Ndikuwiya mutawuni ya Calgary ku Alberta, mucharu cha Canada. Ama ndi ada angupatukana ndechendakwaniski vyaka vinkhondi. Ndipu ini ndi ama tinguluta kuchija ndi ambuya wo akubala ama. Ambuya anthulumi kweniso anthukazi aŵayanjanga ukongwa ama kweniso ini, ndipu ndakondwanga ukongwa. Mpaka sonu ndikumbuka mbwenu mo ndakondwiyanga ndeche mwana.

 Ndati ndafika vyaka 7 umoyu wangu ungusintha ukongwa. Pa nyengu iyi ama anguweriyana ndi ada ndipu tingusamiya kutawuni ya St. Louis, Missouri, ku United States. Pati pajumpha nyengu yimanavi, ndingwamba kuŵaziŵa umampha ada ndipu ndinguwona kuti yiwu mbankhaza. Mwakuyeruzguyipu, zuŵa lakwamba ndati ndawe kusukulu, yiwu anguziŵa kuti anyangu angundipuma kweni ini ndinguweze cha. Yiwu angukwiya ukongwa ndipu angundipuma ukongwa kuluska mo angundipumiya anyangu kusukulu! Kutuliya penapa nani ndingusambirapu kanthu ndipu ndingwamba kupumana ndi ŵana anyangu nde ndi vyaka 7 pe.

 Ada asweranga cha kufya mtima. Venivi vaŵakwiyasanga ukongwa ama ndipu agazgananga uheni. Ndingwamba kumwa munkhwala wakutimbanyizga wongu kweniso moŵa ndati ndafika vyaka 11. Venivi vingundichitiska kuti ndije munthu mukali ukongwa ndipu kanandi ndapumananga ndi ŵanthu mumsewu. Ndichimaliza sukulu ku sekondale ndenga munthu wakofya kweniso wankhaza ukongwa.

 Ndati ndafika vyaka 18 ndingulembesa ku U.S. Marine Corps kuti ndisere usilikali. Kwenuku ndingusambira mo ndingabayiya munthu vo vinguchitiska kuti ndije wankhaza mwakujumphiska. Pati pajumpha vyaka vinkhondi ndinguleka usilikali kuti nkhasambiri vakukwaskana ndi sayikoloje (psychology) chifukwa ndapenjanga kuti ndisere ntchitu ku wupu wa Federal Bureau of Investigation. Ndingwamba kusambira venivi pa yunivesite yinyaki ku United States, kweni ndati ndawere ku Canada ndinguchimaliziya kwenuku.

 Nde ku yunivesite ndinguguŵa ukongwa ndi mtundu wa ŵanthu. Ndinguwona kuti ŵanthu mbambunu, ndinguwona so kuti vosi vo vichitika pacharu vilivi phindu kweniso masuzgu ngo nge pacharu ngamalengi cha. Ndinguleka kuŵanaŵana kuti ŵanthu angasintha charu.

 Chifukwa chakuti ndawonanga kuti umoyu wangu ulivi phindu, ndamwanga ukongwa moŵa ndi munkhwala wakutimbanyiza wongu, ndapenjanga ndalama mwambunu kweniso ureŵi wenga nkhani cha. Ndajaliyanga ŵaka kwenda mumamphwandu kweniso kusintha anthukazi nge malaya. Chifukwa cha vo ndingusambira kusukulu ya usilikali, ndewu ndayiwopanga cha. Ndawonanga kuti pakundija ndingajalikiska fundu za urunji, ndipu ndakhwapanga weyosi yo ndiwona kuti wachitiya munyaki vambula urunji. Kukamba uneneska, mtima wankhaza ungundisere mu viwanga.

 Zuŵa linyaki ini ndi munyangu tichigwiriskiya ntchitu munkhwala wakutimbanyiza wongu pasi pa nyumba yangu, kweniso tichipangana vo tingachita kuti tijumphisi chamba paboda kuti tikagulisi, munyangu wangundifumba kuti waziŵi asani nditimugomezga Chiuta. Ini ndingumumuka kuti, “Asani Chiuta ndiyu wachitiska masuzgu pacharu, mbwenu nditimukhumba cha pa umoyu wangu!” Mawa laki, lo lenga zuŵa lakwamba pa ntchitu yasonu yo ndingusaniya, munyangu yo ndagwiranga nayu ntchitu yo wenga Kaboni waku Yehova wangundifumba kuti: “Kumbi uŵanaŵana kuti Chiuta ndiyu wachitiska masuzgu pacharu?” Chifukwa chakuŵanaŵaniya vo ndingukamba zana laki, venivi vingundiziziswa ukongwa ndipu ndapenjanga kuziŵa vinandi. Kwa myezi 6 tingukambiskana vinandi ukongwa, ndipu iyu wangundilongo vo Bayibolu limuka pa mafumbu ngasuzga ukongwa ngakukwaskana ndi umoyu ngo ndenga nangu.

 Musungwana yo ndakhumbanga kutorana nayu yo pa nyengu iyi tajaliyanga limoza wakhumbanga cha kuti ndimukambiyengeku vo ndasambiranga. Zuŵa linyaki pa Sabata, ndingumukambiya kuti ndadana Akaboni kuti azitisambizi Bayibolu tosi. Kweni pa Mandi ndichiwe kuntchitu, ndingusaniya kuti wapeya chechosi munyumba ndipu wandithaŵa. Ndingutuliya pabwalu ndi kuliya. Ndingupemphera so kwaku Chiuta ndipu ndingumupempha kuti wandiwovyi. Penapa ndipu ndingugwiriskiya ntchitu zina laku Chiuta lakuti Yehova Kakwamba mu pempheru.—Sumu 83:18.

 Pati pajumpha mazuŵa ngaŵi ndingwamba kusambira Bayibolu ndi banja linyaki la Akaboni aku Yehova. Yiwu ŵati aluta ndingulutirizga kuŵerenga buku lo tasambiranga la mutu wakuti Mungathe Kukhala ndi Moyo Kosatha m’Paradaiso pa Dziko Lapansi,  a ndipu ndingulimaza usiku weniwo. Vo ndingusambira vakukwaskana ndi Yehova Chiuta kweniso Mwana waki Yesu Khristu, vingundifika pa mtima ukongwa. Ndingusambira kuti Yehova ngwalisungu ndipu vitimuŵaŵa asani tisuzgika. (Yesaya 63:9) Ndingukwasika so ukongwa chifukwa chakuŵanaŵaniya mo Chiuta watindiyanjiya kweniso sembi yo Mwana waki wakupereka chifukwa chaku ini. (1 Yohane 4:10) Ndingusimikiza kuti Yehova wazizipizganga nani “chifukwa wakhumba cha kuti weyosi waku yimwi wanangiki, kweni wakhumba kuti weyosi walapi.” (2 Peturo 3:9) Ndingujivwa kuti Yehova wakhumbanga kuti ndije mubwezi waki.—Yohane 6:44.

 Sabata yeniyo ndingwamba kusanirika pa maunganu. Ndenga ndi sisi linandi kweniso ndenga ndi ndeŵeleri ndipu ndawofyanga ukongwa. Kweni Akaboni aku Yehova angundilonde nge mubali wawu yo akumuwonapu kali ukongwa. Yiwu anguchita vinthu nge Akhristu auneneska. Ndingujivwa nge ndawere kunyumba kwa ambuya ŵangu.

 Pechendajumphi nyengu, vinthu vo ndasambiranga mu Bayibolu vingwamba kusintha umoyu wangu. Ndingumeta sisi, ndinguleka ureŵi kweniso kumwa moŵa mwauloŵevu ndi kugwiriskiya ntchitu munkhwala wakutimbanyizga wongu. (1 Akorinto 6:9, 10; 11:14) Ndapenjanga kukondwesa Yehova. Mwaviyo asani ndasambira ŵaka kuti watinkha chinthu chinyaki, ndasaniyanga vifukwa vakugwenthe cha, kweni ndalekanga nyengu yeniyo. Mumtima ndakambanga kuti, ‘Ndikhumbika cha kuchita venivi.’ Ndayesesanga kusintha vakuchita ndi vo ndaŵanaŵananga. Chifukwa cha kuchita vo Yehova wakhumba, ndingwamba kuja umoyu wamampha ukongwa. Ndingubatizika ndi kuja Kaboni waku Yehova pa 29 July 1989 pati pajumpha myezi 6 kutuliya po ndingwambiya kusambira Bayibolu.

 Bayibolu landiwovya kuti ndisinthi mijalidu yangu. Kali ndachitanga vinthu mwankhaza asani munthu wandiyamba. Kweni sonu nditesesa kuti ndije “mwachimangu ndi ŵanthu wosi.” (Aroma 12:18) Ndiziŵa kuti Yehova ndiyu wandiwovya kusintha mwakugwiriskiya ntchitu nthazi ya mu Mazu ngaki kweniso mzimu waki wakupaturika.—Agalatiya 5:22, 23; Aheberi 4:12.

 Ndikuleka kugwiriskiya ntchitu munkhwala wakutimbanyizga wongu, ndikuleka so umoyu wa nkhaza kweniso mijalidu yiheni, kweni sonu nditesesa kukondwesa Yehova ndi kumuchitiya vosi vo ndingafiska. Venivi visazgapu so kuwovya anyaki kuti nawu amuziŵi. Pati pajumpha nyengu yimanavi kutuliya po ndingubatizikiya, ndingusamiya kuchigaŵa cho kwakhumbikanga apharazgi anandi kuti nkhawovyi kupharazga uthenga wa Ufumu waku Chiuta. Pa vyaka vosi ivi ndakondwa ukongwa kusambiza ŵanthu anyaki Bayibolu ndi kuwona mo laŵawovye kusintha maumoyu ngawu. Ndikondwa so ukongwa kuti ama nawu sonu mbakaboni aku Yehova, chifukwa cha kuwona mo ini ndikusinthiya.

 Mu 1999 ndingusere sukulu yo mazuŵa nganu yiziŵika kuti Sukulu ya Apharazgi a Ufumu ku El Salvador. Sukulu yeniyi yingundisambiza vo ndingachita pa ntchitu yakupharazga kweniso mo ndingaphwere mbereri zaku Chiuta mumpingu. Mu chaka chenichi ndingutorana ndi Eugenia. Tosi tichitiya limoza uteŵeti wa nyengu zosi wakupharazga ku Guatemala.

 Sonu mumalu mwakuguŵa ndi umoyu, ndikondwa ukongwa. Kusambira Bayibolu kwandifwatuwa ku ureŵi, umoyu wa nkhaza kweniso kwandiwovya kuti ndisaniyi chanju ndi chimangu.