Awa, Akaboni aku Yehova nkhagulu ka mpatuku cha. Kweni ndisi Akhristu ndipu titesesa kulondo vo Yesu Khristu wachitanga ndi kusambiza.

 Ŵanthu akamba vinthu vakupambanapambana vakukwaskana ndi “mpatuku.” Kweni ŵanaŵaniyani vinthu viŵi vo ŵanthu anandi akamba vakukwaskana ndi mpatuku ndipuso mo vinthu venivi vileke kutikwaskiya.

•   Anyaki akamba kuti ampatuku mbanthu wo akwambiska chisopa chinyaki. Akaboni aku Yehova akwambiska chisopa chinyaki cha, kweni alondo vo Akhristu a m’nyengu ya akutumika achitanga pakusopa. Ndipu vo asambizanga ndi kuchita vikulembeka m’Bayibolo. (2 Timote 3:​16, 17) Tigomezga kuti tikhumbika kulondo vo Malemba ngakamba pa nkhani yakusopa.

•   Anyaki agomezga kuti ampatuku nkhagulu kakofya ukongwa kachisopa ko kalongozgeka ndi munthu. Akaboni aku Yehova alongozgeka ndi munthu cha. Kweni tilondo fundu yo Yesu wangukambiya akusambira ŵaki kuti: “Yumoza ndi Mbuyamwi [Mulongozgi, NW], ndiyu Khristu.”​—Mateyu 23:10.

 Chifukwa chakuti Akaboni aku Yehova nkhagulu kakofya cha, achita vinthu vo vitovya Akaboni anyawu kweniso ŵanthu anyaki. Mwakuyeruzgiyapu, nchitu yidu yakupharazga yawovya ŵanthu anandi kuleka vinthu viheni vo achitanga nge kugwiriskiya nchitu munkhwala wakutimbanyizga wongu ndi kumwa moŵa mwauloŵevu. Kweniso te ndi sukulu zo zitovya ŵanthu kuziŵa kuŵerenga ndi kulemba. Titovya so ŵanthu wo akumana ndi masuzgu nga chilengedu. Titesesa kuchitiya ŵanthu vinthu vamampha chifukwa ndivu Yesu wangukambiya akusambira ŵaki kuti achitengi.​—Mateyu 5:​13-​16