Wupu wa United Nations unguchitiska unganu kwambiya mu November 30 mpaka pa 12 December 2015. Pa unganu wenuwu, akambiskananga za kusintha kwa nyengu ndipu ŵanthu anandi akutuliya mu vyaru 195 anguza mutawuni ya Paris mucharu cha France. Nkhani yikulu yo akambiskananga yenga ya kusintha kwa nyengu ndipuso vo angachita kuti ŵanthu aleki kunanga chilengedu. Ŵanthu pafufupi 38,000 kusazgapu arara aboma, asayansi, akaswiri wo awona vachilengedu ndipuso alongozgi amabizinesi, angusanirikapu pa unganu wenuwu. Ŵanthu anandi anguwungana pamalu nganyaki ngo ngenga pafupi ndi nyumba yo achitiyangamu unganu kuti ŵavwi vinandi vakukwaskana ndi kusintha kwa nyengu.

Chinanga kuti Akaboni aku Yehova angusanirikapu cha pa unganu uwu, kweni nawu aŵikiyapu mtima ukongwa pa nkhani ya chilengedu. Ndipu pa nyengu yeniyi, Akaboni aku Yehova ŵenga pa ntchitu yapade yakupharazga ku Paris kuti ŵanthu azamuja mwachimangu mu charu cho chazamuleka kunangika.

Kaboni munyaki yo wangukwera basi, wakambiskananga ndi da munyaki waku Peru yo wanguvwala malaya nga mudawuku wakwawu. Da uyu wangukamba kuti, chinanga kuti ndija umoyu wambula kutamatama kweni ndikondwa ukongwa chifukwa ndija pa phiri la kutowa. Kweni nyengu zinyaki ndi suzgika ndi maŵanaŵanu asani ndi ŵanaŵaniya vinthu vo vichitikiyengi charu chapasi kunthazi. Iyu wangukwaskika ukongwa ndi uthenga wo wanguvwa mwakuti wanguto khadi lo lingumuwovya kuti waziŵi webusayiti ya Akaboni aku Yehova ya www.pr418.com.

Akaboni aku Yehova ŵaŵi wo ŵenga mu sitima ya pamtunda, angupharazgiya kaswiri munyaki yo wawona vachilengedu wa ku America. Iyu wanguzizwa ukongwa kuvwa kuti Akaboni aku Yehova angulonde mphotu kaŵi kutuliya ku wupu wakuwona vachilengedu. Wupu wenuwu ungupereka mphotu kwa Akaboni aku Yehova chifukwa chakujipereka pakuzenga nyumba ziŵi zifya zo zingumangika ndi chilatu chakuvikiliya chilengedu. Nyumba zenizi zingumangika ku ma ofesi nga nthambi nga Akaboni aku Yehova ku United States muchigaŵa cha Wallkill, ku New York. Kaswiri uyu nayu wangukondwa ukongwa kulonde khadi la kumulongozge pa webusayiti yidu.

Ŵanthu anandi ŵati awona kuti Akaboni aku Yehova aŵikiyapu mtima pakuphwere chilengedu, angulayizga kuti amujula webusayiti yidu. Munthu munyaki wa ku Canada wanguvwa kuti Akaboni aku Yehova atesesa kuphwere malu ngo kusanirika mtundu unyaki wa viyuni mutawuni ya Warwick ku New York ko Akaboni azenganga likulu lawu la sonu. Iyu wangukamba kuti: “Ndechendaje wakuwona vachilengedu, ndagwiranga ntchitu ya kuvikiliya tiyuni. Ndaziŵanga cha kuti Akaboni aku Yehova nawu awona kuti vinthu vamoyu navu vakukhumbika. Ndamuŵerenga mabuku nginu ndipuso ndamujula webusayiti yinu kuti ndiziŵi vinandi vakukwaskana ndi yimwi.”