Ndikuwiya mukatawuni kanyaki kamana ka San Juan Chancalaito ko ke muchigaŵa cha Chiapas ku Mexico. Apapi ŵangu mba Chol, fuku lo likutuliya mumtundu wa a Maya. Mubanja mwidu tengamu ŵana 12, ndipu ini ndenga wachinkhondi. Ndeche mwana, taŵana tosi tasambiranga Bayibolu ndi Akaboni aku Yehova. Kweni vachitima kuti ndavigwiriskiyanga ntchitu cha vo ndasambiranga mu Bayibolu panyengu yo.

 Ndati ndafika vyaka 13, ndingwamba kugwiriskiya ntchitu munkhwala wakutimbanyizga wongu kweniso ndabanga. Ndingutuwapu panyumba nde ndi vyaka venivi, ndipu ndajanga ŵaka umoyu wakusamasama. Nde ndi vyaka 16, ndingwamba kugwira ntchitu pamunda wo alimangapu vyamba. Ndinguja kwenuku pafufupi chaka chimoza. Zuŵa linyaki ndi usiku tingupinga chamba chinandi muboti ndipu talutanga nachu kumalu nganyaki. Te munthowa, gulu linyaki la vigeŵenga va futi lo ligulisa munkhwala wakutimbanyizga wongu lingutiyukiya. Ŵati ayamba kulasa, ini ndingundwikiya ŵaka mumaji ndi kuchibukiya pataliku. Pavuli paki, ndinguthaŵiya ku United States.

 Ku United States, ndingulutirizga kugulisa munkhwala wakutimbanyizga wongu ndipu venivi vingundichitiska kuti ndikumani ndi masuzgu nganandi. Nde ndi vyaka 19, angundimanga ndipu angundiyeruzga kuti nkhaje mujeri chifukwa chakuba ndi futi kweniso kukhumba kubaya ŵanthu. Nde mujeri, ndingusere mukagulu kanyaki ka vigeŵenga, ndipu ndingulutirizga kuchita vinthu vankhaza. Chifukwa cha venivi, ŵaraŵara a jeri angunditumiza kujeri lo ndakuvikilirika ukongwa mudera la Lewisburg ku Pennsylvania.

 Nde mujeri la ku Lewisburg, ndingulutirizga kuchita vinthu viheni ukongwa kuluska pakwamba. Mujeri mwenumu, vingundisuzga cha kuziŵana ndi ŵanthu a kagulu ka vigeŵenga ko ndengamu pakwamba chifukwa panyengu iyi ndipu ndajilemba kali matatuu. Vinthu vingufika paheni ukongwa, ndajaliyanga ŵaka kuchita ndewu zuŵa losi. Zuŵa linyaki kwenga chindewu cha mtima bii mujeri. Yenga ndewu yakofya ukongwa mwakuti tapumiyananga nthonga ndi visulu vo venga mwenimo. Kuti amalisi ndewu, alonda a jeri anguchita kuponya matiyegasi. Pavuli paki, ŵaraŵara a jeri angundiŵika mukachipinda kapade ka vigeŵenga vakofya. Ndenga ndi mtima wakunjoŵi ndipu ndatukanga kasaza cha. Ndasweranga cha kupuma ŵanthu, ndipu asani ndapuma munthu mbwenu mtima hii. Ndajimbanga so mulandu cha ndi vo ndachitanga.

 Nde mukachipinda kapade kajeri, kanandi ndatandalanga waka mwenimo. Mwaviyo, ndingwamba kuŵerenga Bayibolu kuti ndileki kuwona kuti nyengu yiswera. Pavuli paki, mulonda wajeri wangundipaska kabuku kakuti Mungathe Kukhala ndi Moyo Kosatha M’Paradaiso pa Dziko Lapansi. a Pa nyengu yo ndaŵerenganga kabuku kenaka, ndingukumbuka vinthu vinandi vo ndasambiranga ndeche mwana pa nyengu yo ndasambiranga Bayibolu ndi Akaboni. Pavuli paki, ndinguŵanaŵaniya mo nkharu yangu yingunangikiya chifukwa cha uchigeŵenga. Ndingwamba so kuŵanaŵaniya ŵanthu a mubanja lidu. Chifukwa chakuti pa nyengu iyi ndipu azichi ŵangu ŵaŵi Mbakaboni aku Yehova, ndinguŵanaŵa kuti, ‘Yiwu azamuja kwamuyaya.’ Pavuli paki, ndingujifumba kuti, ‘Nanga ini ndingatondekiyanji?’ Chifukwa cha venivi, ndingusimikiza kusintha nkharu yangu.

 Chinanga kuti venga viyo, ndinguziŵa kuti ndakhumbikanga chovyu kuti ndisinthi. Mwaviyo, chakwamba, ndingupemphera kwaku Yehova Chiuta kuti wandiwovyi. Pavuli paki, ndingulembe kalata ku ofesi ya nthambi ya Akaboni aku Yehova ku United States, kupempha kuti munthu wasambirengi nani Bayibolu. Ofesi ya nthambi yeniyi yingunozga kuti mpingu wapafupi ukambiskani nani. Kweni pa nyengu yeniyo ndazomerezekanga cha kukumana ndi ŵanthu wo mbabali ŵangu cha. Mwaviyo, Kaboni yumoza wa mumpingu wenuwu, wangwamba kundilembe makalata ngakuchiska ndi kunditumiziya mabuku. Vinthu venivi, vingundiwovya ukongwa kuti ndisinthi.

 Ndingusankha kutuwamu mukagulu ka vigeŵenga ko ndachitiyanga naku vinthu limoza kwa vyaka vinandi. Kwenuku kwenga kusintha kukulu ukongwa. Mulongozgi wakagulu ka vigeŵenga nayu wenga so mukachipinda kaki kapade. Mwaviyo, nyengu yinyaki tichichita masaza ndingukumana nayu ndipu ndingumukambiya kuti ndikhumba kuja Kaboni waku Yehova. Ndinguzizwa ukongwa wachindikambiya kuti: “Asani ukamba ndi mtima wosi, mbwenu chita. Ini ndingalimbana cha ndi Chiuta. Kweni asani ukhumba kutuwa waka mugulu ili, uziŵa vo vikuchitikiyengi.”

 Pati pajumpha vyaka viŵi, ŵara ajeri anguwona kuti ndasintha nkharu yangu. Venivi vinguchitiska kuti achitengi nani vinthu mwalisungu. Mwakuyeruzgiyapu, alonda ajeri anguleka kundimanga asani aluta kuchindilinda kubafa kuchisamba. Mwakuti yumoza mwa alonda ajeri wangukumana nani ndipu wangundichiska kuti ndilutirizgi kusintha. Kweniso kwati kwaja chaka chimoza kuti ndituwi, ŵaraŵara ajeri angundiŵika mujeri linyaki lo lenga pafupi ndi jeri likulu lo ndengaku ndipu kwenuku kwenga marangu ngakukwima ukongwa cha. Mu 2004, ndati ndagwira jeri kwa vyaka 10, ndingutuzgika mujeri ndipu angunditumiza kwidu ku Mexico pa basi ya ku jeri.

 Ndati ndafika waka ku Mexico, ndinguwona Nyumba ya Ufumu ya Akaboni aku Yehova. Ndinguwungana nawu kakwamba ndati ndavwala yunifomu yangu ya kujeri, ndipu chakuvwala chenichi ndichu chija chenga chamampha pa nyengu iyi. Akaboni angundilonde mwachanju, mwambula kutole kanthu mo ndawonekiyanga. Ndati ndawona chanju chawu, ndinguziŵa kuti nde pakati pa Akhristu auneneska. (Yohane 13:35) Pa maunganu ngenanga, ŵara mu mpingu angunozga kuti munthu munyaki wasambirengi nani Bayibolu. Pati pajumpha chaka chimoza, pa 3 September, 2005, ndingubatizika nge yumoza waka Akaboni aku Yehova.

 Mu January 2007, ndingwamba kuchita upayiniya wanyengu zosi, ndipu ndapharazganga kwa maora 70 mwezi wewosi, ndichisambiza ŵanthu Bayibolu. Mu 2011, ndingusere Sukulu ya Bayibolo ya Abali Ambula Kuto (yo sonu yidanika kuti Sukulu ya Apharazgi a Ufumu). Sukulu iyi yingundiwovya ukongwa kuti ndifiski maudindu ngangu mu mpingu.

 Mu 2013, ndingutorana ndi Pilar muwolu wangu wakwanjiwa. Iyu wakamba kuti vitimusuzga kugomezga asani nditimukambiya vinthu vo ndachitanga kuvuli. Ndikuleke limu vinthu viheni vo ndachitanga kali. Tosi taŵaŵi, ini ndi muwolu wangu, tigomezga kuti kusintha ko ndikuchita, mbukaboni wakuti Bayibolu le ndi nthazi yakusintha ŵanthu.—Aroma 12:2.

 Ndiwona kuti mazu ngo Yesu wakukamba pa Luka 19:10, ngakamba vaku ini. Pa lemba ili Yesu wanguti: ‘Ini ndinguza kuzipenja ndi kutaska ŵanthu akulanda.’ Ndiwona so kuti nde wakulanda cha pa umoyu wangu. Ndipu nditiŵapweteka so cha ŵanthu. Ndiwonga ukongwa chifukwa Bayibolu landiwovya kuti ndikondwengi chifukwa chakuziŵa kuti umoyu we ndi chilatu kweniso kuti ndichitengi vinthu mwachimangu ndi ŵanthu. Ndipu chakuzirwa ukongwa ntchakuti nde paubwezi wamampha ndi Mlengi wangu, Yehova.