Ñi Dios ỹaxana ʼenauac na shiỹaxauapi na nahuoʼopi ra qanquigot ñi maye ra natamen (Salmo 65:2, [TNM]). Qalaxaye reʼera sa ishet ra naigui ra naxaỹaxana, qoʼ nasheeteguet, ʼenauac na natamnaxac. Aye la Biblia ʼenac yaqto «saqca ca nqanaxat» ca natamnaxac, nache ca shiỹaxaua ỹahuoʼo ca lalamaqte lhua (1 Pedro 3:7). Coʼollaxa so israelitapi ỹoʼot na qauem ra nʼqueʼelataxac, nache ñi Dios sanaxaỹaxanalo na mayepi. Qalaxaye, ñi maye naxaỹaxana caua huoʼoi ca lasouaxashet ra huoʼo ca ntogotaxac. Autaxaỹaxan Isaías 1:15 taq Hechos 3:19.

Natamnaxac huetaigui ra shioxorenac ñi Dios ỹoqoʼoye ndotec ñatamenaqot ñi Jehová (Mateo 4:10; 6:9). Taqaʼen, souaxat qomiʼ huoʼo ra qarpenaxac, nache ra ñatamenac soʼogoxonaxa ra lʼenaxat so Jesús, chaʼaye so maye ileulec ra qarasouaxashetpi (Juan 14:6). Ñi Jehová saỹaỹamaxaren ra qaỹeglaxattague na natamnaxac, chaqrata ra qanatamnaxac chigoqchigui añi qarquiyaqte. Autaxaỹaxan Mateo 6:7 taq Filipenses 4:6, 7.

Ñi Ỹoʼotapecna naxaỹaxana naua natamnaxac paỹahuoʼo lauel (1 Samuel 1:12, 13). Qomiʼ ỹanalo ra saxaỹet ñatamenac, ra yoʼoxoñe taq ivira ye ime ca naʼaq. Ra sequiaʼac huoʼotaq huoʼo ca qanachaataxac nquejnaxac. Autaxaỹaxan Mateo 15:36 taq 1 Pedro 5:7.

Na soʼonaqtaʼa qomiʼ qoleteqoto na shiỹaxauapi qaica ca lpiʼiỹaxac ñi Dios taq imaʼat ra qaỹien ra qaỹachaxanapec ca ndoʼ qome ca nlaxagayec ana aʼlhua. Neʼena ishet ra qomiʼ  iqalviaqcheʼet ra qarañaxaco ra nquigaxanqot ñi maye (2 Timoteo 3:1, 4; 2 Pedro 3:3, 13). Ỹoqoʼoye seuenac ra ñaponaxaʼat na qaraỹepi cristianopi nache huoʼo ca qarañaxac. Na mayepi taqaʼen iuen ra huoʼo ca nʼañachitaguec. Autaxaỹaxan Hebreos 10:24, 25.

Ra llaponaxaʼat na shiỹaxauapi ra ỹauotec ñi Dios nache ishet ra nomteguet ra soʼonaqtoʼot ñi maye. Na naponaxac na testigopi de Jehová qomiʼ ỹañema ra ishet ra qomiʼ ỹapaxaguenque ra naloqnaxanaxat ra lpiʼiỹaxac ca qaraỹepi. Autaxaỹaxan Romanos 1:11, 12.

Aushet ra auennataxan, na mashe anapaxaguena, ñi maye ana la Biblia. Auennataxan na ỹoʼot, naua lqataxaco taq naua ỹachaxanapec ca nhuennataxac taq ra ñatamnaxac ishet ra ʼam itauan ra auaỹateeteguet ra lauochaxac taq ra laỹajnaxanaxac ñi Dios. Autaxaỹaxan Josué 1:8 taq Salmo 1:1-3.

Ndotec aushet ra qonetoʼot ñi Dios ra huoʼo ca arpiʼiỹaxac ñi maye. Qalaxaye ram npiʼiỹaxac ʼenaʼam ca ncaʼaltauec: iuen ra queta ra aquiaxan, qaq reʼera qaỹoʼot ra auennataxan táenʼco ra auamaqten naua aramaqtenaxaco. Autaxaỹaxan Mateo 4:4 taq Hebreos 11:1, 6.

Ñi Jehová iqochalo naua ỹauotec ñi maye. Ishet ra ilogueʼelo ca machaqca ca ishet ra ỹahuoʼo ca quejnaxac, ra lpiʼiỹaxac taq ra naquitaxac ra nachaalataxac tateec (Salmo 91:1, 2, 7-10). Iqataxaʼan naua nataxaco ca ỹaren ra nachaalataxac taq ntonaxac, taq ỹapaxagueʼn négueʼt ca ỹataqta ʼonaxaic lataxac taq ncaʼalaxa. Autaxaỹaxan Salmo 73:27, 28 taq Santiago 4:4, 8.