•  Kumbi Akaboni aku Yehova aziŵa wuli kuti holidi iyi njakwenere cha kuchitaku?

•  Pakuti Akaboni aku Yehova achitaku cha maholidi nganyaki, kumbi ndikuti atiŵayanja cha ŵanthu a mu banja lawu?

•  Kumbi Akaboni aku Yehova akaniza anyawu kuti aleki kuchitaku maholidi nganyaki?

 Ŵechendasankhi kuti achiteku holidi yeyosi, Akaboni aku Yehova afufuza dankha m’Bayibolu. Maholidi kweniso vikondwereru vinyaki vilongore limu kuti visuskana ndi fundu za m’Bayibolu. Asani veviyo, Akaboni aku Yehova achitaku cha. Pa nkhani ya maholidi nganyaki, Kaboni weyosi wasankha yija. Kweni pakusankha, watesesa ‘kuti waje ndi njuŵi yamampha pa masu paku Chiuta ndi ŵanthu.’​—Machitidu 24:16.

 Wonani nganyaki mwa mafumbu ngo Akaboni aku Yehova atijifumba kuti aziŵi asani holidi njakwenere kuchitaku pamwenga cha. a

•   Kumbi holidi yeniyi yituliya ku chisambizu chaboza?

   Fundu ya m’Bayibolu: “Yehova watiti, ‘Mwaviyo, tuwanipu pakati pawu ndipu mujipatuwi, kweniso lekani kukwaska chinthu chakufipiskika.’”​—2 Akorinto 6:15-17.

   Kuti ajipatuwi ku visambizu vaboza vo visuskana ndi fundu za m’Bayibolu, Akaboni aku Yehova achitaku cha maholidi ngo ngasazgapu kuchita vinthu ivi:

   Maholidi ngo ngatuliya ku kusopa angoza. Yesu wangukamba kuti: “Yehova Chiuta waku ndiyu utenere kumusopa, ndipu iyu pe ndiyu utenere kumuchitiya uteŵeti wakupaturika.” (Mateyu 4:10) Mwakukoliyana ndi fundu yeniyi, Akaboni aku Yehova achitaku cha Khrisimasi, Isitala pamwenga May Day, chifukwa maholidi ngenanga ngatuliya ku kusopa angoza m’malu mwakusopa Yehova. Kusazgapu yapa, yiwu akondwere cha maholidi nge:

  •  Kwanzaa. Zina lakuti Kwanzaa “likutuliya ku mazu nga Chiswahili ngakuti matunda ya kwanza, ngo ngang’anamuwa kuti ‘vipasu vakwamba,’ ndipu venivi vilongo kuti holidi yeniyi yikutuliya ku vikondwereru va kuvuna kwakwamba vo ve mu mbiri ya ku Africa.” (Encyclopedia of Black Studies) Chinanga kuti anyaki awona kuti holidi ya Kwanzaa yikoliyana cha ndi chisopa, kweni buku la Encyclopedia of African Religion lilongo kuti holidi iyi yiyanana ŵaka ndi phwandu lo lichitika ku Africa, ndipu pa phwandu lenili vipasu vakwamba “ativipereka kwa angoza ndipuso kwa apapi akali wo akufwa nge nthowa yimoza yakuŵawonge.” Buku ili likamba so kuti: “Venivi viyanana ŵaka ndi vo vichitika pa holidi ya Kwanzaa yo yichitika ku America kweniso vyaru vinyaki.”

  •  Phwandu la mu chihanya (Mid-Autumn Festival). Ichi “ntchikondwereru cho chitumbika chiuta munthukazi wa mwezi.” (Holidays, Festivals, and Celebrations of the World Dictionary) Pa phwandu lenili pachitika mudawuku unyaki wo “anthukazi agwadiya chiuta munthukazi, ndipu venivi mu Chitchayinizi atividana kuti kowtow.”​—Religions of the World​—A Comprehensive Encyclopedia of Beliefs and Practices.

  •  Nauruz (Nowruz). “Chisopa cha Zoroastrianism ndichu chikwambisa chikondwereru ichi. Ndipu zuŵa lo achitiya chikondwereru ichi ndimoza mwa mazuŵa ngakupaturika ukongwa pa kalendala yawu. . . . Mwakukoliyana ndi mudawuku wa chisopa chenichi, pa zuŵa ili alondere Mzimu wa Msanapakati wo udanika so kuti [Rapithwin], weniwo aŵanaŵana kuti usoŵa chifukwa cha Mzimu wa Chipwepwi mu nyengu yakuzizira, ndipu achita chikondwereru chenichi ndi msanapakati pa zuwa la Nowruz.”​—United Nations Educational, Scientific and Cultural Organization.

  •  Shab-e Yalda. Chikondwereru ichi chichitika mu nyengu yakuzizira ndipu “chikoliyana ndi kusopa Mithra” yo ndi chiuta wa ukweru mwakukoliyana ndi buku la Sufism in the Secret History of Persia. Anyaki asachizga kuti holidi yeniyi yikoliyana ndi kusopa achiuta a lumwi ko Aroma kweniso Agiriki achitanga. b

  •  Phwandu la Kuwonga (Thanksgiving). Mwakuyanana ndi Kwanzaa, holidi iyi yikutuliya ku vikondwereru va kuvuna vo vitumbika achiuta akupambanapambana. Pati pajumpha nyengu, “vikondwereru venivi vingwamba so kuchitika mu matchalitchi ngachikhristu.”​—A Great and Godly Adventure​—The Pilgrims and the Myth of the First Thanksgiving.

   Maholidi ngo ngakoliyana ndi va mizimu pamwenga mwaŵi. Bayibolu likamba kuti ŵanthu “wo anozge thebulu chiuta wa Mwaŵi” mbanthu “wo akana Yehova.” (Yesaya 65:11) Mwaviyo, Akaboni aku Yehova achitaku cha ma holidi nge:

  •  Ivan Kupala. Buku linyaki likamba kuti “ŵanthu anandi agomezga kuti pa zuŵa la [Ivan Kupala] charu chituzga nthazi za masenga, ndipu asani munthu ŵe ndi chiganga kweniso mwaŵi wangasaniya nthazi zenizi.” (The A to Z of Belarus) Pakwamba, chikondwereru ichi chachitikanga ndi ŵanthu wo asopanga angoza kuti akondwere chihanya. Kweni buku linyaki likamba kuti “Chikhristu chati chayamba, chikondweleru ichi anguchisazga ndi holidi ya Tchalitchi ya [“zuŵa lakupaturika” laku Yohane Mubatizi].”​—Encyclopedia of Contemporary Russian Culture.

  •  Lunar New Year (Chinese New Year pamwenga Korean New Year). Buku linyaki likamba kuti: “Mabanja, mabwezi ndipuso achibali achita phwandu lenili pa chaka, kuti akhumbiyi anyawu vamampha mu chaka chinyaki, atumbiki achiuta kweniso atumbiki mizimu.” (Mooncakes and Hungry Ghosts​—Festivals of China) Mwakuyanana ŵaka, pa phwandu la Korean New Year “pachitika vinthu nge kusopa apapi wo akufwa, midawuku yakudikiska mizimu yiheni ndipuso yakuti vinthu viŵayande umampha mu Chaka Chifya, kweniso awombeza kuti aziŵi vinthu vo vichitikengi mu Chaka Chifya.”​—Encyclopedia of New Year’s Holidays Worldwide.

   Maholidi ngo ngakwamba chifukwa chakugomezga fundu yakuti mzimu wa munthu utufwa cha. Bayibolu likamba mwakuvwika umampha kuti mzimu pamwenga kuti umoyu wa munthu utufwa. (Ezekiele 18:4) Mwaviyo, Akaboni aku Yehova achitaku cha maholidi ngo nge mumphata umu ngo ngachiska ŵanthu kuti agomezgengi kuti mzimu wa munthu utufwa cha:

  •  Zuŵa la Maumoyu Ngosi (Zuŵa la Ŵanthu Akufwa). Buku la New Catholic Encyclopedia likamba kuti zuŵa ili “ndakukumbukiya ŵanthu wosi wo akufwa. Mu vyaka va m’ma 500 C.E. mpaka m’ma 1500 C.E., ŵanthu anandi agomezganga kuti pa zuŵa lenili mizimu ya ŵanthu wo akufwa yo ye ku purigatoriyo, yituza ku ŵanthu wo anguŵanangiya pa nyengu yo ŵenga ndi umoyu, ndipu yiwoneka nge mizukwa, afwiti, amchuwa ndi vinyaki vinandi.”

  •  Phwandu la Qingming (Ch’ing Ming) ndipuso Phwandu la Mzukwa wa Nja. Ŵanthu achita vikondwereru venivi kuti atumbiki ŵanthu wo akufwa. Buku linyaki likamba kuti pa nyengu ya chikondweleru cha Ch’ing Ming, “atotcha vakurya, vakumwa ndipuso ndalama za mapepala chifukwa akhumba kuti ŵanthu wo akufwa aleki kuvwa nja pamwenga nyota ndipuso kuti aleki kusoŵa ndalama.” Buku lenili likamba so kuti “mu mwezi wa Phwandu la Mzukwa wa Nja, [wo achita phwandu ili agomezga kuti] pa zuŵa lo mwezi uwoneka wamphumphu ndi usiku, paja kukoliyana kukulu pakati pa ŵanthu akufwa ndi amoyu kuluska mausiku nganyaki ngosi. Mwaviyo, ŵanthu atenere cha kuchita chechosi cho chingakwiyisa wo akufwa ndipuso akhumbika kuŵatumbika.”​—Celebrating Life Customs Around the World​—From Baby Showers to Funerals.

  •  Chuseok. Buku la Korean Tradition of Religion, Society, and Ethics, likamba kuti chikondweleru ichi chisazgapu “kupereka chakurya ndi vinyu ku ŵanthu akufwa.” Sembi zo apereka zilongo kuti “agomezga kuti asani munthu wafwa mzimu ulutirizga kuja ndi umoyu.”

   Maholidi ngo ngakoliyana ndi vamasenga. Bayibolu likamba kuti: “Weyosi yo . . . waloska vinthu vo vichitikengi kunthazi, yo wachita vamasenga, yo wawombeza, mufwiti, yo walowa ŵanthu, yo waluta ku munthu yo walongoro ndi mizimu pamwenga ku munthu yo wakamba vo vichitikengi kunthazi, ndipuso yo wakambiskana ndi ŵanthu akufwa . . . Yehova waseruka nayu.” (Marangu 18:10-12) Kuti aleki kuchitaku vamasenga, kweniso kusanda vinthu vakuchanya, Akaboni aku Yehova akondweriyaku cha Halowini kweniso maholidi nganyaki nge:

  •  Sinhala ndipuso Tamil New Year. “Midawuku yo yichitika pa phwandu lenili . . . yisazgapu kuchita vinthu vinyaki pa nyengu yakuŵikikiya limu vo akusanda vinthu vakuchanya awona kuti vingachitiska ŵanthu kuti vinthu viŵayendiyengi umampha.”​—Encyclopedia of Sri Lanka

  •  Songkran. Zina la chikondwereru ichi cho chichitika ku Asia, “likutuliya ku mazu nga chineneru cha Sanskrit . . . ngo ngang’anamuwa ‘kwenda’ pamwenga ‘kusintha’ [ndipu phwandu lenili] lilongo mo lumwi litende kuluta ku gulu la nyenyezi za Aries.”​—Food, Feasts, and Faith​—An Encyclopedia of Food Culture in World Religions.

   Maphwandu ngo nge mu Dangu laku Mozesi ngo ngakumala chifukwa cha sembi yaku Yesu. Bayibolu likamba akuti: “Khristu ndiyu umaliru wa Dangu.” (Aroma 10:4) Akhristu ŵeche kuyanduwa ndi fundu zo ze mu Dangu laku Mozesi lo linguperekeka kwa Ayisirayeli. Kweni yiwu achitaku cha maphwandu ngo ngazumbulika mu Dangu laku Mozesi, ukongwa ngo ngalongonga kuza kwaku Mesiya yo Akhristu agomezga kuti wakuza kali. Bayibolu likamba kuti: “Vinthu venivi ntchithuthuzi cha vinthu vo vituza, kweni chayivu ve mwaku Khristu.” (Akolose 2:17) Chifukwa chakuti chilatu cha maphwandu ngenanga chikufiskika kali kweniso maphwandu ngenanga ngasazgapu so midawuku yinyaki yo yikoliyana cha ndi vo Bayibolu likamba, Akaboni aku Yehova achitaku cha maphwandu yanga:

  •  Hanukkah. Ayuda achitanga phwandu lenili pakukumbukiya kupatuliya so nyumba yakusopiyamu ya ku Yerusalemu. Kweni Bayibolu likamba kuti Yesu wanguja Wasembi Mura “muchihema chikulu kweniso chamampha ukongwa, chakupangika [pamwenga kuti nyumba yakusopiyamu yakupangika] ndi manja nga ŵanthu cha, kung’anamuwa kuti cha mu chilengedu ichi cha.” (Aheberi 9:11) Kwa Akhristu, nyumba yakusopiyamu yauzimu yeniyi ndiyu yikusere mumalu mwa nyumba yakusopiyamu yo yenga ku Yerusalemu.

  •  Rosh Hashanah. Lenili ndi zuŵa lakwamba mu chaka pa kalendala ya Ayuda. Mu nyengu yakali, pa phwandu lenili aperekanga sembi zapade kwaku Chiuta. (Maŵerengedu 29:1-6) Kweni Yesu Khristu yo ndi Mesiya wakumalisa “sembi kweniso vakupereka vinyaki” ndipu vikuja vambula ntchitu pa masu paku Chiuta.​—Danyele 9:26, 27.

•   Kumbi holidi iyi yichitiska kuti visopa vichitiyengi limoza vinthu?

   Fundu ya m’Bayibolu: “Pe kuyanana wuli pakati pa munthu wakugomezga ndi wambula kugomezga? Ndipu pe kukoliyana wuli pakati pa nyumba yakusopiyamu yaku Chiuta ndi angoza?”​—2 Akorinto 6:15-17.

   Akaboni aku Yehova atesesa kuja mwachimangu ndi anyawu ndipuso atumbika wanangwa wa munthu weyosi pa nkhani ya kusankha vo wakhumba kugomezga, kweni yiwu achitaku cha maholidi ngo ngachitiska kuti visopa vikoliyanengi nge:

   Maphwandu ngo visopa vichita pamwenga vakuchitika vo vichiska ŵanthu a muvisopa vakupambanapambana kuti asopiyengi pamoza. Pa nyengu yo Chiuta walongozganga Ayisirayeli kuti akasere mucharu chifya mo ŵanthu ŵaki asopanga angoza, wanguŵakambiya kuti: “Yiwu pamwenga achiuta ŵawu ungachitanga nawu phanganu cha. . . . Asani wazamuteŵete achiuta ŵawu, chazamuja chiŵana kwaku yiwi.” (Chituwa 23:32, 33) Mwaviyo, Akaboni aku Yehova achitaku nawu cha maholidi nge:

  •  Loy Krathong. Pa nyengu ya phwandu lenili lo lichitika ku Thailand, ŵanthu apanga “timbali ta mani, ndipu aŵikamu makandulu pamwenga timiti takununkhira, pavuli paki atiyiponya pamaji kuti yikengi. Timbali teniti to atitipanga nge timaboti atitikamba kuti tituzgapu soka. Pa phwandu lenili akumbukiya chidindu chakupaturika cha phazi laku Buddha.”​—Encyclopedia of Buddhism.

  •  Zuŵa Lakulapiya Maubudi. Mu nyuzipepala yinyaki ya ku Papua New Guinea, mura munyaki wa boma wangukamba kuti ŵanthu wo achitaku holidi iyi “azomereza fundu zakukhumbika ukongwa zo Akhristu agomezga. Ndipu kuchitaku holidi yeniyi kutovya kuti fundu zachikhristu ziluti panthazi mu charu.”​—The National.

  •  Vesak. Buku linyaki likamba kuti: “Zuŵa ili ndi zuŵa lakupaturika ukongwa kwa Abuda chifukwa akondwere kuwaku kwaku Buddha, kujulika kumasu chifukwa cha vo agomezga, nyifwa kweniso kufika pa Nirvana.”​—Holidays, Festivals, and Celebrations of the World Dictionary.

   Maphwandu ngo ngakwamba chifukwa cha midawuku ya visopa ndipu ngakoliyana cha ndi fundu za m’Bayibolu. Yesu wangukambiya alongozgi avisopa kuti: “Mupepuwa mazu ngaku Chiuta chifukwa cha midawuku yinu.” Iyu wanguŵakambiya so kuti kusopa kwawu nkhwambula phindu chifukwa “asambiza marangu nga ŵanthu nge kuti ndi visambizu vaku Chiuta.” (Mateyu 15:6, 9) Chifukwa chakuti Akaboni aku Yehova awona kuti nkhani yeniyi njimana cha, yiwu achitaku cha maphwandu nganandi ngo visopa vichita.

  •  Epiphany (Zuŵa la Mafumu Ngatatu, Timkat, pamwenga Los Reyes Magos). Wo achita phwandu lenili akumbukiya akusanda nyenyezi wo anguluta kuchiwona Yesu pamwenga akumbukiya ubatizu waku Yesu. Phwandu lenili “lichitiska kuti matchalitchi ngachikhristu ngayambi kuchitaku maphwandu nganyaki ngo achitanga ŵanthu wo asopa angoza, ngo ngatumbika chiuta wa maji ngakwenda kweniso misinji.” (The Christmas Encyclopedia) Phwandu la Timkat lo liyanana ndi lenili, “likwamba chifukwa cha midawuku ya ŵanthu.”​—Encyclopedia of Society and Culture in the Ancient World.

  •  Phwandu Lakukondwere kuti Mariya yo Wenga Mwali Wakukwere Kuchanya. Ŵanthu wo achita phwandu lenili agomezga kuti Mariya, nyina waku Yesu wakukwere kuchanya ndi liŵavu laki chayilu. Buku linyaki likamba kuti, “Akhristu akwamba avigomezganga cha venivi kweniso vizumbulika cha mu Malemba.”​—Religion and Society​—Encyclopedia of Fundamentalism.

  •  Phwandu la Utuŵa Waku Mariya. “Phwandu la utuŵa [waku Mariya] likukambikapu cha mu Malemba . . . Tchalitchi ndilu likusankha kuti achitengi phwandu lenili.”​—New Catholic Encyclopedia.

  •  Lent. Buku la New Catholic Encyclopedia likamba kuti nyengu iyi yo ŵanthu alapiya maubudi kweniso kufunga, yingwamba “mu vyaka va m’ma 300 C.E,” pati pajumpha vyaka 200 kutuliya po angumaliziya kulemba Bayibolu. Pakukonkhoska vo vichitika pa zuŵa lakwamba la phwandu la Lent buku ili likamba so kuti: “Pa charu chosi asembi a tchalitchi la Katolilka akwamba kujambula mphinjika pa visku va akhristu ŵawu mwakugwiriskiya ntchitu vyotu pa Zuŵa la Vyotu kutuliya mu 1091.”

  •  Meskel (pamwenga, Maskal). Buku linyaki likamba kuti ku Ethiopia ŵanthu achita phwandu lenili kuti akondwere “kusanirika kwa Mphinjika Yauneneska (mphinjika yo Khristu wangupayikikapu) ndipu apemba motu kweniso avina mwakuzunguliya motu wenuwu.” (Encyclopedia of Society and Culture in the Medieval World; mazu ngo nge mumabulaketi, nangu nge mubuku lenili) Kweni Akaboni aku Yehova agwiriskiya ntchitu mphinjika cha pakusopa.

•   Kumbi holidi iyi yikankhuska munthu, bungwi mbendera, pamwenga charu?

   Fundu ya m’Bayibolu: “Yehova wakamba kuti: ‘Ngwakutembeka munthu yo wathemba ŵanthu, yo wathemba nthazi za ŵanthu, kweniso yo mtima waki utuwaku kwaku Yehova.’”​—Yeremiya 17:5.

   Chinanga kuti Akaboni aku Yehova awonga anyawu ndipuso atiŵapemphere, yiwu achitaku cha maphwandu pamwenga maholidi nge yanga:

   Maholidi ngo ngalongo kuti atumbika wakulamuliya pamwenga munthu wakuzirwa. Bayibolu likamba kuti: “Kuti vinthu vikuyendiyeni umampha, muleki kuthemba munthu, yo we ndi ŵaka mvuchi mumphunu mwaki. Palivi chifukwa chakuŵanaŵaniya vaku iyu.” (Yesaya 2:22) Ndichu chifukwa chaki Akaboni aku Yehova achitaku cha maphwandu ngakukondwere zuŵa lakuwiya la pulezidenti, fumu pamwenga fumukazi.

   Phwandu la mbendera. Akaboni aku Yehova akondweriyaku cha Zuŵa la Mbendera. Ntchifukwa wuli achitaku cha? Chifukwa Bayibolu likamba kuti: “Jivikiliyeni kwa angoza.” (1 Yohane 5:21) Mazuŵa nganu, ŵanthu anyaki awona kuti mbendera ndi ngoza cha. Wakulemba mbiri munyaki zina laki Carlton J. H. Hayes wangulemba kuti: “ŵanthu wo atanja ukongwa charu chawu asopa mbendera.”

   Maholidi pamwenga maphwandu ngo ngakankhuska atuŵa mtima. Kumbi ntchinthu wuli cho chinguchitika pa nyengu yo munthu munyaki wakopa Chiuta wangugwadiya wakutumika Peturo? Bayibolu likamba kuti: “Peturo wangumusoska ndipu wangukamba kuti: ‘Soka, nani nde munthu nge yiwi.’” (Machitidu 10:25, 26) Pakuti Peturo ndi akutumika anyaki wosi angukana kulonde ulemu waviyo pamwenga kuŵasopa, Akaboni aku Yehova nawu achitaku cha maphwandu ngo ngatumbika atuŵa nge:

  •  Zuŵa la Atuŵa Mtima Wosi. “Phwandu ili litumbika atuŵa mtima . . . Kweni viziŵika cha kuti likwamba wuli.”​—New Catholic Encyclopedia.

  •  Phwandu la Munthukazi wa ku Guadalupe (Fiesta of Our Lady of Guadalupe). Ŵanthu achita phwandu ili kuti atumbiki “munthukazi mutuŵa mtima yo wavikiliya Mexico,” yo anyaki agomezga kuti ndi Mariya anyina aku Yesu. Anyaki akamba kuti Mariya wanguwoneke mwakuziziswa ku munthu munyaki wakusika mu 1531.​—The Greenwood Encyclopedia of Latino Literature.

  •  Zuŵa lakupereka Zina. Buku linyaki likamba kuti “Zuŵa lakupereka Zina ndi zuŵa lo achitiya phwandu munthu mutuŵa mtima yo zina laki apaska mwana asani atimubatiza pamwenga pa mwambu wakumusimikizgiya kuti wasere tchalitchi.” Buku ili likamba so kuti “pa zuŵa ili ŵanthu achita vinthu vakukwaskana ndi chisopa.”​—Celebrating Life Customs Around the World​—From Baby Showers to Funerals.

   Vikondwereru va ndali pamwenga ma kampeni. Bayibolu likamba kuti, “Mbumampha kuthaŵiya kwaku Yehova kuluska kuthemba ŵanthu.” (Sumu 118:8, 9) Akaboni aku Yehova agomezga kuti ŵanthu angangamaliska cha masuzgu pacharu kweni Chiuta ndiyu wangangamalisa. Mwaviyo, yiwu achitaku cha vikondwereru vo vidanika kuti Zuŵa la Achinyamata (Youth Day) pamwenga Zuŵa La Anthukazi (Women’s Day). Kweniso Akaboni aku Yehova akondweriyaku cha phwandu la Zuŵa la Wanangwa (Emancipation Day). Mumalu mwaki yiwu awona kuti Ufumu waku Chiuta ndiwu wazamumalisa sankhu.​—Aroma 2:11; 8:21.

•   Kumbi holidi iyi yichitiska kuti charu chinyaki pamwenga mtundu unyaki uwonekengi kuti ngwapachanya?

   Fundu ya m’Bayibolu: “Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”​—Machitidu 10:34, 35

   Chinanga kuti Akaboni aku Yehova anandi atichiyanja charu chawu, kweni achitaku cha maphwandu ngo ngachitiska kuti charu chawu pamwenga mtundu wawu uwonekengi nge kuti ngwapachanya ukongwa, nge maphwandu ngo ngazumbulika mumphata umu.

   Vakuchitika vo vitumbika asilikali. Mumalu mwakuchitaku nkhondu, Yesu wangukambiya akusambira ŵaki kuti: “Lutirizgani kwanja arwani ŵinu ndi kupemphere ŵanthu wo atikutombozgani.” (Mateyu 5:44) Mwaviyo, Akaboni aku Yehova achitaku cha maphwandu ngo ngatumbika asilikali kusazgapu maholidi yanga:

  •  Zuŵa la Anzac. Buku linyaki likamba kuti “mazu ngakuti Anzac ngamiya asilikali aku Australia ndi ku New Zealand [Australian and New Zealand Army Corps],” ndipu “mazuŵa nganu pa Zuŵa la Anzac akwamba kukumbukiya asilikali wo akufwa pa nkhondu.”​—Historical Dictionary of Australia.

  •  Zuŵa la Asilikali wo Anguchitaku Nkhondu (Zuŵa la Chikumbusu pamwenga Sabata ya Chikumbusu). Maholidi ngenanga ngatumbika “asilikali wo anguchitaku nkhondu kuvuli, kweniso wo akufwiya pa nkhondu ya charu chawu.”​—Encyclopædia Britannica.

   Maphwandu ngakukumbukiya vinthu vinyaki vo vikuchitikapu mucharu pamwenga nga wanangwa wakujilamuliya. Pakukamba va akusambira ŵaki, Yesu wanguti: “Yiwu mbacharu cha, nge mo ini ndiliri wacharu cha.” (Yohane 17:16) Chinanga kuti Akaboni aku Yehova akondwa kuziŵa mbiri ya charu chawu, kweni yiwu akondweriyaku cha vakuchitika nge:

  •  Zuŵa la Australia. Buku linyaki likamba kuti holidi iyi njakukumbukiya “zuŵa linyaki mu 1788 po asilikali a ku Britain angukweze mbendera yawu ndi kukamba kuti charu cha Australia che pasi pa charu chawu.”​—Worldmark Encyclopedia of Cultures and Daily Life.

  •  Zuŵa Laku Guy Fawkes. Ili ndi “zuŵa lo mucharu achita phwandu pakukumbuka vo Guy Fawkes wangutondeka kufiska limoza ndi ŵanthu anyaki a chisopa cha Katolika, po wakhumbanga kuphulisa King James I kweniso paliyamenti [ya ku England] mu 1605.”​—A Dictionary of English Folklore.

  •  Zuŵa lo Charu Chingusaniriya Wananga Wakujilamuliya. Muvyaru vinandi, “ili ndi zuŵa lo ŵanthu akumbukiya zuŵa lo charu chawu chingusaniriya wanangwa wakujilamuliya kutuwa ku charu chinyaki.”​—Merriam-Webster’s Unabridged Dictionary.

•   Kumbi pa holidi yeniyi ŵanthu achita mijalidu yiheni pamwenga achita vinthu mwambula kujiko?

   Fundu ya m’Bayibolu: “Nyengu yo yajumpha yenga yakukwana kwaku yimwi kuti muchiti khumbu la ŵanthu amitundu, penipo mwachitanga mijalidu yiheni mwambula soni, mwenga ambula kujiko pa vinthu viheni, mwamwanga mwakujumpha mwesu, mwachitanga maphwandu nga viwawa, mwamwanga mwamaphara ndipuso mwasopanga angoza lo ndi jalidu laukazuzi kwaku Chiuta.”​—1 Peturo 4:3.

   Mwakukoliyana ndi lemba lenili, Akaboni aku Yehova achitaku cha maphwandu ngo ŵanthu aloŵe kweniso ngo patuŵa viwawa. Akaboni aku Yehova atanja kucheza ndi anyawu, ndipu nyengu zinyaki angasankha kuti pa maphwandu ngawu paje moŵa umanavi. Yiwu atesesa kulondo ulongozgi wa m’Bayibolu wakuti: “Kwali muturya, kwali mutumwa pamwenga muchita chinthu chinyaki chechosi, chitani vinthu vosi kuti mukankhuski Chiuta.”​—1 Akorinto 10:31.

   Mwaviyo, Akaboni aku Yehova achitaku cha maphwandu nga viwawa pamwenga maphwandu nganyaki ngo ngachiska mijalidu yiheni yo yikanizgika m’Bayibolu. Maphwandu ngenanga ngasazgapu phwandu la Purim lo Ayuda achita. Chinanga kuti kwamba kali phwandu la Purim laziŵikanga kuti ndakukumbukiya kufwatulika kwa Ayuda cha m’ma 400 B.C.E., kweni buku linyaki likamba kuti sonu phwandu ili “lingakonkhoskeka ŵaka kuti ndi nthowa yo Ayuda achitiya ŵaka phwandu la Mardi Gras pamwenga phwandu la viwawa.” (Essential Judaism) Chifukwa anandi wo achitaku phwandu lenili “avwara mbwekabweka (kanandi anthulumi avwala vakuvwara vachinthukazi), achita vinthu nge akufuntha, atumwa ukongwa moŵa kweniso achita viwawa ukongwa.”

 Awa. Bayibolu lisambiza kuti ŵanthu ayanjengi ŵanthu a mu banja lawu kweniso aŵatumbikengi chinanga kuti angapambana vo agomezga. (1 Peturo 3:1, 2, 7) Kweni abali anyaki a munthu yo ndi Kaboni waku Yehova aguŵa kweniso vitiŵawawa asani iyu wachitaku cha maphwandu nganyaki. Mwaviyo, Akaboni aku Yehova atesesa kusimikiziya abali ŵaŵu kuti atiŵayanja, atiŵakonkhoske mwaulemu abali ŵawu vifukwa vo aleke kuchitiyaku maphwandu nganyaki ndipuso atesesa kuŵanyende.

 Awa. Yiwu agomezga kuti weyosi watenere kusankha yija. (Yoswa 24:15) Akaboni aku Yehova ‘atumbika ŵanthu amitundu yosi,’ chinanga kuti agomezga vakupambana ndi yiwu.​—1 Peturo 2:17.