Mu vyaka vapambula kuswera yapa, ŵanthu anandi wo akuthaŵa kwawu ku Africa, ku Middle East, ndi Kumwera kwa Asia akuluta ku Europe. Pakukhumba kuŵawovya, mawupu ngo ngagwira ntchitu limoza ndi boma kweniso ŵanthu anyaki akujipereka, atesesa kuŵasaniriya chakurya, pakuja ndi chovyu cha ku chipatala.

Kukamba uneneska, ŵanthu wo akuthaŵa kwawu akhumbika chovyu chakuliŵavu pe cha. Ve viyo chifukwa chakuti anandi mwa ŵanthu ŵenaŵa asuzgika maŵanaŵanu chifukwa cha vinthu vo vitiŵachitikiya. Mwaviyo, akhumbika kupembuzgika kuti aje ndi chilindizga. Akaboni aku Yehova ku central Europe, atesesa kuwovya ŵanthu ŵenaŵa mwa kuŵavwisiya asani akonkhoska masuzgu ngawu ndipuso atiŵachiska ndi uthenga wa m’Bayibolu.

Kwambiya mu August 2015, Akaboni akutuliya mu mipingu yakujumpha 300 ku Austria ndi ku Germany atesesa kuŵapembuzga ŵanthu wo akuthawa kwawu. Akaboni ŵenaŵa, awona kuti ŵanthu wo akuthaŵa kwawu, akondwa ukongwa asani akambiskana nawu kwamuka kwa mafumbu nga m’Bayibolu nge yanga:

• Ntchifukwa wuli pacharu chapasi pe masuzgu nganandi viyo?

• Kumbi ntchinthu wuli cho chichitika asani munthu wafwa?

• Kumbi uthenga wamampha wo usanirika m’Malemba ndi nuwu?

• Kumbi Chiuta we ndi zina?

• Kumbi Akaboni aku Yehova mbayani?

Pakati pa mwezi wa August ndi October 2015, Akaboni wo aja muchigaŵa chenichi, angudanisa mabuku ngo ngakonkhoska Bayibolu ngakukwana matani 4 ku ofesi ya nthambi ya ku Central Europe. Yiwu angugaŵiya mabuku ngenanga kwawezi ku ŵanthu wo akuthaŵa kwawu.

Anandi mwa ŵanthu wo akuthaŵa kwawu, alongoro chineneru cha kwawu pe. Mwaviyo, Akaboni agwiriskiya ntchitu webusayiti ya jw.org yo pasanirika nkhani ndipuso mavidiyo nga vineneru vinandi. Matthias ndi Petra wo ateŵete mwakujipereka ku Erfurt, Germany angukamba kuti: “Nyengu zinyaki tikambiskana ndi ŵanthu mwakugwiriskiya ntchitu manja, ndi vithuzi.” Akaboni aku Yehova agwiriskiya so ntchitu pulogilamu ya JW Language yo yisambiza vineneru kuti apharazgi uthenga wamampha ku ŵanthu wo akuthaŵa kwawu mu chineneru chawu. Anyaki agwiriskiya so ntchitu pulogilamu ya JW Library yo yisanirika mu vineneru vinandi kuti aŵerengi Malemba kweniso kuti awonesi mavidiyo.

Banja linyaki la Akaboni lo lituliya ku Schweinfurt ku Germany, lingukamba kuti: “Zuŵa linyaki tichipharazga, ŵanthu anandi angutizunguliya. Pati pajumpha maora ngaŵi ndi hafu, tingugaŵiya mabuku ndi magazini ngakukwana 360. Ndipu anandi asani alonde mabuku ngidu asindamanga visku vawu pasi kulongo kuti awonga.” Wolfgang yo wateŵete mwakujipereka ku Diez, Germany wangukamba kuti: “Ŵanthu akuthaŵa kwawu akondwa ukongwa asani awona kuti ŵanthu anyaki atiŵaŵanaŵaniya. Nyengu zinyaki atitipempha mabuku nga vineneru 5 pamwenga 6.”

Ŵanthu anandi atamba kuŵerenga mabuku ngidu asani alonde ŵaka ndipu anyaki atuza kuziwonga Akaboni asani amala kuŵerenga. Kaboni munyaki wa ku Berlin ku Germany zina laki Ilonca wangukamba kuti: “Anyamata anyaki ŵaŵi anguza kuzito mabuku. Ndipu pati pajumpha maminiti 30 anguza kuzitipaska buledi nge mphasu. Yiwu angupepesa chifukwa chakuti pengavi chinthu chinyaki cho atingi atipasengi kulongo kuti atitiwonga.”

Ŵanthu wo agwira ntchitu ya kuwovya ŵanthu wo asuzgika, arara aboma, kweniso ŵanthu apafupi, atiŵawonga ukongwa Akaboni chifukwa chakujipereka pa kuwovya ŵanthu wo akuthaŵa kwawu. “Tawonga!” Yanga ndi mazu ngo munthu munyaki yo wagwira ntchitu ya kuwovya ŵanthu pafufupi 300 wo akuthaŵa kwawu wangukamba. Iyu wangulutirizga kukamba kuti: “Titikuwongani ukongwa chifukwa chakuŵanaŵaniya alendu wo aja mu charu chidu.” Munthu munyaki so yo wagwira ntchitu ya kuwovya ŵanthu wo asuzgika, wanguwonga so Akaboni chifukwa chakupereka mabuku ku ŵanthu wo akuthaŵa kwawu kuti aŵerengengi mu chineneru chawu. “Ivi vaŵawovya kuti asazgiyeku vakuchita vinyaki mumalu mwakurya ŵaka chakurya katatu pazuŵa.”

Marion ndi mulumu waki Stefan, wo aja ku Austria, angukonkhose apolisi ŵaŵi wo anguza kuziyendere malu chifukwa cho yiwu apharazgiya uthenga wamampha. Apolisi yaŵa anguŵawonga ukongwa ndipu anguŵapempha mabuku ngaŵi. Marion wangukamba kuti: “Apolisi ŵenaŵa atiwonganga mwakuwerezawereza chifukwa cha ntchitu yo tachitanga.”

Munthukazi munyaki wa ku Austria yo nyengu zosi wapereke katundu ku kampu yinyaki, wawonanga kuti nyengu zosi Akaboni ayesesanga kuza kuziwovya ŵanthu akuthaŵa kwawu kwali kuje lumwi pamwenga vuwa. Zuŵa linyaki iyu wangukambiya Akaboni kuti: “Mbuneneska kuti ŵanthu wo akuthaŵa kwawu akhumbika chovyu, kweni cho akhumbika ukongwa nkhuŵawovya kuti aje ndi chilindizga ndipu ivi ndivu imwi muchita nadi.”