Tigwiriskiya ntchitu ndalama izi pa ntchitu yakupharazga kweniso pa ntchitu zinyaki zo gulu lidu lichita. Kovya ŵanthu kuti aje akusambira aku Yesu Khristu ndichu chilatu chidu chikulu.—Mateyu 28:19, 20.

 Tigwiriskiya ntchitu ndalama izi kuti munthu waje wakukhupuka cha. Akaboni aku Yehova apaskika ndalama cha asani apharazga nyumba ndi nyumba ndipu ŵara pamwenga muteŵeti weyosi walipilika ndalama cha. Kweniso wo ateŵete ku ofesi ya nthambi ndipuso ku likulu lidu la pacharu chosi, kusazgapu wo ŵe mu Wupu Wakulongozga, nawu alonde ndalama cha.

•   Kupanga Mabuku: Chaka chechosi tifwatuliya mabuku, kupurinta, kutumiza kweniso tigaŵiya ma Bayibolu mamiliyoni nganandi, ndipu vosi venivi vichitika kwambula kulipisa ndalama. Mwakuyanana waka, vinthu vo visanilika pa webusayiti ya jw.org ndi pa JW Library app, ativiŵikapu kuti asaniyi ndalama cha, kweniso vakusaskiya malonda cha.

•   Kuzenga ndi Kunozga Malu Ngakusopiyapu: Tizenga kweniso kunozga malu ngakusopiyapu pacharu chosi kuti abali mu mipingu yosi aje ndi malu ngamampha ngakuwunganapu ndi kuthamika Chiuta. Ndalama zenizi zitovya so pa ntchitu ya kuzenga ndi kunozga so maofesi nga nthambi kweniso maofesi ngakufwatuliyaku mabuku. Ntchitu yikulu yichitika ndi ateŵeti akujipereka ndipu venivi vitovya kuti agwiriskiyi ntchitu ndalama zimanavi.

•   Mo Ntchitu Yidu Yitendeseke: Ndalama zo ŵanthu apereka mwakukhumba kwawu zitovya pa ntchitu zo zichitika kulikulu lidu, ku maofesi nga nthambi, maofesi ngakufwatuliyaku mabuku ndipuso pa ntchitu zo akuwonere dera achita.

•   Kupharazga: Akaboni alonde ndalama cha asani apharazga uthenga wamampha pamwenga asani asambiza ŵanthu “Mazu ngaku Chiuta.” (2 Akorinto 2:17) Mwakuyanana ndi mo vaŵiyanga ndi Akhristu akwamba, ateŵeti amanavi wo asambizika ntchitu zenizi mwapade, wo atijipereka kumaliya nyengu yawu yinandi pa ntchitu yakupharazga, apaskika ndalama zimanavi zakuti ziŵawovyi kusaniya nyumba yakugonamu ndi vinthu vinyaki vakukhumbika pa umoyu.—Afilipi 4:16, 17; 1 Timote 5:17-18.

•   Kusambiza: Ndalama zo ŵanthu apereka mwakukhumba kwawu zitovya pa maunganu ngadera ndipuso ngachigaŵa. Kusazgiyapu yapa, tipanga so vinthu vakuvwisiya kweniso mavidiyo nga nkhani zakutuliya mu Bayibolu. Tija so ndi masukulu ngakusambiza ŵara ndipuso ateŵeti anyengu zosi kuti agwirengi umampha ntchitu zawu.

•   Kovya ko Kwachitika Masoka Ngachilengedu: Tipereka chakurya, maji ndipuso nyumba kwa abali wo akumana ndi masoka ngachilengedu. Ntchitu iyi yitovya “abali ŵidu muchivwanu” pe cha, kweni yitovya so ŵanthu wo Mbakaboni cha.—Agalatiya 6:10.