Ku Germany kusanirika ŵanthu anandi a mtundu wa Sinti ndi Roma. * Pambula kuswera yapa, Akaboni aku Yehova akutuzga timapepala to tikonkhoska Bayibolu, mabulocha ndi mavidiyo nga mu chineneru cha Chiromani, * cho ŵanthu a mtundu wa Sinti ndi Roma alongoro.

Mu mwezi wa September ndi October 2016, Akaboni aku Yehova angujipereka pa kuchita upharazgi wapade. Yiwu angugwiriskiya ntchitu timabuku ta muchineneru cha Chiromani, ku ŵanthu amtundu wa Sinti ndi Roma wo aja mu ma tawuni ngakupambanapambana nga ku germany, kusazgapu Berlin, Bremerhaven, Freiburg, Hamburg, ndi Heidelberg. Achitanga so maunganu mu chineneru cha Chiromani mu Nyumba zawu za Ufumu.

Ŵanthu anandi a mtundu wa Sinti ndi Roma anguzizwa kweniso angukondwa ukongwa ndi vo Akaboni anguchita. Andre ndi muwolu waki Esther wo angugwiraku ntchitu yakupharazga angukamba kuti: “Ŵanthu angukondwa ukongwa chifukwa tinguchita phamphu kuti tikambiskani nawu mu chineneru chawu.” Ndipu ŵanthu anandi angukwaskika ukongwa ŵati ŵavwa ndi kuŵerenga uthenga wa mu Bayibolu mu chineneru chawu. Ama anyaki anguwonere vidiyo ya mu chineneru cha Chiromani ya mutu wakuti Ntchifukwa wuli Tikhumbika Kusambira Bayibolu? Mwakuwerezawereza ama yaŵa angukamba mwa kudaniriza kuti: “Ichi ndichu chineneru changu!”

Kaboni munyaki zina laki Matthias yo wangugwiraku ntchitu ya pade ku Hamburg wanguti: “Ini ndi muwolu wangu tenga mugulu lo lenga ndi Akaboni 8 ndipu tinguluta ku malu ngo kwajanga ŵanthu 400 a mtundu wa Sinti ndi Roma. Weyosi yo takambiskananga nayu watipemphanga mabuku.” Bettina yo wangujipereka kugwiraku so ntchitu iyi wanguti: “Ŵanthu anyaki anguliya ŵati awona kuti Akaboni aku Yehova apanga mabuku mu chineneru cha Chiromani.” Anandi angwamba kuŵerenga mabuku mwakukweza ŵati alonde ŵaka, ndipu atoliyangaku so anyawu.

Ŵanthu anandi a mtundu wa Sinti ndi Roma anguzomera ŵati aŵadaniya ku maunganu. Anandi mwa ŵanthu 94 wo anguwungana ku Hamburg, kenga kakwamba kuluta ku Nyumba ya Ufumu. Ku Reilingen kufupi ndi tawuni ya Heidelberg ŵanthu akukwana 123 anguwungana ndi Akaboni aku Yehova. Mawunganu ngati ngamala, ŵanthu ankhondi wo alongoronga chineneru cha Chiromani angupempha kuti asambirengi Bayibolu.

Pa nyengu yo Akaboni aku Yehova anguchita upharazgi wapade wenuwu, angugaŵiya timapepala ndi mabulocha ngakukwana pafufupi 3,000. Akaboni angukambiskana so ndi ŵanthu akujumpha 360 a mtundu wa Sinti ndi Roma ndipu ŵanthu 19 angwamba kusambira Bayibolu. Ŵanthu anandi wo anguvwa uthenga uwu angukamba kuti: “Ntchakukondwesa ukongwa kuziŵa kuti nasi Chiuta watitiŵanaŵaniya.”