Awa. Akaboni aku Yehova akana cha kulonde katemera. Tiwona kuti kulonde katemera ndi nkhani yo Mkhristu weyosi watenere kusankha yija. Ndipu Akaboni aku Yehova anandi asankha kulonde katemera.

 Tikhumbisiska kulonde chovyu chakwenere chakuchipatala ndipu tiwonga ukongwa chifukwa cha nthowa zinandi zasonu zo zilipu, zo zitovya kuti ŵanthu alekengi kutama ukongwa. Ndipu titiŵawonga ukongwa madokotala kweniso ŵanthu anyaki wo agwira ntchitu zachipatala chifukwa cha phamphu lawu, ukongwa mu nyengu zakusuzga.

 Akaboni aku Yehova achita vinthu mwakukoliyana ndi ŵaraŵara a vachipatala. Mwakuyeruzgiyapu, kutuliya waka po mulili wa COVID-19 ukwambiya, Akaboni aku Yehova alutirizga kulemba nkhani pa webusayiti iyi mu vineneru vinandi, zakuchiska ŵanthu kuti alondongi ulongozgi wa mo angajivikiriya. Nkhani zenizi zisazgapu kukhumbika kwakulondo ulongozgi wakuja patalipatali, kuja pakuŵija asani asanirika ndi matenda nga COVID-19, kusamba mumanja, kuvwala masiki ndipuso kulondo ulongozgi unyaki wakukhumbika wo ŵaraŵara a boma angapereka.—Aroma 13:1, 2.

 Kwa vyaka vinandi, mu mabuku ngo Akaboni aku Yehova alemba musanirika fundu izi:

•   Munthu weyosi wakhumbika kusankha yija chovyu chakuchipatala.—Agalatiya 6:5.

   “[Magazini iyi] yizomerezga mtundu unyaki wa munkhwala kuti ndiwu wamampha ukongwa kuphara unyaki cha ndipu yisankhiya munthu chovyu cho watenere kulonde cha. Mumalu mwaki, ye ndi fundu zo zingawovya munthu yo watiyiŵerenga kuti wapangi yija chakusankha.”—Jani Masu!, ya Chingelezi ya February 8, 1987.

   “Mutenere kusankha mwija asani yimwi ndi ŵana ŵinu mutenere kulonde katemera.”—Jani Masu!, ya Chingelezi ya August 22, 1965.

•   Tilonde chovyu chakuchipatala chifukwa chakuti umoyu titiwuwona kuti ngwakuzirwa.—Machitidu 17:28.

   “Akaboni aku Yehova aluta kuchipatala kuchiwonana ndi madokotala kuti akalonde chovyu pa masuzgu ngo ŵenangu muliŵavu. Yiwu atiwuyanja umoyu ndipu achita chechosi cho ntchamampha kweniso cho chikoliyana ndi Malemba kuti aje ndi umoyu utaliku asani nkhwamachitika.”—Chigongwi cha Alinda cha Chingelezi cha July 1, 1975.

   “Akaboni aku Yehova mbakunozgeka kulonde munkhwala ndipuso chovyu chinyaki chakuchipatala. Yiwu akhumba kuti alutirizgi kuja ndi umoyu wamampha kweniso utali. Ndipu mwakuyanana ndi Luka yo wenga dokotala mu nyengu ya Akhristu akwambiriya, Akaboni aku Yehova anyaki mazuŵa nganu, nawu agwira ntchitu ya udokotala. . . . Akaboni aku Yehova atiŵawonga ukongwa madokotala kweniso ŵanthu anyaki wo agwira ntchitu zachipatala, chifukwa cha phamphu lawu pa ntchitu yo agwira. Kweniso awonga chifukwa cha chovyu cho ŵanthu ŵenaŵa apereka cho chitiŵawovya kuti avwengeku umampha pa matenda ngawu.”—Chigongwi cha Alinda, cha Chingelezi cha February 1, 2011.