Ndikuwiya ku Montreal, tawuni yikulu ukongwa muchigaŵa cha Quebec ku Canada. Mubanja lidu tengamu ŵana anayi ndipu apapi ŵidu atiyanjanga ukongwa. Tajanga mudera lo liziŵika kuti Rosemont. Tajanga umoyu wamampha ukongwa kweniso wachimangu.

 Ndeche mwana ndaliyanjanga ukongwa Bayibolu. Ndikumbuka kuti nde ndi vyaka 12 ndaŵerenganga nkhani yakukwaskana ndi Yesu mu Chipanganu Chasonu, ndipu ndayiyanjanga ukongwa. Chifukwa chakuwona chanju ndipuso lisungu lo wachitiyanga ŵanthu anyaki, nani ndakhumbanga kuja nge Yesu. Kweni ntchachitima kuti ndichikuwa ndinguleka kuŵanaŵana venivi chifukwa ndingwamba kuchita vinthu ndi ŵanthu a mijalidu yiheni.

 Ada ambanga chipangizu chinyaki chakumbiya sumu cho chiziŵika kuti saxophone. Yiwu angundipasa chipangizu chenichi kweniso angundisambiza kumba ndi kwanja sumu. Chifukwa cha venivi ndingwamba kuŵika mtima pa kumba sumu. Ndaziyanjanga ukongwa sumu, mwakuti pechendajumphi nyengu yitali ndingusambira so kumba gitala. Pati pajumpha nyengu ndingupanga bandi yakumba sumu limoza ndi anyangu, ndipu tambanga mumalu ngakupambanapambana. Ŵanthu anyaki akutchuka wo ajambulanga sumu, anguwona lusu langu ndipu anguza kuzindikambiya kuti andiwovyi kujambula sumu zangu. Ndingupanga phanganu ndi kampani yinyaki yikulu yo yajambulanga sumu. Sumu zangu zingutchuka ukongwa ndipu zavwikanga kaŵikaŵi pa wayilesi ku Quebec.

 Pa nyengu iyi ndajivwanga nge kuti nde ndi chechosi pa umoyu. Ndenga ndeche munyamata, ndenga wakutchuka kweniso ndagwiranga ntchitu ya pa mtima pangu ndipu ndasaniyanga ndalama zinandi. Ndi musana ndachipanganga ma ekisasayizi, ndakumananga ndi atorankhani, ndakumananga ndi ŵanthu kuti ndisayinengi pa vinthu vawu kweniso ndawonekanga pa TV. Ndi usiku ndambanga ku vakuchitika vakupambanapambana kweniso ndakanga ku maphwandu. Kuti ndimalenengi umampha ndi ŵanthu, ndingwamba kumwa moŵa ndeche munamana ndipu pavuli paki ndingwamba kugwiriskiya ntchitu munkhwala wakutimbanyizga wongu. Ndajanga umoyu wakutayiliya kweniso ndachitanga mijalidu yinandi yiheni ukongwa.

 Anyaki akhumbiranga umoyu wo ndajanga chifukwa vawonekanga kuti ndikondwa. Kweni asani nde pakundija, m’mtima ndajivwanga kuti nditijipusisa ŵaka. Ndasuzgikanga maŵanaŵanu kweniso ndafipanga mtima. Chakuchitiska chitima ukongwa ntchakuti pa nyengu yo kutchuka kwangu kungulirima nge motu, ŵanthu ŵaŵi wo andijambuliyanga sumu angufwa ndi AIDS. Ndinguguŵa ukongwa! Chinanga kuti ndaziyanjanga sumu, kweni umoyu wo ndajanga chifukwa cha sumu zenizi ungundiseruska ukongwa.

 Chinanga kuti vinthu vandiyendiyanga umampha, kweni ndaziŵanga kuti vinthu ve umampha cha pacharu. Ndajifumbanga kuti ntchifukwa wuli pacharu pe vinthu vambula urunji? Ntchifukwa wuli Chiuta waleka kuchitapu kanthu? Ndipu ndapempheranga kwaku Chiuta kuti wandimuki mafumbu ngenanga. Zuŵa linyaki ndati ndawe kumalu ngakupambanapambana ko tambanga, ndingwamba so kuŵerenga Bayibolu. Chinanga kuti vinandi vo ndaŵerenganga vandipitanga, kweni ndingusimikizga kuti umaliru wepafupi.

 Ndichiŵerenga Bayibolu, ndingusaniya fundu yakuti nyengu yinyaki Yesu wangufunga kurya kwa mazuŵa 40. (Mateyu 4:1, 2) Nani ndinguŵanaŵana kuti asani ndingafunga panyaki Chiuta wajivumbuwengi kwaku ini. Sonu ndingusankha zuŵa lakuti ndiyambiyi kufunga. Kwati kwaja masabata ngaŵi kuti ndiyambi kufunga, Akaboni aku Yehova ŵaŵi anguza kunyumba kwangu. Ndinguŵakambiya kuti asere. Yumoza waku yiwu zina laki Jacques ndingumulereska dodori, ndipu ndingumufumba kuti, “Kumbi tingaziŵa wuli kuti tija mu mazuŵa ngakumaliya nga charu ichi?” Iyu wangujula Bayibolu kuti wandimuki ndipu wanguŵerenga lemba la 2 Timote 3:1-5. Ndinguŵagundizga so ndi mafumbu nganyaki nganandi. Kweni ndingukhorwa ndi vo andimukanga chifukwa venga vakuvwika umampha ndipuso agwiriskiyanga ntchitu Bayibolu. Ŵati andiyende maulendu nganyaki ngamanavi, ndinguwona kuti pengavi so chifukwa chakufungiya.

 Ndingwamba kusambira Bayibolu kaŵikaŵi ndi Akaboni aku Yehova. Pati pajumpha nyengu, ndingumeta sisi langu ndipuso ndingwamba kusanirika pa maunganu ngosi pa Nyumba ya Ufumu yakufupi. Chifukwa cha mo abali ndi azichi angundilondere, ndinguvwana kuti ndasaniya nadi uneneska.

 Ndakhumbikanga kusintha vinthu vikuluvikulu pa umoyu wangu kuti vakuchita vangu vikoliyanengi ndi vo ndasambiranga mu Bayibolu. Mwakuyeruzgiyapu, ndakhumbikanga kuleka kugwiriskiya ntchitu munkhwala wakutimbanyizga wongu kweniso ndakhumbika kuleka kuja umoyu wakutayiliya. Ndakhumbikanga so kusintha umoyu wangu wakujiyanja ndi kwamba kuŵanaŵaniya anyaki. Pakuti ndenga mu banja la mpapi yumoza, ndakhumbikanga so kusambira vo ndingachita kuti ndiphweriyengi ŵana ŵangu kuti aje ndi nkharu yamampha kweniso kuti aje pa ubwezi ndi Chiuta. Mwaviyo, ndinguleka kumba sumu ndipu ndingwamba kugwira ntchitu ya malipiru ngamana ku fakitale yinyaki.

 Kusintha vinthu vosi ivi kwenga kupusu cha. Ndati ndaleka kugwiriskiya ntchitu munkhwala wakutimbanyizga wongu, mazuŵa nganyaki chibaba chandisuzganga, mbwenu ndasanirikanga kuti ndachitapu so kamanavi. (Aroma 7:19, 21-24) Kuleka umoyu wangu wakutayiliya naku yenga ntchitu. Ntchitu yo ndingwamba kugwira nayu yandivukisanga kweniso tindalama to ndalondiyanga natu tandipasanga nthazi cha. Vingunditore myezi yitatu kuti ndisaniyi ndalama zo ndazisaniyanga ŵaka kwa maora ngaŵi ndi chimba sumu.

 Pempheru ndilu lingundiwovya kukunthiyapu ndi kulutirizga kusintha vinthu vakusuzga venivi. Kuŵerenga so Bayibolu kaŵikaŵi naku kungundiwovya. Penga mavesi nganyaki ngo ngangundichiska ukongwa. Limoza mwa mavesi ngenanga ndi lemba la 2 Akorinto 7:1, lo lichiska isi Akhristu kuti “tijitowesi ku chinthu chechosi chakukazuza liŵavu ndi mzimu.” Lemba linyaki lo lingundiwovya kuziŵa kuti ndingafiska kuleka kuchita vinthu viheni lenga la Afilipi 4:13, lo likamba kuti: “Mu vinthu vosi ndija ndi nthazi kuporote mwaku yo watindipaska nthazi.” Yehova Chiuta wakumuka mapempheru ngangu ndipuso wakundiwovya kuvwisa uneneska wa mu Bayibolu ndi kuwugwiriskiya ntchitu. Venivi vikundichitiska kuti ndijipaturiyi kwaku iyu. (1 Peturo 4:1, 2) Ndingubatizika mu 1997 kuti ndije Kaboni waku Yehova.

 Ndiziŵa kuti asani ndingulutiriza kuja umoyu wo ndajanga kali, mphanyi sonu nde mudongu. Kweni sonu ndikondwa ndi umoyu chayiwu! Yehova wanditumbika so pakundipaska munthukazi wamampha ukongwa Elvie. Tosi tikondwa kusambiza ŵanthu Bayibolu nge ateŵeti a nyengu zosi. Venivi vitindichitiska kuti ndikondwengi ukongwa kweniso ndikhorwengi. Nditimuwonga ukongwa Yehova chifukwa chakundiguziya kwaku iyu.—Yohane 6:44.