Zuŵa linyaki po Eliso yumoza wa Akaboni aku Yehova wasambizanga Bayibolu munthukazi munyaki, mwamabuchibuchi kunyumba ya munthukazi mwenuyu kunguza alendu. Alendu ŵenaŵa wenga mliska wa ku chisopa chaki limoza ndi muwolu waki. Eliso wanguvwapu kuti banja lenili mwana wawu yija munthulumi wangufwa pambula kuswera.

 Eliso wati waŵapembuzga kutuliya pasi pa mtima chifukwa cha nyifwa ya mwana wawu, mliska mwenuyu ndi muwolu waki angwamba kuliya ukongwa. Pavuli paki, mwaukali mliska uyu wangukamba kuti: “Ndivwisa cha chifukwa cho Chiuta wazomereze kuti mwana wangu wafwi! Ntchifukwa wuli wakuto mwana wangu yumoza pe munthulumi? Ndateŵete Chiuta kwa vyaka 28, ndipu ndamuchitiya vinthu vinandi vamampha, kweni yeniyi ndiyu mphotu wandipaska! Ntchifukwa wuli Chiuta wakubaya mwana wangu?”

 Eliso wangukonkhoske banja lenili kuti Chiuta wakuto mwana wawu cha. Iyu wangukambiskana so nawu nkhani zinyaki nge nkhani ya sembi, chiyuka kweniso chifukwa cho Chiuta wazomereze kuti vinthu viheni vichitikengi. Mliska mwenuyu limoza ndi muwolu waki angukambiya Eliso kuti wanguŵawovya kusaniya kwamuka kwa mafumbu ngo apempheranga kwaku Chiuta kuti waŵamuki.

 Sabata yakulondopu, mliska mwenuyu ndi muwolu waki anguza so kunyumba ya munthukazi mwenuyu kuti nawu azijepu pakusambira Bayibolu. Eliso wangukambiskana nawu nkhani yamutu wakuti “Chilindizga Cheneku cha Akwanjiwa Ŵinu wo Akutayika,” mu buku lakuti Kumbi Bayibolo Lisambizanji Weniukongwa? Banja ili linguvwisiya ndi mtima wosi nkhani yo akambiskananga.

 Pavuli paki, mliska uyu ndi muwolu waki, anguluta ku unganu wa Akaboni aku Yehova wo unguchitikiya mutawuni ya Tbilisi, ku Georgia. Yiwu angukwaskika ukongwa kuwona kuti abali mbakukoliyana kweniso atanjana, mijalidu yo yiwu akhumbisiskanga kuti ŵanthu a kutchalitchi kwawu aje nayu, kweni vachitikanga cha.