Akaboni aku Yehova agwiriskiya ntchitu Mabayibolu ngakupambanapambana pa kusambira Bayibolu. Kweni tiwona kuti ndi mwaŵi kuja ndi Bayibolu la Charu Chifya la Malemba Ngakupaturika muvineneru vo lisanirika, chifukwa mwe zina laku Chiuta, likufwatulika mwauneneska kweniso mwakuvwika umampha.

•   Kugwiriskiya ntchitu zina laku Chiuta. Ŵanthu anyaki wo afwatuliya Mabayibolu atondeka kutumbika Mweneku wa Bayibolu. Mwakuyeruzgiyapu, mu Bayibolu linyaki akulembamu mazina nga ŵanthu akujumpha 70 wo anguwovyaku kuti Bayibolu lenili lifwafuliki. Kweni mu Bayibolu lenili akutuzgamu zina laku Yehova Chiuta yo ndi Mweneku wa Bayibolu.

   Mwakupambana ndi venivi, Bayibolu la Charu Chifya la Malemba Ngakupaturika likuweziyamu zina laku Chiuta mumalu masauzandi ngo zina ili lasanirikanga mumalemba ngakwambiriya. Kweni komiti yo yingufwatuliya Bayibolu lenili yikuzumbulikamu cha.

•   Likufwatulika mwauneneska. Ndi Mabayibolu ngosi cha ngo ngakufwatulika mwauneneska nge mo Bayibolu lingulembeke pakwamba. Mwakuyeruzgiyapu Bayibolu linyaki akufwatuliya mazu nga pa Mateyu 7:13 munthowa iyi: “Sereni pageti lifinyi, chifukwa geti lisani lilongoze ku helo ndipu nthowa yaki njambula kusuzga kwendamu.” Kweni mumipukutu yakwambiriya angugwiriskiya ntchitu mazu ngakuti “pharanyiku,” ngakuti “helo” cha. Viwoneka kuti ŵanthu anyaki wo afwatuliya Mabayibolu agwiriskiya ntchitu mazu ngakuti “helo” chifukwa chakuti agomezga kuti ŵanthu aheni azamutombozgeka kwamuyaya ku motu wa helo. Kweni fundu yeniyi Mubayibolu mulivi. Mwaviyo, Bayibolu la Charu Chifya likufwatuliya mwauneneska mazu nga pa Mateyu 7:13 kuti: “Sereni pageti lifinyi, chifukwa geti lisani kweniso msewu ukulu ulongozge ku pharanyiku.”

•   Lakuvwika umampha. Bayibolu lakufwatulika umampha litenere kuŵa launeneska, lakuvwika umampha kweniso lambula kusuzga kuvwisa. Wonani chakuyeruzgiyapu ichi. Pa lemba la Aroma 12:11, wakutumika Paulo wangugwiriskiya ntchitu mazu ngo asani ngangafwatulika mo ngaliri ngangalembeka kuti “ku mzimu wo uŵira.” Chifukwa chakuti mazu yanga ngavwika umampha cha mu Chingelezi chasonu, mu Bayibolu la Charu Chifya akufwatuliya vesi lenili munthowa yambula kusuzga kuvwisa. Ilu likamba kuti Akhristu akhumbika ‘kuja akukole ndi mzimu.’

 Kusazgiyapu pakugwiriskiya ntchitu zina laku Chiuta, kufwatulika mwauneneska ndipuso kuŵa ndi mazu ngambula kusuzga kuvwisa, Bayibolu la Charu Chifya liperekeka so kwawezi. Venivi vichitiska kuti ŵanthu mamiliyoni nganandi aŵerengengi Bayibolu muchineneru chawu, chinanga mbanthu wo angafiska cha kugula Bayibolu lawu.