Ndikukuliya mutawuni ya Tampere, ku Finland. Kuchigaŵa ichi kwe vimiti vinandi ndipu nkhwakuti yii. Pa banja lidu vachisopa taviyanjanga cha, kweni taŵikanga mtima pa masambiru ndipuso tayesesanga kuja ndi nkharu yamampha. Ama mba ku Germany, ndipu ndeche mwana nyengu zinyaki ndakanga kwa agogu Kuzambwi kwa Germany.

 Kutuliya ndeche mwana ndayanjanga masaza ngakupambanapambana. Ndeche munamana ndachitangaku masaza nganandi, kweni ndati ndafika vyaka pafufupi 14, ndingusankha kuti ndiŵiki ukongwa maŵanaŵanu pa kutchaya tenisi. Ndichifika vyaka 16, ndachitanga mapulakatisi kaŵi pamwenga katatu pa zuŵa mwakovyeka ndi asambizi a tenisi, ndipu cha kumazulu ndayeseriyanga so pakundija. Ndayiyangaja ukongwa tenisi, ndipu ndaŵikiyangapu mtima kweniso nthazi zangu zosi. Chinanga kuti ndayanjanga kucheza ndi anyangu ndipuso nyengu zinyaki ndamwanga moŵa, kweni palivi zuŵa lo ndikukumanapu ndi masuzgu chifukwa cha moŵa pamwenga munkhwala wakutimbanyizga wongu. Umoyu wangu wosi wenga pa tenisi, chifukwa ndiyu yenga pamtima.

 Ndingwamba kuchitaku maphara nga tenisi mu wupu wa ATP nde ndi vyaka 17. a Ndati ndawina pa maphara nganandi, ndingwamba kutchuka mucharu chidu chosi. Ndichifika vyaka 22, ndenga mu gulu la ŵanthu 50 wo atchayanga umampha ukongwa tenisi pacharu chosi.

 Kwa vyaka vinandi ndatchayanga tenisi muvyaru vakupambanapambana. Ndenga ndi mwaŵi wakuwona malu ngakukondwesa pacharu, ndipu maulendu ngenanga ngangundiwovya kuziŵa masuzgu ngo nge pacharu nge unkhungu, kugwiriskiya ntchitu munkhwala wakutimbanyizga wongu ndipuso kunanga chilengedu. Mwakuyeruzgiyapu, pa nyengu yo tenga ku United States, angutikaniza kuluta mumatawuni nganyaki chifukwa atingi kutofya ukongwa. Vinthu vosi venivi vanditimbanyizganga maŵanaŵanu. Kweniso chinanga kuti ndachitanga masaza ngo mtima wangu wamalikanga nangu, kweni ndakhorwanga cha ndi umoyu.

 Sanna yo wenga chibwezi changu wangwamba kusambira Bayibolu ndi Akaboni aku Yehova. Ndinguzizwa kuwona kuti iyu watanja vachisopa, kweni ndingumukaniza cha. Tingutorana mu 1990, ndipu iyu wangubatizika mu 1991 ndi kuja Kaboni waku Yehova. Ini vakusopa ndengavi navu ntchitu, kweni ndakayikanga cha kuti Chiuta waliku. Ndakumbukanga kuti ambuya ku Germany aŵerenganga Bayibolu ndipuso angundisambiza mo ndingapemphere.

 Zuŵa linyaki, ini ndi Sanna tati taluta kuchicheza kunyumba ya banja linyaki la Akaboni aku Yehova, munthulumi zina laki Kari, wangundilongo uchimi wa mu Bayibolu wakukwaskana ndi “mazuŵa ngakumaliya.” (2 Timote 3:​1-5) Vo wangundilongo vingundifika pa mtima, ndipu ndingwamba kuwamu chifukwa cho vinthu viheneke pacharu. Pa zuŵa lenili tingukambiskana vinandi cha vakukwaskana ndi chisopa. Kweni kutuliya pa zuŵa lenili, ndingwamba kukambiskana ndi Kari nkhani za mu Bayibolu, ndipu vosi vo ndasambiranga venga vakuvwika. Chifukwa chakuti ndatangwanikanga ukongwa ndi tenisi kweniso kwendakwenda, tatondekanga kukumana kaŵikaŵi ndi Kari, kweni iyu wangugongowa cha. Iyu wandilembiyanga makalata kuti wamuki mafumbu ngo ndafumbanga tichisambira. Ndingumukika mwakuvwika umampha kutuliya mu Bayibolu mafumbu ngosi ngakusuzga ngakukwaskana ndi umoyu. Mukuluta kwa nyengu ndingwamba kuwona fundu yikulu yo yisanirika mu Bayibolu yakuti Ufumu waku Chiuta wazamufiska khumbu laku Chiuta. Ndingukondwa so ukongwa ndati ndaziŵa zina laku Chiuta lakuti Yehova, ndipuso ndati ndawona vo wakutichitiya. (Sumu 83:18) Chinthu chinyaki cho chingundikondwesa ukongwa ndi sembi yakutiwombore yo iyu wakupereka. Sembi iyi yiweziyapu vo vikunangika pe cha, kweni yilongo so chanju chaku Chiuta. (Yohane 3:​16) Ndingusambira so kuti ndenga ndi mwaŵi wakuja pa ubwezi ndi Chiuta kweniso wakuzija kwamuyaya mu paradayisu mo mwazamukuŵa chimangu. (Yakobe 4:8) Ndingwamba kujifumba kuti, “Kumbi ndingalongo wuli kuti nditimuwonga Chiuta?”

 Ndinguŵanaŵaniyapu so vo ndachitanga pa umoyu wangu. Ndingusambira mu Bayibolu kuti munthu wakondwa ukongwa asani wapaskaku anyaki, ndipu nani ndakhumbisiskanga kukambiyaku ŵanthu vo ndagomezganga. (Machitidu 20:35) Chifukwa chakutchaya tenisi, ndajaliyanga ŵaka kwendakwenda kuti ndichiteku maphara ngakupambanapambana, mwakuti mazuŵa 200 pa chaka ndasanirikanga cha panyumba. Banja lidu losi lathembanga ini ndi ntchitu yangu. Ndinguwona kuti ndikhumbika kusintha.

 Ndinguziŵa kuti ŵanthu anandi avwisengi cha kuti ndaleka kutchaya tenisi chifukwa cha chisopa. Kweni ndingusuzgika cha kusankha, chifukwa ndinguwona kuti kumuziŵa umampha Yehova ndipuso kuzija ndi umoyu wambula kumala ndiyu mphotu yamampha ukongwa kuluska mphotu yeyosi yo ndatingi ndilondiyengi chifukwa chakutchaya tenisi. Ndingusankha kuti ndisuleku ŵaka vo ŵanthu akambengi. Lemba la Sumu 118:6 lingundichiska ukongwa kuti ndileki kusuzgika maŵanaŵanu ndi vo ŵanthu atingi akambengi. Lemba ili lititi: “Yehova we ku chigaŵa changu; ndiwopengi cha. Kumbi munthu wangachitanji nani?”

 Pa nyengu yo ndaŵanaŵananga kuti ndichiti venivi, ŵanthu anyaki anguza ndi kundikambiya kuti andipaskengi ndalama kwa vyaka vinandi kuti zindiwovyengi pakutchaya tenisi. Kweni yapa ndipu ndasimikiza kali mtima. Sonu ndingukana ndipu mukuluta kwa nyengu ndinguleka kuchitaku maphara mu wupu wa ATP. Ndingulutirizga kusambira Bayibolu, ndipu ndingubatizika ndi kuja Kaboni waku Yehova pa 2 July mu 1994.

 Ŵanthu anandi atamba kuŵanaŵana vakukwaskana ndi Chiuta asani akumana ndi soka, kweni ndimu ve nge cha ndi ini. Kweniso ndingakamba cha kuti ndingwesa kusuzgika kupenjapenja uneneska. Ndawonanga kuti vinthu veumampha pa umoyu wangu, ndadandawulanga cha. Kweni venga nge kuti uneneska wandikhazanga, chifukwa mwamabuchibuchi, ndingusambira kuti pe chinthu chinyaki chakukhumbika ukongwa pa umoyu, ndipu chifukwa cha chinthu chenichi, vinthu vingwamba kundiyende umampha ukongwa! Sonu banja lidu ndakukho ukongwa ndipuso tikoliyana ukongwa. Ndikondwa so ukongwa kuti ŵana ŵangu atatu nawu akutoriyaku chakuwoniyapu changu chamampha, chakutchaya tenisi cha, kweni chakuja Mkhristu.

 Mazuŵa nganu ndeche kutchaya mbwenu tenisi. Sonu ndisaniya ndalama chifukwa chakugwira ntchitu zakupambanapambana zakukwaskana ndi tenisi, mwakuyeruzgiyapu, ndini kochi kweniso ndiwonere malu nganyaki ngakutchiyapu tenisi. Kweni ndikuleka kuŵika umoyu wangu wosi pa masaza. Kali ndachitanga pulakitisi kwa nyengu yitali kuti ndije kaswiri. Kweni sonu, nge mteŵeti wa nyengu zosi, ndigwiriskiya ntchitu nyengu yangu kuti ndisambizi anyaki mo angagwiriskiya ntchitu fundu za mu Bayibolu zo zikusintha umoyu wangu. Ndikondwa ukongwa chifukwa ndiŵika panthazi ubwezi wangu ndi Yehova Chiuta kweniso kupharazgiya anyaki chilindizga chamampha ukongwa cho nde nachu.—1 Timote 6:19.