Mazuŵa nganu pacharu chosi chapasi mu matawuni ngakulungakulu, ŵanthu akuziŵiriya kuwona timashelufu tamatayala to tija ndi mabuku ngo ngakonkhoska Bayibolu ngo Akaboni aku Yehova agaŵiya. Mwakuyeruzgiyapu, Akaboni ku Germany ŵe ndi malu ngakuŵikapu timashelufu mu matawuni nga Berlin, Cologne, Hamburg, Munich, ndipuso matawuni nganyaki ngo ŵanthu atangwanika ukongwa.

Kumbi asani ŵanthu ŵe pa holidi ndipu aluta mumatawuni ngamanangamana, asaniya so timashelufu nge mo kuŵiya ku Germany ko ŵanthu aluta kuchichita ma holidi? Kumbi ŵanthu wo aja ku chigaŵa cha kumpotu mumphepeti mwa nyanja, kweniso wo ŵe mu vilwa va Baltic ndi North seas, anguwulonde wuli upharazgi wa timashelufu? Mu 2016, ofesi ya nthambi ya Akaboni aku Yehova ku Central Europe yinguchita vinthu vinyaki kuti yimuki mafumbu ngenanga. Kwambiya mu May mpaka mu October, Akaboni pafufupi 800 kusazgapu wo angutuliya ku Vienna, Austria wo angupharazga mwakugwiriskiya ntchitu timashelufu, angujipereka kuti aŵiki timashelufu mumalu pafufupi 60 kumpotu kwa Germany.

Ŵanthu amuchigaŵa ichi anguŵalonde umampha ukongwa Akaboni. Munthu munyaki yo wangujipereka kugwiraku ntchitu yakupharazga wangukamba kuti: “Tinguwona kuti ŵanthu akhumbiska kuvwisiya uthenga widu. Yiwu ŵenga akuchezeka, akukhumbisiska kuziŵa vinandi, kweniso akwanja kukambiskana ndi anyawu.” Heidi yo wanguluta ku tawuni ya Plön nayu wangukamba kuti: “Pati pajumpha mazuŵa ngamanavi, ŵanthu angwamba kutiwona nge kuti nasi te a mutawuni yeniyi. Anyaki mwa ŵanthu yaŵa asani atiwona atibayibasanga.” Munthu munyaki wambula kuvwa wangukambiskana nawu mu chineneru cha manja kuti: “Mwa ŵanthu imwi musanirika peposi!” Iyu ndi anyaki atuwanga ku unganu wa ŵanthu wo ŵe ndi suzgu la kuvwa wo wenga ku kumwera cha kuvuma kwa Germany. Kwenuku ndiku wanguchikumana so ndi Akaboni aku Yehova.

Ŵanthu anyaki wo aja so kwenuku nawu anguwovyapu ukongwa. Pa chilwa cha Wangerooge wa polisi munyaki wangukambiya Akaboni vo angachita kuti apharazgiyi ŵanthu anandi. Mutawuni yinyaki ya Waren an der Müritz, munthu munyaki yo wayendesanga boti lo ŵanthu angukwera pakuwona malu, wangulongo ŵanthu ŵenaŵa malu nganyaki ngakukondwesa ukongwa. Wati wafika pa malu ngo penga timashelufu ngamatayala po patuma masitima, wanguŵalongo ŵanthu wo ŵenga mu boti ndi kukamba kuti: “Pa ndipu mungasambira vakukwaskana ndi Chiuta.” Ŵanthu anandi wo ŵenga paholidi anguluta pa malu ngo penga timashelufu ndipu anguŵerenga mazu ngo angungalemba pavikwangwani vo venga pa timashelufu.

Alendu wo anguza kuziwona malu ndipuso ŵanthu amuchigaŵa chenichi angukhumbisiska kuziŵa vinandi va timabuku titatu iti:

• Kumbi Chiuta Watitiŵanaŵaniya Nadi? Munthu yo wanguza kuziwona malu wangukamba kuti: “Ndaja ndichijifumba fumbu lenili kwa nyengu yitali. Sonu asani nde paholidi, ndamuyesesa kusaniya nyengu yakuŵerenge buku losi lenili kuti ndisaniyi kwamuka kwa fumbu ili.”

• Uthenga Wamampha Wakutuliya Kwaku Chiuta! Munthulumi munyaki wakukota, wangukambiya Akaboni kuti wakondwa cha ndi vo vichitika muvisopa. Akaboni angumuwovya munthu mwenuyu kuziŵa kuti palivi munthu weyosi yo wangamaliska masuzgu ngo tikumana nangu, kweni Chiuta pe ndiyu wangafiska venivi. Iyu wangukondwa ukongwa ndipu wangulonde kabuku ndi kukamba kuti nditikulayizgani kuti ndamuŵerenga kabuku kenaka.

• Vo ndisambira m’Bayibolo. Kabuku yaka kakupangikiya ŵana ndipu Ada anyaki anguzomerezga mwana wawu munthukazi kuti wato kabuku kenaka. Kusazgiyapu penapa, ada yaŵa anguto so Buku Langu la Nkhani za m’Bayibolo ndipu angukamba kuti: “Buku ili lamuwovya banja langu.”

Ŵanthu wo ajumphanga nthowa anguto mabuku ngakujumpha 3,600. Ndipu anyaki angupempha Akaboni kuti azi kunyumba kwawu kuti akalutirizgi kusambira Bayibolu.

Akaboni wo angugwiraku ntchitu yeniyi angukondwa ukongwa. Jörg ndi muwolu waki Marina, anguluta ku malu ngo nge kufupi ndi nyanja ya Baltic Sea. Yiwu angukamba kuti: “Yenga mphasu ya pade ukongwa. Tingukondwa ukongwa ndi chilengedu chaku Chiuta ndipu tenga ndi mwaŵi wakupharazgiyaku anyidu vaku iyu.” Lukas yo we ndi vyaka 17 wangukamba kuti: “Ndingukondwa ŵaka pe cha kweni ndakambiyangaku so anyangu vo ndavwa.”