Kwambiya pa 2 mpaka pa 24 July, 2016, ku France kunguchitika maphara nga njinga nga nambala 103. Pa nyengu iyi, ŵanthu ŵenga ndi mantha ukongwa. Ivi venga viyo chifukwa chakuti mu vyaka vakuvuli, ku France kunguchitika va uchigaŵenga maulendu nganandi ndipu ŵanthu akujumpha 100 angubayika. Pavuli paki, pa 14 July, 2016 pa nyengu ya holidi, chigaŵenga chingubaya ŵanthu anandi ndi galimotu wo awoneriyanga kuphulisika kwa makombola mutawuni ya Nice. Ŵanthu akukwana 86 akubayika ndipu anandi angupwetekeka.

Chinanga kuti venga viyo, Akaboni aku Yehova akhumbisiskanga kupembuzga kweniso kuchiska ŵanthu wo ŵenga ndi mantha ndi chitima pa nyengu yakusuzga yeniyi. Mwaviyo, yiwu angugwiriskiya ntchitu timathebulu ndi timashelufu tamatayala ndipu angutiŵika mumalu ngakupambanapambana ngo achitiyangaku maphara nga njinga ku France. Akaboni akujumpha 1,400 angujipereka kugwira ntchitu yakupharazga ndipu angugaŵiya mabuku ngo ngakonkhoska Bayibolu ngakujumpha 2,000 ku ŵanthu wo akhumbanga kwamuka kwa mafumbu nganyaki ngakukhumbika ukongwa ngakukwaskana ndi umoyu.

Ŵanthu wo alondonga wo achitanga maphara nga njinga, anguzizwa kuwona kuti kosi ko alutanga kwenga Akaboni aku Yehova. Arara anyaki wo awoneriyanga maphara ngenanga anguwonga Akaboni chifukwa cha mo anguchitiya vinthu ndipu angukamba kuti: “Viwoneka kuti mwa ŵanthu imwi mwe peposi pa nyengu ya maphara iyi!” Ŵanthu anandi adanirizanga kuti: “Kunu naku kwe Akaboni aku Yehova!” Kwa mazuŵa nganandi, dilayiva munyaki wa basi wakananga asani Akaboni akhumba kumupasa kapepala ndipu iyu waŵamukanga kuti wakulonde kali timapepala 4!

Ŵanthu anyaki kenga kakwamba kuto mabuku pa timashelufu. Yiwu anguto mabuku ngenanga chifukwa cha kuzizwa ndi mo Akaboni achitiyanga vinthu kumalu nga maphara ngenanga. Ivi ndivu vinguchitikiya munthu munyaki yo wagwiranga ntchitu ku siteshoni yinyaki ya TV. Iyu wangukumbuka kuti, chaka chinyaki wanguwona so Akaboni pamalu nga maphara ngenanga. Sonu wati wawona kuti ŵaza so, wanguŵanaŵana kuti waluti po penga kashelufu ka mabuku ndipu wanguto buku la Chisisi cha Banja Lalikondwa chifukwa ndilu lenga ndi nkhani zo iyu wakhumbanga. Wati wamaliza kuŵerenga mabuku nganyaki ngo ngenga mugalimotu mwaki, wanguziŵiska anyaki wo wagwiranga nawu ntchitu za timashelufu tamabuku teniti ndipu nawu anguluta kuti akatopu mabuku ngo ngenga ndi mitu yakupambanapambana.

Alendu anyaki wo anguza ku mwambu wenuwu angufufuza ko kwenga Akaboni ndipu ŵati aŵasaniya anguŵafwatukiya ndi kuŵakambiya vo venga kukhosi kwawu. Munthukazi munyaki wangukambiya Akaboni kuti wajiwonanga kuti wengavi chilindizga chechosi ndipu wapenjanga kujibaya mwakujiponya kusi kwa sitima ya pamtunda. Kweni wati wavwa uthenga wakuchiska wa m’Bayibolu wo wakambanga za chimangu cho ŵanthu azamusaniya mu Ufumu waku Chiuta, wanguleka kuja ndi maŵanaŵanu ngakukhumba kujibaya. Munthukazi munyaki so wangukambiya Akaboni kuti: “Lutirizgani kugwira ntchitu yamampha yeniyi!”

Ada anyaki akupunduka angukamba kuti akayikiya munthu weyosi yo ndi mulendu, kweni anguzomereza kuti munthukazi munyaki waŵawovyi chifukwa chakuti njumoza wa Akaboni aku Yehova. Ada yaŵa angumukambiya kuti: “Ndawonga chifukwa cha kumwemwete kweniso kuvwala kwinu mwaulemu. Munthu wangakukayikiyani cha chinanga nkhamanavi.”