Artur, wakuwonere dera ku Armenia, wacheziyanga mpingu unyaki wa Akaboni aku Yehova. Iyu wangusaniya kuti abali ndi azichi mumpingu wenuwu, achita cha upharazgi wa kumalu ko kusanirika ŵanthu anandi wo usazgapu kugwiriskiya ntchitu timashelufu. Kuti achiski abali kuchita upharazgi wenuwu, Artur ndi muwolu waki Anna limoza ndi Kaboni munyaki zina laki Jirayr, anguchimika kashelufu pamalu nganyaki mu tawuni yeniyi. Yiwu angusankha kuma pamalu po pajumphanga ŵanthu anandi.

 Ŵanthu anandi angukopeka ndipu angwamba kutopu mabuku. Kweni pati pajumpha nyengu yimanavi, ŵanthu akususka angukwiya ndi upharazgi wasonu wenuwu. Asembi ŵaŵi anguza po penga kashelufu kenaka ndipu kwambula kukamba chechosi yumoza wakuyiwu wangukawisiya pasi. Pavuli paki wasembi mwenuyu wangumuwomba khofi Artur, ndipu magilasi ngo wanguvwala nganguwa pasi. Artur, Anna ndi Jirayr anguyesesa kuchita nawu vinthu mwakuzika asembi ŵenaŵa kweni angutuna cha. Asembi angukadyakadyaka kashelufu ndipu mabuku ngangumbininika bwekabweka. Yiwu wati aŵachawuta Akaboni kweniso kuŵawofyeza angulutirizga ulendu wawu.

 Artur, Anna ndi Jirayr anguchimangala ku polisi. Yiwu angulembesa sitetimenti kweniso angupharazgiya apolisi ndi ŵanthu anyaki wo agwiranga ntchitu kwenuku. Akaboni atatu ŵenaŵa anguluta nawu mu ofesi ya mura wa apolisi. Pakwamba mura wa apolisi mwenuyu wakhumbanga ŵaka kuziŵa vosi vo vinguchitika. Kweni iyu wati waziŵa kuti Artur, yo wawonekanga kuti ngwanthazi ukongwa wanguweze cha wati wapumika khofi, iyu wanguleka kuŵafumba mafumbu ngakukwaskana ndi vo vinguchitika, ndipu wangwamba kuŵafumba vo Akaboni agomezga. Venivi vinguchitiska kuti akambiskani kwa maora nganayi! Mura wa apolisi wangukondwa ndi vo wanguvwa ndipu wangukamba kuti: “Chisopa chamampha ukongwa ichi! Ndichu chisopa chakwenere kuserena ichi!”

 Mawa laki, Artur wati wawere so kuchipharazga, munthu yo wanguwona vo vinguchitika wanguza kwaku iyu. Iyu wangumuwonga Artur chifukwa chakuchita vinthu mwakuzikira kweniso kuleka kuweze vo asembi angumuchitiya. Iyu wangukamba so kuti vo wanguwona vinguchitiska kuti waleki kutumbika asembi wosi.

 Mazulu ngenanga mura wa apolisi wangumudaniya so ku polisi Artur. Kweni mumalu mwakukambiskana va mulandu, iyu wangumufumba mafumbu nganandi ngakukwaskana ndi Bayibolu. Apolisi anyaki ŵaŵi nawu angujapu.

 Mawa laki, Artur wanguluta so kuchikumana ndi mura wa apolisi, kweni pa nyengu iyi wanguchimulongo mavidiyo ngakukonkhoska Bayibolu. Iyu wangudana so apolisi anyaki kuti aziwonere mavidiyo ngenanga.

 Chifukwa cha nkharu yiheni ya asembi, apolisi anandi ŵenga ndi mwaŵi wakuvwisiya uthenga wamampha kakwamba. Venivi vinguwovya apolisi ŵenaŵa kuziŵa kuti Akaboni aku Yehova mbanthu amampha.