.

Ñi Dios sa ỹaỹamaxaren na nʼamaqtenaxacpi ra ʼenac ra ỹauotec, qalaq ỹaqaʼa ra taigue, ỹauotec na ỹoʼottapec so Satanás (Santiago 4:4). Aye la Biblia iʼaxana ʼenauac na saq ʼeesapi nʼamaqtenaxac «ỹataqta ʼamaqtaqaic Babilonia» qoʼ Babilonia la Grande. Neʼena neʼenaxat qanqatec so togoshaxapec la ciudad mayi chigaqaigui na saq ʼeesa nʼamaqtenaxac quera coʼolloxochiye so Noé naʼaxaʼte. Pasaʼa ñi Dios nqatec nqueʼelacteuo na nʼamaqtenaxac ra ỹatenachet taq naʼaxat na shiỹaxauapi. Autaxaỹaxan Apocalipsis 17:1, 2, 5, 16, 17 taq 18:8.

Qalaq ñi Jehová sa icouaʼai na shiỹaxauapi soxoraicpi na ỹottaʼaʼt netaigui na saq ʼeesa nʼamaqtenaxac nagui ñi maye laỹonaʼt. ¿ʼEetec ra ỹoʼot reʼera? Ỹapaxaguen ra ʼeesa. Autaxaỹaxan Miqueas 4:2.

Ñi Jehová iqochalo na shiỹaxauapi ra ỹauotec ra ʼeesa taq nshetaique ỹoʼot ca ỹaỹamaqchiguiñe. Ỹoqoʼoye ỹamaq ra ỹalat na nʼamaqtenaxac saq ʼeesa. Ra ỹataqta qaỹauotec nache naralaxat ra lataxac ra noʼon, nache ỹaỹamaxareeta ñi Dios. Autaxaỹaxan Apocalipsis 18:4.

So siglo I, lappa na shiỹaxauapi ʼonaxaic lquiyaqte ỹasat, nʼtonata so ltaxaỹaxac soua namaxashecpi. Ñi Jehová ỹapaxaguen seʼesoua shiỹaxauapi ralaxaic lataxac ra lcaʼalaxa maye nlaqchigui ca ʼonaxaica taq naquitaxac. Nache ʼenaʼam so mayepi qomiʼ taqaʼen sasataq ra ltaxaỹaxac aye la Biblia, ỹoqoʼoye sanalguet ñi Jehová huaʼauñe. Autaxaỹaxan 1 Tesalonicenses 1:8, 9 taq 2:13.

Ñi Jehová ỹaconguet na ỹaxañe ra nʼamaqtenaxac saq ʼeesa, nache ỹacona ra nʼamaqtenaxac ra ʼeesa. ʼEnauac na mayepi mashe ỹacoteguet ra nauochaxac taqaʼen ye lauochaxac na qarqaỹañecpi cristianopi taq ishet ra iviʼ ra huoʼo qome ca nachaalataxac tateec. ¿Alauela ra huoʼo neʼenaua nachetactaxanaco? Autaxaỹaxan Marcos 10:29, 30 taq 2 Corintios 6:17, 18.

Qome ñi Jehová nlaxajñe na nʼamaqtenaxac saq ʼeesa, ndoʼ ca machiguiñe ana aʼlhua. Ana maye sa ishet ra ỹatenachet na shiỹaxauapi taq sa ishet ra isoguipi. Na shiỹaxauapi ʼenauac ỹioʼoxoren ñi ʼonolec Dios ʼeesa. ¡Sanʼonolec nʼaxaỹaxac neʼena! Autaxaỹaxan Apocalipsis 18:20, 21 taq 21:3, 4.