PAXAGUENAXAT 10
¿ʼEetec ra ishet ra sanataxa aca ʼeesa nʼamaqtenaxac?
1. ¿Huoʼo aca ʼonole ʼeesa nʼamaqtenaxac?
«Qavichiỹaʼaguet qome nam tenataxanaxaicpi mayi ʼeetega da lʼaqtaxanaxanecpi ñi Dios». (MATEO 7:15)
So Jesús taq so lapaxaguenataqa ỹachetac so ʼonole nʼamaqtenaxac ʼeesa, so maye qaỹaloqnaxanaxac qoʼ nqaʼaic taỹaʼa ra sa imeuo nachaalataxac qalaxaye salamaiʼ na shiỹaxauapi ỹanatalo (Mateo 7:14). Ñi Dios nasheeteguet ndotec ñoxorenaxac huetalec ye lʼaqtaqa aye la Biblia. Cam ỹioʼoxoretacpi ñi Dios iuen ra ỹoʼot na ncopita ñi maye, nache ʼenauac na mayepi ʼonolec ra lpiʼiỹaxac. Autaxaỹaxan Juan 4:23, 24; 14:6 taq Efesios 4:4, 5.
2. ¿Négueʼt ca ỹaxataʼa so Jesús na saq ʼeesa ʼamqajnataxanaxaicpi?
«Namayipi ʼeetega da ỹauatton ñi Dios, qalaxayi da lataxac ỹataqta sa natenguet». (TITO 1:16)
So Jesús iʼaxatague ra huoʼo ca saq ʼeesa nʼamaqtenaxaicpi, ishepaxanaqchet na ʼeesa na nʼamaqtenaxac. Neʼenaua shiỹaxauapi taq na cultopi maiche nañiguelaʼ ʼamqajnataxai. Naiʼctaxa ra ʼenapec ra huetoʼot ye ỹataqta ʼeesa qalaxaye ỹatenacheqtac na shiỹaxauapi. Qaq ishet ra ỹataqta saỹatenaq ye ʼeesa nʼamaqtenaxac, chaʼaye sauattonaq na lataxanatacpi ỹachaxan na lataxac nateeteguet ra lʼaqtac ñi Dios. Autaxaỹaxan Mateo 7:13-23.
3. ¿Négueʼt caua ỹachetape ca nʼamaqtenaxac ʼeesa?
Semetenac ye 5 lataxaco na ỹachetac ra ʼeesa nʼamaqtenaxac:
-
Ỹauotec aye la Biblia ra ỹataqta ʼeesa Lʼaqtac ñi Dios. Nañaxat ra naxaỹaxana na lamaxasoxonaxaco aye la Biblia, sa ishet na lapaxaguenataxanaxac na shiỹaxauapi (Mateo 15:7-9). Taqaʼen ỹachetac ra iaʼaxat ra nʼaqtac taq quelec. Autaxaỹaxan Juan 17:17 taq 2 Timoteo 3:16, 17.
-
Qaỹiʼoxoren ra lʼenaxat ñi Dios, Jehová. So Jesús ỹoʼot raʼa, nache qaỹauatton ra lʼenaxat ñi Ltaʼa. Iaʼaxatem na shiỹaxauapi négueʼt ñi Jehová taq ỹapaxaguen ra natamen yaqto ra lʼenaxat ñi Dios qaiquitachet (Mateo 6:9). Ye qonetaña ¿négueʼt ca nʼamaqtenaxac ỹachetac yeʼeye lʼenaxat ñi Dios? Autaxaỹaxan Salmo 148:5, 13 taq Romanos 10:13, 14.
-
Qaiỹaxat ra Lʼonataxanaxac ñi Dios. So Jesús qanamaxalec ana aʼlhua ra iaʼaxat noʼon nʼaxaỹaxac ra Lʼonataxanaxac ñi Dios. So maye chaqsota naquitaxac na shiỹaxauapi. Ỹoʼot raʼa nache ivitaʼa coʼollaxa ra ileu (Lucas 4:43; 8:1). Taqaʼen ʼenac ra so lapaxaguenatacpi qaỹaxatec seʼeso nʼonataxanaxac. Ỹoqoʼoye ra huoʼo ca ʼam ivireua ra ʼam raqtaxanot ye Lʼonataxanaxac ñi Dios, ¿négueʼt lʼec ca nʼamaqtenaxac? Autaxaỹaxan Mateo 24:14.
-
Sa ishet ra iʼenaxat qauem ra nʼonatagueco. So lapaxaguenatacpi so Jesús sa ishet ra ỹalegueua ana politica taq na nqotaxacpi na shiỹaxauapi (Juan 17:16; 18:36). Taqaʼen sa ishet ra iʼenaxat naua lataxacpi qauempi neʼena aʼlhua. Autaxaỹaxan Santiago 4:4.
-
Ra lauochaxac ỹataqta ʼeesa. Ra lʼaqtac ñi Dios ỹapaxaguenec ra ỹauotec ʼenauac na shiỹaxaua naiʼctaxa ca na étnia. Na nʼamaqtenaxac saq ʼeesa queʼeta ra ỹañeʼ ra ltaunaxac ra nalaataxac, qalaxaye na ʼamaqtenaxaicpi ỹataqta sa ishet ra ỹoʼot yeʼeye (Miqueas 4:1-3). Ndotec ra ipacaʼa ra itauan ca lỹa, nache roʼogoxona ca machaqca logoxoshet taq ye lraqaʼ. Autaxaỹaxan Juan 13:34, 35 taq 1 Juan 4:20.
4. ¿Ishet ra auauatton aca nʼamaqtenaxac ʼeesa?
¿Négueʼt aca nʼamaqtenaxac huetalec ʼenauac aye la Biblia ra napaxaguenaxac, ỹiʼoxoren ye lʼenaxat ñi Dios taq iaʼaxatec ye Lʼonataxanaxac ñi Dios itauan na shiỹaxauapi? ¿Négueʼt ca ʼonolec nʼamaqtenaxac na huetaigui leʼeco nauotaxat taq sa ishet ra huaʼaxaua ra nalaataxac?¿ʼEetec ca armenaxanaxac? Autaxaỹaxan 1 Juan 3:10-12.
