Awa. Mbuneneska kuti Akaboni aku Yehova agomezga kuti Chiuta ndiyu wakulenga chechosi. Kweni tigomezga cha kuti vinthu vikulengeka m’mazuŵa 6 chayingu. Chifukwa wuli? Chifukwa vo ŵanthu wo agomezga kuti vinthu vosi vikulengeka m’m’mazuŵa 6 chayingu akamba, visuskana ndi fundu za m’Bayibolo. Tiyeni tikambiskani vinthu viŵi:

1.   Utali wa mazuŵa 6 ngo Chiuta wakulenge vinthu. Ŵanthu wo agomezga kuti charu chikulengeka m’mazuŵa 6 chayingu awona kuti Chiuta wangumaliza kulenga vinthu vosi m’mazuŵa 6 nga maora 24. Kweni m’Bayibolo mazu ngakuti “zuŵa” ngangang’anamuwa nyengu yitali.​—Chiyambo 2:4; Sumu 90:4.

2.   Vyaka vo vajumphapu kutuliya po charu chikulengeke. Ŵanthu wo agomezga kuti vinthu vikulengeka m’mazuŵa 6 chayingu awona kuti pajumpha vyaka masauzandi ngamanavi kutuliya po charu chikulengeke. Kweni Bayibolo likamba kuti charu chapasi ndi kuchanya vikujaku mazuŵa 6 ngakulenge vinthu ngechendayambi. (Chiyambo 1:1) Ndichu chifukwa chaki, Akaboni aku Yehova atiŵasuska cha asayansi wo akamba kuti charu chitenere kuti chaja vyaka mabiliyoni nganandi.

 Chinanga kuti Akaboni aku Yehova agomezga kuti vinthu vikuchita kulengeka, kweni asuska vinthu vosi cha vo asayansi akamba. Tigomezga kuti vinthu vauneneska vo asayansi akamba vikoliyana ndi fundu za m’Bayibolo.