Apapi ŵangu mba ku Tonga, charu cho che ndi vilwa vakukwana 170 ndipu che kunkhondi chakuzambwi kwa Nyanja ya Pacific. Ku Tonga tajanga umoyu wambula kukhumba vinandi, tengavi galimotu kweniso tajanga munyumba yambula magesi. Kweni tenga ndi mpopi ndipuso tenga ndi nyoli zimanavi. Asani te pa holidi, ini, mvurwa wangu kweniso mku wangu tawovyanga ada kulimiliya munda wo tingupandamu matochi, viyawu, masimbi kweniso vigawu. Ndalama zo ada asaniyanga asani agulisa vo talimanga kweniso asani agwira timaganyu ndizu zaŵawovyanga kuphwere banja. Nge mo ŵanthu anandi wo aja pa vilwa va pa Nyanja ya Pacific achitiya, nasi talitumbikanga Bayibolu kweniso tayanjanga kuluta ku tchalitchi. Kweni taŵanaŵananga kuti tingaja ndi umoyu wamampha asani tingasamiya ku charu chakukhupuka.

 Pa nyengu yo ndenga ndi vyaka 16, asibweni amana angutikambiya kuti tisamiyi ku California, U.S.A. Pakwamba vingutisuzga kuti tiziŵiliyi umoyu wa mu charu ichi. Chinanga kuti vinthu vingwamba kutiyende umampha pa nkhani ya ndalama, kweni muchigaŵa cho tajanga mwayanjanga kuchitika viwawa kweniso anandi ayanjanga kumwa munkhwala wakutimbanyizga wongu. Kanandi ndi usiku, tavwanga kuliya kwa futi ndipu aneba ŵidu anandi awopanga vigeŵenga. Ŵanthu anandi ayendanga ndi futi kuti ajivikiliyengi kweniso kuti ataskengi ŵanthu asani ayambana. Pa ndewu yinyaki yo yinguchitika angundilasa ndi futi ndipu nde ndi chipolopolu panganga yapa.

 Pa nyengu yo ndenga ku sekondale ndakhumbanga cha kumaliyapu. Ndipu kamana ndi kamana, ndingwamba kuchita nawu maphwandu ngaviwawa, kuloŵe ndipuso kugwiriskiya ntchitu munkhwala wakutimbanyizga wongu. Pati pajumpha nyengu, munkhwala wa cocaine ungundisere mundopa. Kuti ndisaniyengi ndalama zakuguliya munkhwala wenuwu, ndingwamba kuba. Chinanga kuti apapi kweniso abali ŵangu atanja vakusopa, kweni ŵenga ŵechendandipasepu ulongozgi wakuti ndileki kwanjana ndi mabwezi ngaheni. Ndikumangikapu maulendu nganandi chifukwa cha ndewu. Kukamba uneneska, umoyu wangu ungunangika ukongwa ndipu pakumaliya paki ndinguchimaliya mujeri.

 Zuŵa linyaki mu 1997, pa nyengu yo ndenga mujeri, munthu munyaki yo nayu wangumangika wangundiwona kuti ndakoleze Bayibolu. Iyi yenga nyengu ya Khrisimasi, yo Atonga atiyiwona kuti ndi nyengu yapade ukongwa. Munthu uyu wangundifumba asani ndiziŵapu chechosi chakukwaskana ndi vo Bayibolu likamba pa nkhani ya kuwa kwaku Yesu, kweni pengavi cho ndaziŵangapu. Iyu wangundilongo mavesi nga mu Bayibolu ngo ngakamba va kuwa kwaku Yesu ndipu ndinguwamu kuti midawuku yinandi yo ŵanthu achita yakukwaskana ndi Khrisimasi nja mu Malemba cha. (Mateyu 2:1-12; Luka 2:5-14) Ndinguzizwa ukongwa ndati ndaziŵa venivi ndipu ndingukhumbisiska kuziŵa vinandi vo Bayibolu likamba. Munthu uyu wawungananga ndi Akaboni aku Yehova wo achitisanga maunganu sabata yeyosi mujeri lenili ndipu nani ndinguŵanaŵana kuti ndiluti nayu. Pa nyengu iyi asambiranga buku la Chivumbuzi. Chinanga kuti ndavwanga vosi cha pa vo vakambikanga, kweni ndinguziŵa kuti vosi vo asambiranga vatuliyanga mu Bayibolu.

 Akaboni ŵati andipempha kuti asambirengi nani Bayibolu, nyengu yeniyo ndinguzomera. Kenga kakwamba kuvwa kuti mu Bayibolu mwe layizgu lakuti kunthazi charu chapasi chazamukuŵa paradayisu. (Yesaya 35:5-8) Yapa sonu ndinguwamu kuti asani ndikhumba kukondweska Chiuta ndikhumbika kusintha umoyu wangu. Ndinguziŵa kuti Yehova Chiuta wangandizomereza cha kusere mu Paradayisu asani nde ndi mijalidu yiheni. (1 Akorinto 6:9, 10) Mwaviyo, ndingusimikiza mtima kuti ndileki kukweŵa foja, kuloŵe, kukwiya liŵi kweniso kumwa munkhwala wakutimbanyizga wongu.

 Mu 1999, ndechendamalizi kugwira jeri, apolisi angunditumiza ku jeri linyaki. Pangujumpha chaka champhumphu ndechendakumani ndi Akaboni aku Yehova. Kweni ndingusimikiza mtima kuti ndilutirizgengi kusintha umoyu wangu. Mu chaka cha 2000, boma la United States lingundiweze ku Tonga.

 Ndati ndawere ku Tonga, ndinguyesesa kufufuza Akaboni aku Yehova, ndipu ndati ndaŵasaniya ndingwamba so kusambira Bayibolu. Ndakondwanga ukongwa ndi vo ndasambiranga. Ndingukondwa so ukongwa kuwona kuti vosi vo Akaboni aku Yehova ku Tonga asambizanga, vatuliyanga mu Bayibolu nge mo achitiyanga Akaboni a ku United States.

 Ada aziŵikanga ukongwa muchigaŵa cho ajanga chifukwa chakuti ŵenga ndi udindu ukulu ukongwa ku tchalitchi lawu. Pakwamba, apapi kweniso abali ŵangu wosi ŵati ŵavwa kuti ndisambira ndi Akaboni aku Yehova angukwiya ukongwa. Kweni pavuli paki, apapi ŵangu angukondwa ukongwa ŵati awona kuti fundu za mu Bayibolu zitindiwovya kusintha nkharu yangu.

 Ndingusuzgika ukongwa kuleka kumwa moŵa wa kava wo ŵanthu anandi muchigaŵa cha Tonga atumwa. Moŵa wenuwu apanga kutuliya ku misisi ya sabola. Ndingwamba kuluta ku malu ngakumwiya moŵa pafufupi usiku wewosi ndipu ndawengaku ndaloŵe. Suzgu likulu lenga lakuti ndayanjananga ndi mabwezi ngaheni ngo ngatoliyangaku kanthu cha fundu za mu Bayibolu. Pavuli paki, munthu munyaki wangundiwovya ndipu ndinguziŵa kuti nkharu yangu yitimukondwesa cha Chiuta. Pakumaliya paki, ndingusintha kuti Chiuta wandiyanjengi kweniso kuti wanditumbiki.

 Ndingwamba kusanirika pa maunganu ngosi nga Akaboni aku Yehova. Kwanjana ndi ŵanthu wo atesesa kukondwesa Chiuta kungundiwovya kusintha nkharu yangu. Mu 2002, ndingubatizika kuja Kaboni waku Yehova.

 Ndayanduwa ukongwa chifukwa Chiuta ngwakuzikira, nge mo Bayibolu likambiya kuti: “Yehova . . . wazikira namwi chifukwa wakhumba cha kuti weyosi wanangiki, kweni wakhumba kuti weyosi walapi.” (2 Peturo 3:9) Chiuta wakakhumbengi mphanyi wakutuzgapu kali charu chiheni, kweni wazomereza kuti pajumphi nyengu yitali kuti ŵanthu nge ini asambiri vaku iyu ndi kuja nayu pa ubwezi. Nditanja kuŵanaŵana kuti mphanyi Yehova wangundigwiriskiya ntchitu kuti ndiwovyi ŵanthu kuti asinthi.

 Yehova wangundiwovya kuti ndileki kuchita vinthu vo vananganga umoyu wangu. Sonu ndikuleka kuba. Mumalu mwaki nditovya ŵanthu kuti nawu aje pa ubwezi ndi Yehova. Chifukwa chakwanjana ndi Akaboni aku Yehova pasonu panu ndikusaniya munthukazi wakutowa, zina laki Tea. Te ndi mwana yumoza munthulumi ndipu tosi tikondwa mu banja lidu. Tosi mu banja lidu tisambiza ŵanthu vo Bayibolu likamba vakukwaskana ndi chilindiza cha kuzija mwachimangu mu paradayisu.