Kafukufuku walongo kuti pacharu chapasi pe ŵanthu pafufupi 1,500,000 wo agwira ntchitu mu sitima. Chifukwa chakuti ŵanthu wo agwira ntchitu iyi kanandi atenda ndi kuma mu ma jiti ngakupambanapambana, kumbi Akaboni aku Yehova achita wuli kuti apharazgiyi ŵanthu ŵenaŵa uthenga wa mu Bayibolu? Asani sitima yafika pa jiti, Akaboni wo akusambizika umampha, aluta mu sitima kuti akasambizi uthenga wa mu Bayibolu kweniso kuti akagaŵiyi mabuku nga mu chineneru cho yiwu alongoro.

Kumbi ŵanthu wo atenda pa nyanja atiwulonde wuli uthenga wo Akaboni atiŵapharazgiya? Stefano waku Canada wangukamba kuti: “Ŵanthu anyaki aŵanaŵana kuti ŵanthu wosi wo agwira ntchitu mu sitima mbambula nkharu ndipuso mbakusuzga ukongwa. Chinanga kuti vingaŵa viyo, kweni anyaki awona kuti anandi mwa ŵanthu ŵenaŵa mbakujiyuyuwa ndipu akhumbisiska kusambira.” Stefano wangulutirizga kukamba kuti: “Ŵanthu anandi agomezga kuti kwe Chiuta ndipu akhumbisiska kuti Chiuta waŵatumbikengi, mwaviyo tikondwa ukongwa kuti atitilonde umampha.” Ku Vancouver pe ndi ku Akaboni aku Yehova anguzomerezeka kulutirizga kupharazga mu masitima kwa nyengu yakujumpha 1,600. Kwambiya mu September 2015 ndi mu August 2016, ŵanthu wo agwira ntchitu mu sitima angulonde mabuku nganandi mu vineneru vakupambanapambana ndipu ŵanthu akujumpha 1,100 angwamba kusambira Bayibolu.

Chifukwa chakuti Akaboni asanirika mu majiti nganandi pacharu chosi, ŵanthu wo agwira ntchitu mu masitima asani akhumba kulutizga kusambira Bayibolu angapempha Kaboni kuti wakalutirizgi kusambira nawu asani sitima yaki yafika pa jiti lo le kufupi ndi kwawu. Mwakuyeruzgiyapu, mu May 2016, Akaboni aku Yehova ku Vancouver angukumana ndi Warlito yo wagwiranga ntchitu ya kubika mu sitima ya kunyamuwa katundu. Yiwu angumulongo ka vidiyo kakuti Ntchifukwa Wuli Tikhumbika Kusambira Bayibolo? Pavuli paki, angwamba kusambira nayu Bayibolu mwakugwiriskiya ntchitu kabuku kakuti Uthenga Wamampha Wakutuliya kwaku Chiuta! Warlito wangukondwa ukongwa chifukwa chakumuyende ndipu wakhumbanga kulutirizga kusambira Bayibolu. Kweni suzgu lenga lakuti sitima yo iyu wangukwera yakhumbikanga kuma pa jiti la ku Brazil lo le kutali ukongwa ndi tawuni ya Paranaguá.

Pati pajumpha mwezi, sitima yo Warlito wangukwera yingufika pa jiti la Paranaguá ndipu iyu wanguzizwa ukongwa wati wawona Akaboni ŵaŵi a ku Brazil wo anguza ko kwenga sitima yo iyu wangukwera ndi kwamba kufumba zina laki. Akaboni yaŵa angukamba kuti akaboni anyawu a ku Vancouver ndiwu anguŵakambiya pemphu lo iyu wangupempha kuti wakhumba kulutirizga kusambira. Warlito wangukondwa ukongwa wati wakumana ndi Akaboni aku Brazil ndipu wanguŵawonga ukongwa Akaboni aku Vancouver chifukwa cha ndondomeku yo angunozga. Chifukwa cha likondwa, iyu wanguzomera kulutirizga kusambira Bayibolu nyengu yosi yo sitima yafikiya pa jiti lenili.