Tikana cha kucheza ndi ŵanthu wo akubatizika kuja Akaboni aku Yehova kweni akuleka kupharazga pamwenga kuwungana ndi Akaboni anyawu. M’malu mwaki titesesa kuŵawovya kuti ayambi so kuteŵete Yehova.

 Tisezgiyamu bweka cha munthu yo wachita ubudi ukulu. Kweni asani Kaboni wakubatizika we ndi chiziŵirizga chakuswa marangu ngaku Yehova ndipu walapa cha, wasezgeka mumpingu pamwenga kuti ŵanthu wosi mumpingu aleka kucheza nayu. Bayibolu likamba mwakuvwika umampha kuti: “Mutuzgenipu munthu muheni yo pakati pinu.”—1 Akorinto 5:13.

 Nanga vija wuli asani munthurumi wasezgeka kweni muwolu waki ndi ŵana ŵaki ŵeche Akaboni aku Yehova? Udindu wakusambiza banja laki vinthu vauzimu usintha kweni udindu wakuphwere banja laki mwakuliŵavu usintha cha. Nthengwa kweniso ubwezi wawu ulutiriya ndipuso walutirizga kuchitiya vinthu limoza ndi banja laki nge po wachitiyanga kali.

 Ŵanthu akusezgeka ŵe ndi wanangwa wakuwungana nasi. Ndipu asani akhumba angalonde ulongozgi kutuliya ku ŵara mumpingu. Chilatu chakuchitiya ivi nkhuŵawovya kuti aje so Akaboni aku Yehova. Asani munthu wakusezgeka waleka kuchita mijalidu yiheni ndipuso wayamba kulondo fundu za m’Bayibolo titimulonde so mumpingu.