Pa Chinkhondi, 5 July 2013, banja la Beteli ku United States lingukondwa ukongwa kuvwa chipharazgu cho M’bali Anthony Morris wa mu Wupu Wakulongozga wangukamba. Chipharazgu chaki chenga chakuti: “Tipenja kugulisa nyumba zidu 6 zo ze ku 117 Adams Street ndi ku 90 Sands Street ku Brooklyn. * Wo agulengi nyumba nambala 1 mpaka 5 apenja kuti tituwemu mkatikati mwa mwezi wa August chaka chenichinu.”

Ivi vingulongore limu kuti pajengi ntchitu yikulu. Ukulu wa nyumba zinkhondi zenizi uyanana waka ndi magirawundi nga bola ngakukwana 11! Ndipu takhumbikanga kusama munyumba zenizi m’mazuŵa 60!

Kwa vyaka vinandi, nyumba nambala 1 mpaka 5 mwajanga vipangizu vakusindikiziya mabuku. Kweni mu 2004 tinguvisamisiya ku malu nganyaki ku Wallkill, New York.

Kutuliya pa nyengu yeniyi, munyumba izi mwasungikanga waka vinthu. Mwaviyo munguzaza vipangizu vakuzenge, mipandu ndi mathebulu nga m’maofesi kweniso vinthu vinyaki vakugwiriya ntchitu vo vatumizikanga m’malu ngakupambanapambana ku United States ndi ku vyaru vinyaki ko kwagwirikanga ntchitu zakuzenga.

Kuti tifiski kusama m’mazuŵa ngo tingupasika, pakhumbikanga ndondomeku yamampha. Chakwamba, tinguwona so dankha vinthu vo tasunganga munyumba iyi kuti tiziŵi vo tingagulisa, kutaya pamwenga kusunga. Pavuli paki, tingwamba kusamisa vinthu. Tinguchita mwakuphwere kuti paleki kuchitika ngozi ndipuso kuti vinthu vileki kunangika.

Banja la Beteli linguwovya ukongwa pa ntchitu iyi. Abali ndi azichi anyaki 41 angudanika kuti azi pa Beteli kuti aziwovyi pa ntchitu iyi. Abali ndi azichi yaŵa, angutuliya muvigaŵa vakupambanapambana ku United States. Anandi ŵenga anyamata ambula kuto. Yiwu anguzomera kuzigwiraku ntchitu iyi kwa masabata 6 pamwenga 10. Anyaki anguleka mabanja ngawu, mabwezi kweniso ntchitu zawu kuti azigwireku ntchitu iyi pa Beteli. Kumbi yiwu anguyiwona wuli ntchitu iyi?

Jordan, wa vyaka 21, yo wangutuliya ku Washington wangukamba kuti: “Mphanyi ndinguza liŵi kuzigwiraku ntchitu yeniyi.”

Steven wa vyaka 20, yo wangutuliya ku Texas wanguti: “Ndingujiwona kuti nde mubanja likulu lo ligwira ntchitu mwaphamphu, lalikondwa ndipu litovya charu chosi.”

Justin wa vyaka 23 wanguti: “Panu pa Beteli ndajivwanga kuti nde wakufwatuka. Pa Beteli asambira fundu zapachanya zauzimu, atanjana ndipuso ŵanthu ŵaki mbakukoliyana.”

Adler wa vyaka 20, yo wangutuliya ku Puerto Rico, wanguti: “Ndasuzgikanga kuyuka mulenjilenji kweni ndasaniya mabwezi ngo ndijengi nangu mpaka muyaya.”

William yo we ndi vyaka 21, wanguti: “Ndeche mwana ndakhumbisisanga kuteŵete pa Beteli. Pakwamba, ndawonanga kuti ndamusoŵa ŵanthu akucheza nawu, kweni ndimu venge cha. Ndingukondwa ukongwa panyengu yo ndinguteŵetiyapu pa Beteli! Ndiwona kuti palivi malu nganyaki ngamampha ukongwa kuphara panu.”

Kumbi abali wo agwiranga ntchitu iyi anguyiko nyengu? Hinya, yiwu angugwira ntchitu iyi m’mazuŵa 55 pe.