“Asani ukhumba nadi kusambira vakukwaskana ndi Chiuta, kuŵataya cha Akaboni aku Yehova.” Ndinguzizwa ukongwa kuvwa venivi. Munthu yo wangundikambiya mazu yanga, wangungakamba pati pajumpha nyengu yimanavi kutuliya po ndingwambiya kusambira Bayibolu ndi Akaboni aku Yehova. Panyaki kuti muvwisi chifukwa cho ndikambiya kuti ndinguzizwa, agani ndikukonkhoskiyenipu kamanavi mbiri ya umoyu wangu.

 Ndikuwiya mutawuni ya Quezaltepeque ku El Salvador. Mu banja lidu tengamu ŵana 15, ndipu ini ndenga wa nambala 6. Apapi ŵangu anguyesesa kundilera mu nthowa yakuti ndichitengi vinthu mwauneneska kweniso ndivwiyengi marangu. Kweniso Leonardo limoza ndi Akaboni aku Yehova anyaki azanga kaŵikaŵi kunyumba kuzitisambiza Bayibolu. Kweni vo ndasambiranga ndavitiliyangaku kanthu cha, ndipu ndatimbanyanga kaŵikaŵi. Ndati ndafika vyaka 14, ndingwamba kumwa moŵa kweniso munkhwala wakutimbanyizga wongu ndi anyangu kusukulu. Anyangu ŵenaŵa angwamba kuleka sukulu, yumoza yumoza ndipu aserenga gulu linyaki la vigeŵenga. Pakumaliya nani ndinguleka sukulu ndi kuŵalondo. Tatandalanga ŵaka mumisewu ndi kuwofya ŵanthu kuti atipasi ndalama kweniso tabanga kuti tisaniyi ndalama zakuguliya moŵa ndi munkhwala wakutimbanyizga wongu.

 Gulu la vigeŵenga lenili ndingwamba kuliwona nge banja langu. Ndaŵonanga kuti ndikhumbika kuŵachitiya vinthu mwakugomezeka ukongwa ŵanthu a mu gulu lenili. Mwakuyeruzgiyapu, zuŵa linyaki chifukwa cha fuzi ya munkhwala wakutimbanyizga wongu, munyangu yo ndenga nayu mu gulu lenili wangupuma munthu yo ndajanga nayu pafupi. Pa ndewu yeniyi, yo ndajanga nayu pafupi wangumuvivika uheni munyangu ndipu wangumuko ndi kumbiya foni apolisi. Ini ndingukwiya ukongwa ndipu ndingwamba kulikita galimotu yaki ndi nduku yikulu. Munthu yo ndajanga nayu pafupi wangwamba kundipepeke kuti ndileki, kweni ini ndinguvuma cha. Ndinguswa magilasi ngosi nga galimotu yaki ndipuso ndinguvikita galimotu yaki yosi.

 Ndati ndafika vyaka 18, gulu lidu lingupumana ndi apolisi. Pa nyengu yeniyi ini ndakhumbanga kuponya bomba lo tingupanga tija, kweni lingundiphulikiya mumanja. Ndiziŵa cha kuti ntchinthu wuli cho chinguchitiska venivi. Ndikumbuka ŵaka kuti ndinguwona janja langu lavikitika ndipu pavuli paki ndingukomoka. Ndati ndasisipuka muchipatala, ndinguwona ŵaka kuti janja la kumaryi ndilivi, gutu la kumaryi lituvwa cha kweniso jisu langu la kumaryi nalu lawonanga kamanavi ukongwa.

 Chinanga kuti ndingupwetekeka ukongwa, kweni ndati ndatuzgika muchipatala, ndinguwere mbwenu ku gulu langu la vigeŵenga. Kweni pati pajumpha ŵaka nyengu yimanavi, apolisi angundimanga ndipu ndinguŵikika mujeri. Nde mujeri mwenumu, ubwezi wangu ndi anyangu wo ndenga nawu mu gulu la vigeŵenga ungukonda ukongwa. Chifukwa zuŵa losi tachitiyanga vinthu limoza, kwamba ŵaka mulenji asani titurya chakurya cha mulenji takweŵiyanga limoza chamba, mpaka pa nyengu yo tamugone.

 Pa nyengu yo ndenga mujeri, Leonardo wanguza kuzindiwona. Tichikambiskana, wangundilongo chithuzi cho ndingujijambula paphewa la kumaryi, ndipu wangundifumba kuti: “Kumbi uziŵa kuti vinthu vitatu vo ve penipo vimiyanji?” Ini ndingumumuka kuti: “Hinya, vimiya kugonana, munkhwala wakutimbanyizga wongu ndipuso sumu.” Kweni Leonardo wangumuka kuti: “Awa, ini ndiwona kuti vimiya chipatala, jeri ndipuso nyifwa. Kuchipatala ukuweku, sonu we mujeri, kumbi wachiziŵa cho chajaku?”

 Vo Leonardo wangukamba vingundikwaska ukongwa. Vo wangukamba venga vauneneska. Vakuchita vangu valongonga nadi kuti umoyu ndaukhumbanga cha, kweni ndapenjanga nyifwa. Leonardo wangundipempha kuti ndisambirengi nayu Bayibolu, ndipu ndinguzomera. Vo ndingusambira mu Bayibolu vingundichitiska kuti ndisinthi umoyu wangu. Mwakuyeruzgiyapu, Bayibolu likamba kuti “kwanjana ndi ŵanthu aheni kunanga nkharu yamampha.” (1 Akorinto 15:33) Mwaviyo, chinthu chakwamba cho ndakhumbikanga kuchita nkhusaniya mabwezi ngasonu. Chifukwa cha venivi, ndinguleka kuluta ku nkhumanu za gulu la vigeŵenga, ndipu ndingwamba kuluta ku maunganu nga Akaboni aku Yehova ngo ngachitikiyanga mujeri. Ku maunganu nga Akaboni ngenanga ndingukumana ndi mukayidi munyaki zina laki Andrés. Iyu wangubatizikiya mujeri mwenumu ndi kuja Kaboni waku Yehova. Iyu wangundipempha kuti ndiryiyengi nayu limoza chakurya cha mulenji. Kutuliya pa zuŵa lenili ndinguleka kuchelere pa chamba. Mumalu mwaki, ini ndi Andrés takambiskananga vesi la mu Bayibolu mlenji wewosi.

 Ŵanthu a mu gulu la vigeŵenga angwamba kuwona kuti ndisintha. Mwaviyo, yumoza mwa alongozgi a gulu lenili wangundikambiya kuti tikumani. Ndinguchita mantha ukongwa. Ndaziŵanga cha kuti wachitengenji nani asani waziŵa kuti ndipenja kusintha, chifukwa penga pakusuzga ukongwa kuti munthu watuwi mu gulu lidu. Tati takumana, iyu wangukamba kuti: “Tawona kuti waleka kuza ku nkhumanu zidu, mumalu mwaki uluta ku maunganu nga Akaboni aku Yehova. Kumbi ukhumbanji?” Ini ndingumukambiya kuti ndikhumba kulutirizga kusambira Bayibolu ndipuso ndikhumba kusintha umoyu wangu. Ndinguzizwa ukongwa kuvwa wachindikambiya kuti gulu la vigeŵenga lichitengi nani kanthu cha asani nadi ndikhumba kuja Kaboni waku Yehova. Pavuli paki iyu wangundikambiya kuti: “Asani ukhumba nadi kusambira vakukwaskana ndi Chiuta, kuŵataya cha Akaboni aku Yehova. Tikhumba kuti uleki kuchita vinthu viheni. Nditikukhumbiya vamampha vosi. Wasankha nthowa yakwenere. Akaboni aku Yehova angakuwovya nadi. Ini ndikusambirapu nawu ku United States, ndipu abali ŵangu anyaki Mbakaboni aku Yehova. Ungawopanga cha. Lutirizga.” Chinanga kuti iyu wangukamba venivi, ndenga mbwenu ndi mantha, kweniso ndingukondwa ukongwa. Mumtima ndingumuwonga Yehova. Ndingujivwa nge kayuni ko kafwatuka pachiŵana, ndipu ndingungavwisa mazu ngaku Yesu ngakuti: “Muziŵengi uneneska ndipu uneneska wo ukufwatuweningi.”—Yohane 8:32.

 Ŵanthu anyaki wo kali ŵenga anyangu, andiyesanga mwa kundipasa munkhwala wakutimbanyizga wongu. Kukamba uneneska, nyengu zinyaki ndazomeranga. Kweni pati pajumpha nyengu, chifukwa cha kupemphera kutuliya pasi pa mtima, ndinguleke limu.—Sumu 51:10, 11.

 Ndati ndatuzgika mujeri, ŵanthu anandi aŵanaŵananga kuti ndiweriyengi ku umoyu wangu wakali, kweni ndivu ndinguchita cha. Mumalu mwaki, ndaweriyanga kujeri kaŵikaŵi kuchikambiyaku anyangu wo ndenga nawu mujeri vinthu vo ndingusambira mu Bayibolu. Pakumaliya, anyangu akali anguvwana kuti ndasintha nadi. Kweni ntchachitima kuti ndimu ve nge cha ndi ŵanthu wo kali ŵenga arwani ŵangu.

 Zuŵa linyaki ini ndi munyangu tichipharazga, tingubuchira kuti tazungulizika ndi ŵanthu wo angupinga vidya ndipu apenjanga kundibaya. Ŵanthu yaŵa ŵenga a mugulu linyaki la vigeŵenga lo kali ndeche mu gulu la vigeŵenga tatinkhananga nalu. Munyangu yo ndenga nayu wanguŵakonkhoske mwaulemu ndipuso mwachiganga kuti ini ndikusintha, ndini so chigeŵenga cha. Kweni pa nyengu yosi iyi, ini ndinguyesesa kuja ŵaka cheti. Ŵati andipuma ndi kunditcheŵeska kuti ndingazangaku so cha kuchigaŵa chawu, angusisa vidya vawu ndi kutikambiya kuti tikengi. Bayibolu likusintha nadi umoyu wangu. Kukaŵengi kali mphanyi ndikuweze. Kweni sonu ndilondo ulongozgi wa mu Bayibolu wa pa 1 Atesalonika 5:15, po patiti: “Muwonesesi kuti paŵevi wakuweze chiheni pa chiheni ku munthu weyosi, kweni nyengu zosi muchitiyanengi vinthu vamampha ndipu muchtengi so venivi ku ŵanthu anyaki wosi.”

 Kutuliya pa nyengu yo ndikujaliya Kaboni waku Yehova, nditesesa kuchita vinthu mwakugomezgeka. Kuchita venivi nkhupusu cha kwaku ini. Kweni Yehova Chiuta ndiyu watindiwovya, limoza ndi ulongozgi wa mu Bayibolu kweniso mabwezi ngasonu. Kukamba uneneska, ndikhumba so cha chinanga nkhamanavi kuwere ku umoyu wangu wakali.​—2 Peturo 2:22.

 Kali ndenga munthu wa ndewu kweniso wa mtima wa kunjoŵi. Ndisimikiza kuti mpha ndikufwa kali asani ndinguleka kusintha. Vo ndikusambira mu Bayibolu vikundiwovya kusintha. Ndikuleka nkharu zangu zabwekabweka. Ndasambira kuja mwachimangu ndi ŵanthu wo kali ŵenga arwani ŵangu. (Luka 6:27) Sonu nde ndi mabwezi ngo ngatindiwovya kuja ndi mijalidu yamampha. (Nthanthi 13:20) Ndija umoyu walikondwa ndipuso nditeŵete Chiuta yo wakundigowoke vinthu viheni vosi vo ndikuchita kuvuli.​—Yesaya 1:​18.

 Mu 2006, ndingusere sukulu ya Akhristu ambula kuto. Pati pajumpha vyaka, ndingutorana ndi munthukazi yo nditimuyanja ukongwa ndipu tosi tilere limoza mwana widu munthukazi. Sonu ndimaliya nyengu yangu yinandi pa ntchitu yakusambiza ŵanthu fundu za mu Bayibolu zo zingundiwovya. Nditeŵete so nge mura mu mpingu widu, ndipuso nditesesa kuwovya achinyamata kuti aleki kuchita vinthu nge vo ini ndachitanga ndeche mwana. Mumalu mwakupenja nyifwa, nditijipenje vitumbiku vamuyaya vo Chiuta wakulayizga mu Bayibolu kuti watipaskengi kunthazi.