Clodean, yumoza wa Akaboni aku Yehova ndipu waja ku South Africa, wenga muchipatala kuti amuchiti opaleshoni yikulu. Wenga ndi masuzgu nganandi nga muliŵavu ndipu wakhumbikanga kusankha nthowa zakupambanapambana za kulonde munkhwala. Iyu wavukanga, wavwanga kuŵaŵa ndipuso wafipanga mtima ukongwa, wechendapangiki opaleshoni kweniso wati wapangika. Kwa masabata pafufupi 10, wanguwere kunyumba, ndipu wafiskanga mbwenu cha kuja uja. Ndipu chifukwa cha mulili wa COVID-19, walondiyanga cha alendu.

 Clodean wakhumbanga cha kuti wajivwiyengi chitima, ndipu iyu wangupempha Yehova kuti wamupaski nthazi kuti wapembuzgengi anyaki. So wati wayamba waka kuja uja wangumbiya mvurwa wa aneba ŵaki yo pa nyengu yinyaki wasambiranga Bayibolu ndi Akaboni kweni wanguzileka. Clodean wangukambiskana nayu fundu zakuchiska za mu Mazu ngaku Chiuta ndipu venivi vinguchiska munthukazi yo kuti wayambi so kusambira. Clodean wangukonkhoska so umampha wakuchitanga maunganu nga Chikhristu kweniso wawonesesanga kuti wakusambira waki walumikizengi maunganu kuziya pa vidiyokomferensi. Munthukazi yo wangulumikiza maunganu ndipuso kupereka ndemanga asani fumbu lafumbika kweniso kumuka pachigaŵa chinyaki.

 Clodean wangukambiskana so ndi mvurwa wa sambiru laki yo wakhumbisiskanga kusambira Bayibolu. Iyu wangumukambiya Clodean vakukwaskana ndi anyaki wo nawu akhumbisiska kusambira. Kumbi chinguchitika ntchinthu wuli? Clodean wangwamba kusambira ndi anthukazi anayi. Kweni nkhani yaki yimaliya penapa cha!

 Chifukwa chakuti Clodean waŵanaŵaniya ukongwa anyaki, iyu wangufiska kwambisa masambiru ndi anthukazi anyaki 10 mu nyengu ya mulili. Venivi ving’anamuwa kuti Clodean wasambiranga Bayibolu ndi ŵanthu 16! Anyaki achita maunganu nga Chikhristu nyengu zosi kuziya pa vidiyokomferensi. Chifukwa chakuti Clodean watangwanika kovya ŵanthu kuziŵa vakukwaskana ndi Yehova, iyu waŵanaŵaniyaku cha va suzgu yaki. Iyu wawona so kuti wafiska kupembuzga anyaki chifukwa chakuti Yehova “Chiuta wakupembuzga ukongwa,” watimupembuzga mu mayeseru ngaki.—2 Akorinto 1:3, 4.

 Kumbi akusambira aku Clodean atuvwa wuli ndi vo akusambira? Yumoza mwaku yiwu wangukamba kuti: “Ndayanduwa munthowa zinandi. Kweni chinthu chakovya ukongwa kwaku ini chenga kuziŵa zina laku Chiuta. Venivi vandiwovya kuti ndije paubwezi wakukho ndi Yehova.” Ndipu munthukazi yo Clodean wangwamba kukambiskana nayu walindizga kuti wabatiziki pambula kuswera yapa. Vakuchitika venivi vitimuwovya Clodean kuja ndi likondwa likulu. Ndipu wakuchira umampha opaleshoni yaki.