Pa 20 May, 2015, mura yo wawonere tawuni yikulu ukongwa ya Rostov-on-Don yo ye kumwera kwa Russia, wangulemba kalata yakuwonga Akaboni aku Yehova “chifukwa chakujipereka pakugwira ntchitu yakutowesa malu mu tawuni yeniyi.”

Pa nyengu yo ŵanthu a mutawuni iyi angunozga kuti atowesi tawuni ya Rostov-on-Don, Akaboni aku Yehova akutuliya mu mipingu yinayi anguyola vimalala vo venga mumphepeti mwa msewu ndi msinji. Pati pajumpha maora ngamanavi ŵaka, anguyola vimalala vakuzaza mathumba 300, ndipu anguchivitaya mwakugwiriskiya ntchitu mathiraki.

Ntchifukwa wuli Akaboni aku Yehova angukhumbisiska kutowesa tawuni iyi? Ama anyaki a vyaka 67 zina lawu a Raisa angukamba kuti: “Ndiwona kuti vakukhumbika ukongwa. Ndikhumba kuti tawuni yangu yijengi yakutowa kuti weyosi wajengi mumalu ngakutowa. Ndikondwa ukongwa kugwiraku ntchitu iyi. Chinanga kuti mbanthu amanavi wo angawona, kweni Yehova Chiuta wawona vosi vo tichita.” Aleksander nayu wangukamba kuti: “Tipharazgiya ŵaka ŵanthu cha kweni tigwira so ntchitu zo zitovya ŵanthu ŵenaŵa. Ndikondwa ukongwa asani ndichita vinthu vakovya ŵanthu anyaki mu chigaŵa changu.”

Ŵanthu wo anguwona Akaboni aku Yehova achigwira ntchitu iyi, anguŵawonga ukongwa chifukwa cha kujipereka kwawu. Munthu munyaki yo waja mutawuni iyi, wanguzizwa ukongwa wati wavwa kuti Akaboni aku Yehova agwira ntchitu kwambula muholu. Pavuli paki nayu wanguŵanaŵana kuti wagwireku ntchitu yeniyi ndipu wangukamba kuti: “Ndaziŵanga cha kuti kugwira ntchitu iyi kungaja kwakukondweska viyo!” Iyu wangulutirizga kukamba kuti: “Anandi mwaku yimwi muja kunu cha kweni mwaza kuti muzitiwovyi.”

Mura munyaki wa tawuni yo, wanguwona kagulu kanyaki ka Akaboni aku Yehova ko kanguwunjika mathumba nganandi nga vimalala. Mura uyu wanguŵajambula chithuzi pafupi ndi mathumba nga vimalala kuti “wakalongo ŵanthu anyaki mo ntchitu yo yingwende kuti nawu atoliyeku sambiru.”