Nyengu zosi vo tigomezga vituliya mu Bayibolu. Ndipu asani tavwisa umampha fundu yinyaki tisintha mo tavwiyanga pakwamba. a

 Kusintha kwenuku kukoliyana ndi fundu ya mu Bayibolu ya pa Nthanthi 4:18, yo yikamba kuti: “Nthowa ya ŵanthu arunji ye nge ukweru wa matandakucha wo uŵaliyaŵaliya mpaka po kwachiya limu.” Nge mo viŵiya ndi lumwi asani layamba kukwera, charu chitamba kuwoneka umamphaumampha, Chiuta nayu watitiwovya kuti tivwisengi uneneska kamanakamana. (1 Peturo 1:10-12) Nge mo Bayibolu likukambiya, Chiuta wachita venivi mu “nyengu ya umaliru.”—Daniyeli 12:4.

 Tikhumbika cha kutimbanyizgika pamwenga kuzizwa asani fundu zinyaki zo tagomezganga zasintha. Ateŵeti aku Chiuta akali nawuso avwisanga cha fundu zinyaki kweniso vo akhazanga ndipu akhumbikanga kusintha.

•   Pa nyengu yo Mozesi wenga ndi vyaka 40 wakhumbanga kutaska mtundu wa Yisirayeli nyengu yaku Chiuta yechendakwani.—Machitidu 7:23-25, 30, 35.

•   Akutumika angutondeka kuvwisa uchimi wo wakambanga vakukwaskana ndi nyifwa yaku Mesiya kweniso kuyuskika kwaki.—Yesaya 53:8-12; Mateyu 16:21-23.

•   Akhristu anyaki akwambiriya avwisanga cha nyengu yo “zuŵa laku Yehova” liziyengi.—2 Atesalonika 2:1, 2.

 Pakumaliya Chiuta wanguŵawovya kuvwisa fundu zenizi ndipu nasi tipempha kuti walutirizgi kutiwovya kuvwisa fundu za mu Malemba.—Yakobe 1:5.