PAXAGUENAXAT 8
¿Táenʼco ra ỹasheetec ñi Dios na qauemsat taq na quejnaxacpi?
1. ¿ʼEetec ra huoʼo na qauemsat?
Queta na viʼiyel ñi Dios ỹañe na gobiernopi ra ramaxasoxolec na shiỹaxauapi nache qailaʼa ra saqtaiguet ra ỹaỹamaxañe na qalaxasaqpi
Na qauemsat chigoqchiguiña ana aʼlhua coʼollaxa so Satanás ʼenac so huaʼauchiguiñe natenataxanaxac. So maye caiye ángel soxoraic taq sa npeʼen, qalaxaye so maye «sa ishit da huetoʼot ca ʼeesa lataxac» (Juan 8:44). So maye lyaxa ra qaỹiʼoxoren, qalaq reʼera lalamaxat ndotec ñi Ỹoʼotapecna. Qaỹoʼogoxona so natenataxanaxac ra qoỹelen aso Eva, huaʼauchiguiñe ʼalo, yaqto naxaỹaxana so maye, sa ishet ñi Dios. So Adán quegue aso lhua taqaʼen sanaxaỹaxan. Ỹoqoʼoye nagui huoʼo na quejnaxac taq nleuaxa. Autaxaỹaxan Génesis 3:1-6, 19.
Ra ʼeetec ʼenapega aso Eva ra sanaxaỹaxana ñi Dios, so Satanás chigoqtot ra nqaluaqchenaxac. Nqolguete ra nasheeteguet ñi Jehová huetalec na ntaʼalpi. Qalota na shiỹaxauapi ihuoteteguet so Diablo ra saqanashenguet ra lamaxasoxonaxac ñi Dios, nache so Satanás ñigui ra «damaxasoxonapec ana aʼlhua». Autaxaỹaxan Juan 14:30 taq 1 Juan 5:19.
2. ¿Huoʼo ra lpeʼenaxac na lʼonatacpi ñi Dios?
Na lʼonatacpi ñi Jehová ỹataqta nalochiguiñi. Soua huaʼauchiguiriñe shiỹaxauapi taq angelpi coʼollaxa na mayepi ishet ra naxaỹaxana ra lʼaqtac ñi Dios (Deuteronomio 32:4, 5, [TNM]). Ñi maye qomiʼ ỹanema ra isorec ra soʼotaq ca ỹaỹamaqchiguiñe qoʼ ca qauem. Reʼera nsotaxac qomiʼ ỹashetema ra ñaỹaxanaxa chaʼaye sauotaxac ñi maye. Autaxaỹaxan Santiago 1:13-15 taq 1 Juan 5:3.
3. Táʼainec ñi Dios nasheeteguet na nquejnaxac?
Ñi Jehová naʼañaxateguet ra nqalhuaxac ra qaỹachetalec ñi maye, qalaq huoʼo ye laloqoʼ. ¿Táʼainec? Ra ỹachaxan ra saqca ca gobierno ramaxasoxon ra, sa ishet ra huaʼaxauaʼa, ishet ra huoʼo ca ỹañe na shiỹaxauapi (Eclesiastés 7:29; 8:9, [TNM]). Mashe quetal seis mil viʼiyel ra nʼaqtaguec, nagui qaica ca saiqolguet: na nataxalapi saq talec ra nqatec ca saỹaỹamaxanisat nqachaxac, laataxac taq lolaxaqoʼ. Autaxaỹaxan Jeremías 10:23, TNM taq Romanos 9:17.
Qalaxaye ra ñashenaqta ra qomiʼ ramaxasoxolguete ñi Dios, nache huoʼo ye qanachetactaxanaxac (Isaías 48:17, 18, [TNM]). Pasaʼa ñi Jehová nqatec na gobiernopi na shiỹaxauapi. Ndotec nalguete ana aʼlhua na shiỹaxauapi huaʼaxauaʼa ye lʼonataxanaxac (Isaías 11:9). Autaxaỹaxan Daniel 7:14.
4. ¿Ca ʼeetec ra qomiʼ itauan ra nhualaxaunaxac ñi Dios?
So Satanás ʼenac ra ỹataqta ʼeesa na shiỹaxauapi ỹiʼoxoren ñi Dios chaʼaye huoʼo ca ỹañe. Qalaq qanaʼachec ye nhualaxaunaxac ñi Dios ʼenauac qomiʼ ishet ra sachaxanac ra qarataxac ra tenataxanaxaic so Diablo, taq qolaxague ye lamaxasoxonaxac ñi Dios sa ishet na ngobierno na shiỹaxauapi. Autaxaỹaxan Job 1:8-12 taq Proverbios 27:11, TNM.
5. ¿ʼEetec ra sonaqtoʼot ñi Dios?
Naua qarataxaco ỹachaxan ra shenaqtaque qomiʼ ramaxasolguete ñi Dios qoʼ sa ishet
Huaʼauñe selaqaque ʼeetec ra nshetaique ñi maye ra shoʼoxorenac taq ra soʼotaq ca ỹataqta ʼeesa nʼamaqtenaxanaxac, chaʼaye huetalec na napaxaguenaxacpi aye la Biblia (Juan 4:23). Taqaʼen ra shegaqtegue ra lliquiaxac so Jesús sa ishet ra salexaqauaʼa na politica taq na nalaataxac, ra ʼeetec reʼera nache sañashenguetaq ra lamaxasoxonaxac so Satanás. Autaxaỹaxan Juan 17:14.
So Satanás roʼogoxona ra lʼañaxac yaqto na shiỹaxauapi ishet ra ỹoʼot na nʼonataxaco qauempi. Ra soʼotanaq neʼenaua nʼonataxaco nache ishet na qanauochaxauapi taq maiche qarhuoʼlʼecpi qomiʼ ỹieʼen taq ỹoʼot ra qalaqaic na nachaalataxac (1 Pedro 4:3, 4). Ra ʼeetec reʼera, ñimitaqaique na qannaigaxauapi ỹauotec ñi Dios taq soʼotaq naua lamaxasoxonaxaco. Ra shenactec reʼera nache sachaxanac so Satanás tenataxanaxaic ra ʼenac ra qaica ca naxaỹaxana ñi Dios ra huoʼo na quejnaxac. Autaxaỹaxan 1 Corintios 6:9, 10 taq 15:33.
Qalaxaye ñi Dios qomiʼ ỹauoteque ỹoqoʼoye nqat na quejnaxacpi taq qauemsat. Ỹoqoʼoye, queʼeca ỹachaxan ra lpiʼiỹaxac ra huetoʼot ñi Dios nache ra nachaalataxac chochaq tateec neʼena aʼlhua. Autaxaỹaxan Juan 3:16.
