PAXAGUENAXAT 2
¿Négueʼt ñi Dios?
1. ¿Táenʼco ra seuenac ra shioxorenac ñi Dios?
Ñi Dios ỹoʼot ʼenauacna. Ñi maye tateec ra lcaʼalaxa taq qaica ca logaʼt (Salmo 90:2). Na noʼon nʼaxaỹaxac huetalec ana la Biblia chigoqoʼot ñi maye (1 Timoteo 1:11). Chaʼaye ñi maye qomiʼ ỹanema ra qanachaalataxac, nache ndotec ñi maye ra soʼonataxanqot taq shioxorenac. Autaxaỹaxan Apocalipsis 4:11.
2. ¿ʼEetec ra lataxac ñi Dios?
Qaica ca shiỹaxaua ishet ra ilaʼa ñi Dios, chaʼaye ñi maye saq chaʼa. Ra lʼoquiaxac ñi maye qomiʼ napacalguete. Chaʼaye huoʼo ra qarapachaxac taq qarpiʼineqa (Juan 1:18; 4:24). Qaq nagui sishetac ra saỹatenaq ra lataxac ra semetenac na lʼonatacpi ñi Dios. Na ỹottaʼaʼt alaỹaxac ana ʼepaq taq nauoxolpi qomiʼ ỹachaxana ra qomiʼ ỹauoteque, ñi maye ỹataqta ỹajnaxanaxaic. Taqaʼen na lʼonatacpi ỹataqta salaxaic ra lʼañaxac. Autaxaỹaxan Romanos 1:20.
Taqaʼen ishet ra sauattonac ñi Dios ra ñapaxaguenaxa ana la Biblia. Ana maye qomiʼ ʼeetec iaʼaxatema ñi maye iloʼoguet na shiỹaxauapi, négueʼt ca ncopitalo taq ca sa ncopitalo ñi maye, taq ca ʼeetec ra lataxac ca machaqca huoʼo. Autaxaỹaxan Salmo 103:7-10.
3. ¿Huoʼo ra lʼenaxat ñi Dios?
Coʼollaxa so Jesús ʼenapec: «ʼAm qadtaʼa Dios mayi qonetoʼot na piguem, ʼenauac da qaỹiʼoxoden da ʼadʼenaxat» (Mateo 6:9). Ñi Dios huoʼo ra ỹottaʼaʼt ra qaỹauatton, qalaxaye ñi maye ʼonolec ye ỹataqta lʼenaxat. Lappa na nʼaxaỹaxaco nache ỹottaʼaʼt ra qaiỹaxana, na qom ʼenac, Jehová, qaq taqaʼen qaiỹaxana Yavé. Autaxaỹaxan Salmo 83:18 Reina-Valera, (RV).
Huoʼo ra lappa na ỹiʼiriñe aye la Biblia qalaxaye so lʼenaxat ñi Dios qanqochenaxat ra nʼaqtac Ỹoʼotapecna qoʼ Nataxalaʼ. Qalaxaye so huaʼauchiguiñe so lʼenaxat ñi Dios huetalec ana la Biblia iviʼ ra siete mil. Taqaʼen ra qaỹapaxaguen na shiỹaxauapi ra lataxac ñi Dios so Jesús rogoxona saxaỹet seʼeso lʼenaxat. Autaxaỹaxan Juan 17:26, TNM.
ʼAmeten na video ¿Huoʼo ra Lʼenaxat ñi Dios?
4. ¿Qomiʼ ỹahuoʼoi ñi Dios?
ʼEnaʼam ca ntaʼa soxoraic, ñi Dios huoʼo ra lhuogoxoyec ra qarcaʼalaxa qome
Ñi Jehová ra ỹataqta qomiʼ ỹauoteque, ¿táenʼco ra ỹasheeta ra huoʼo na quejnaxac? Huoʼoi na ipetaʼa ra quejnaxac qomiʼ iegueʼetapeʼ. Qalaq yeʼeye sa ishet ra ʼeesa. Autaxaỹaxan Santiago 1:13.
Ñi Jehová qomiʼ ỹanema ra maiche ilcaʼaxaigui ca qoyec ra qanachaalataxac. Qanache ʼonaxaic ra soʼoxonaxa yeʼeye qalcaʼaguishec ra sonaxataxanqot (Josué 24:15). Qalaxaye, lappa na shiỹaxauapi lcaʼagui na qauem, ỹoqoʼoye lappa na nquejnaxacpi. Qalaq ñi Jehová iuet ra ilaʼa na qauemsat. Autaxaỹaxan Génesis 6:5, 6.
Qalaxaye ñi Jehová qomiʼ ỹauoteque nache nshetaique ʼonaxaic qanachaalataxac, pasaʼa ra ime na qaiuetpi taq qauemsat. Qalaq ñi maye huoʼo ʼeetapeguec ỹoqoʼoye ỹauotaʼa ra queta ra quejnaxac. Ye paxaguenaxat 8 qanapaxaguena négueʼt caua. Autaxaỹaxan 2 Pedro 2:9 taq 3:7, 13.
5. ¿ʼEetec ra sishetac ra inquigaxauaʼ ñi Dios?
Ñi Jehová qomiʼ ỹanema ra inquigaxauaʼ ñi maye ra ñatamenac. Ñi maye iqochalo ʼenauac qomiʼ (1 Juan 5:14). Ỹoqoʼoye qomiʼ ichoxoren taq ỹaỹaten ra qanʼañaxataxac ra soʼotaq ra ʼeetapeguec naiʼctaxa ra sa sevirac. Qanache, naiʼctaxa ra huoʼo ye qarasouaxashet ishet ra qanauochaxaua. Autaxaỹaxan Salmo 103:12-14 taq Santiago 4:8.
Qalaq ñi maye qomiʼ ỹanema ra qanachaalataxac, ỹoqoʼoye noʼon ra semataqlec ra qarauoche ñi maye (Marcos 12:30). Sachaxanac ra qarauotaxac ñapaxaguenaxa ra lataxac ñi maye taq ñaxaỹaxanaxa na lamaxasoxonacoʼ. Ra soʼotaq raʼa, qanauochaxac ñi maye inquiguec. Autaxaỹaxan 1 Timoteo 2:4 taq 1 Juan 5:3.
