Mu chaka cha 2015, alendu pafufupi 175,000 anguluta kuchiwona ofesi ya nthambi ya Akaboni aku Yehova ya ku Central America yo ye mu charu cha Mexico. Ŵanthu pafufupi 670 azanga zuŵa lelosi. Anandi mwa alendu ŵenaŵa azanga mu magulu ngakulungakulu ndipu ayendanga mu ma basi nga hayala. Ndipu anyaki anozgekiyanga ulendu wenuwu kweche myezi yinandi.

Ku ŵanthu anyaki venga vakusuzga kuti aluti kuchiwona ofesi ya nthambi yo yidanika kuti Beteli. Mwakuyeruzgiyapu, abali ndi azichi a mu mpingu wo we ku Mexico mu dera la Veracruz, ŵengavi ndalama zakulipiliya basi pa mtunda wa makilomita 550. Mwaviyo, angujalikiska ndondomeku yo ayidananga kuti “Ulendu Wakuchiwona Beteli.” Yiwu angunozga magulu nga ŵanthu kuti abikengi ndi kugulisa vakurya. Asaniyanga so ndalama pakugulisa mabotolu nga pulasitiki ngo akungagwiriskiyapu ntchitu kali. Pati pajumpha myezi yatatu, angusaniya ndalama zakulipiliya ulendu wakuluta ku Beteli.

Kumbi phamphu lo anguchita kuti asaniyi ndalama linguluta paŵaka? Awa. Mwakuyeruzgiyapu, munyamata wa mu mpingu unyaki zina laki Lucio wangulemba kuti: “Ulendu wa kuchiwona beteli, ungundiwovya kuti ndichitengi vinandi kweniso kuti ndijiperekengi ukongwa pakuchita uteŵeti wangu mu mpingu.” Elizabeth yo we ndi vyaka 18 nayu wangukamba kuti: “Ndati ndaluta ku Beteli, ndinguwona mo ŵanthu wo ateŵete kwenuku alongore chanju ndipu ivi vingundiwovya kuziŵa kuti ŵanthu yaŵa atanja nadi Yehova. Venivi vingundipangisa kuti ndiyambi kuchita vinandi pakuteŵete Chiuta. Mwaviyo, ndingwamba kuchita uteŵeti wa nyengu zosi.”

Nyengu zinyaki, alendu masauzandi nganandi azanga zuŵa limoza kuziwona malu. Abali wo ŵenga ndi udindu wakulonde alendu agwiranga ntchitu mwaphamphu ndipu alondiyanga alendu ndi manja ngaŵi. Msungwana munyaki zina laki Lizzy wangukamba kuti: “Ndachiskikanga ukongwa asani ndiwona ŵanthu wo azanga kuziwona malu awonga mo tigwiriya ntchitu kweniso asani ndituvwa vo achita kuti afiski kuziwona ofesi ya nthambi.”

Kuti afiski kulonde alendu anandi wo atuza kuziwona malu, abali ndi azichi anyaki ku Beteli wo ŵe mu madipatimenti nganyaki nawu atijipereka pakugwira ntchitu yeniyi. Chinanga kuti kuchita venivi kuchitisa kuti ntchitu yikuwi, kweni yiwu akondwa ukongwa kulonde alendu. Juan wati wamaliza kulongo malu alendu wangukamba kuti: “Alendu akondwa ukongwa asani ndamaliza kuŵalongo malu ndipu ndiziŵa kuti vo ndachita valuta paŵaka cha.”

Ŵana nawu akondwanga asani aluta ku Beteli. Noriko yo wateŵete mu dipatimenti yakuwonere ma kompyuta wangukamba kuti: “Ndafumbanga ŵana wo ŵaza kuziwona malu asani akhumba kuziteŵete pa Beteli. Ndipu wosi amukanga kuti, ‘Hinya tikhumba kuziteŵete pa Beteli!’” Malu ngamoza ngo ŵana akondwanga nangu ndi ngo pe “Vithuzi vaku Kalebi ndi Sofiya.” Pa malu ngenanga, ŵana ajambulisiyangapu vithuzi vo kukuwa kwaki kwayanananga ndi vithuzi va ku Kalebi ndi Sofiya, vo visanirika mu mavidiyo nga mutu wakuti Jani Bwezi Laku Yehova. Noriko wangukamba so kuti: “Ŵana akondwanga ukongwa.”

Ŵana anandi awonga ntchitu yo yichitika pa Beteli. Mwakuyeruzgiyapu, mwana munyaki waku Mexico zina laki Henry, wasunganga ndalama mu chidoli cho chawonekanga nge nkhumba ndi chilatu chakuti wakapereki ndalama zo asani waziluta ku Beteli. Pa pepala lo wangupereka limoza ndi ndalama, wangulembapu kuti: “Chondi gwiriskiyani ntchitu ndalama izi kuti mupangiyi mabuku nganandi. Nditikuwongani chifukwa mutijipereka pa kumuteŵete Yehova.”

Akaboni aku Yehova awonesa ŵanthu maofesi ngawu kweniso malu ngo apulintiyaku mabuku kwawezi pacharu chosi chapasi. Asani namwi mukhumba kuziwona ofesi ya nthambi, titikudanani kuti muziwoni. Tikayika cha kuti mwazamukondwa asani mwaza kuziwona malu. Kuti muziŵi vinandi vakukwaskana ndi kuwona malu lutani pa chigaŵa chakuti VAKUKWASKANA NDI ISI > ZANI MUZIWONI MAOFESI NGIDU.