Kupharazga Mumphepeti mwa Msinji wa Xingu
Kukwamba kwa mwezi wa July mu 2013, Akaboni aku Yehova akukwana 28 ku Brazil angunyamuka mu tawuni ya São Félix do Xingu ndi kuluta ku tawuni ya Cayapo kweniso ya Yuruna Indians. Yiwu angukwera boti litali mamita 15. Anguselere cha ku nkhondi ndipu angwenda mu Msinji wa Xingu wo ngutali makilomita 2,092 kuti akafiki ku Msinji wa Amazon.
Gulu ili la Akaboni aku Yehova lingwenda ulendu uwu kuti likapharazgi Uthenga wa Ufumu ku ŵanthu wo ajanga mumizi ya m’mphepeti mwa msinji wenuwu. Pa zuŵa lachitatu, gulu ili lingufika m’muzi unyaki wo udanika kuti Kokraimoro. Ŵanthu a m’muzi uwu mbalikondwa ndipuso atanja kulonde alendu. Munthukazi munyaki wa m’muzi wenuwu wayendesanga waka manja ngaki mwanthazi. Munthu munyaki wakwenuku yo walongozganga abali yaŵa wanguŵakambiya kuti: “Vo munthukazi yuwa wachitanga vang’anamuwanga kuti: ‘Zani kunu mosi. Tipenja tikuziŵeni mosi!’ ”
Akaboni yaŵa angukambisana ndi munthu weyosi yo angumusaniya. Anyaki akambisananga nawu mu Chiphwitikizi ndipu anyaki akambisananga nawu mwakugwirisiya ntchitu manja. Vithuzi vakutowa vo venga m’mabuku ngakukonkhosa Bayibolu ngo angupinga vinguŵawovya ukongwa. Ŵanthu anandi anguzomera kupasika mabuku, ukongwa buku la Vwiyani Chiuta.
Gerson yo ndi mpayiniya wapade ku São Félix do Xingu, wangukonkhosa vo munthu munyaki wanguchita wati walonde Buku Langu la Nkhani za m’Bayibolo. Iyu wanguti: “Munthu uyu wangulileresesa ndipu pavuli paki wanguliko mwanthazi ndi manja ngosi ngaŵi. Wakhumbanga cha kulileka pasi chinanga nkhanyengu kamanavi.”
Akaboni yaŵa angugaŵiya mabuku, magazini kweniso timabuku ndipu vosi pamoza vingukwana 500. Ŵanthu wo aja mumuzi unyaki wo udanika kuti Kawatire, angukondwa ukongwa kuvwa layizgu la m’Bayibolu lakuti kwazamuja paradayisu. Tonjaikwa waja mutawuni ya Cayapo Indian ndipu watanja kulonde alendu. Iyu wangukamba kuti: “Viwoneka kuti ŵanthu mu Paradayisu azamujanga nge mo isi tijaliya.”
Ŵanthu anandi a mutawuni ya São Félix do Xingu anguziŵa za ulendu uwu. Simone yo wanguluta nawu pa ulendu uwu wangukamba kuti ŵanthu anyaki a kufupi ndi ko iyu wajanga akayikiyanga asani ŵanthu akuŵalondere. Kweni ndivu vinguchitika cha. Simone wanguti, “Angutilondere umampha ndipu tingupharazgiya ŵanthu wosi.”